一個香港留學生在美國的生活: 拆屋

2003年嘅春天，生活好似又回復平靜。Joe一月初響夏威夷返咗嚟之後，公司開始咗幾個比較大嘅Project，其中包括一個三十二個單位嘅重建項目。除此之外，我同Joe商量過，Palo Alto間舊屋會拆哂重建，將會係我嘅新屋，呢個Project要差唔多兩年到兩年半先會完成，如果順利，應該2006年就可以入伙。  

正當我同Joe響工作上忙到死，Aaron就繼續佢嘅醉生夢死，佢同Gigi Susanne又嚟過幾次友宜波，到咗後來兩條女竟然肯唔收錢畀佢扑，我只可話同人唔同命！「喂，做緊乜？我同Gigi依家去你度！」三月初嘅一個禮拜六中午，Aaron突然又打電話嚟，「唔得閒呀，我趕住出去呀！你唔好唔記得今晚David生日飯呀！」「記得！Lisa依家同Maggie一齊響Stanford買緊禮物。」「咁你仲同Gigi出嚟玩？」「人生苦短呀！」「屌！我唔得閒理你！」「咁我自己上嚟啦！」「唔該你玩完𢴇返好間屋！」  

收線之後我即刻出門，免得遲啲碰到Aaron佢又要我留低。今日本來我就約咗Joe去睇我響Palo Alto間房睇下拆成點，去到工地，Joe已經響度同個工頭開緊會，間屋已經拆得七七八八，唯一有問題係後園啲樹，中國人屋企鐘意斬樹，美國人就要種樹，拆屋攞Permit嘅時候City講得好清楚，斬一棵樹要種返一棵樹，否則起好間新屋都攞唔到入伙紙！斬就一定斬，問題係響邊度種返啲樹，我睇完個建築圖則，我就話「右邊係泳池，左邊係Guest House，咁不如集中響個Lot最後做個細樹林，一口氣種哂嗰幾棵樹。」「其實你過咗Inspection攞埋入伙紙再斬返呢幾棵樹，City都唔會知，最緊要你啲Neighbor唔好阿吱阿咗！」「到時先算啦，不過要種不如種幾棵果樹。」「可以呀，我同Landscape嗰Contractor傾吓。」「喂，我哋洗唔洗買禮物去今晚個Party？」「帶兩支靚酒咪得囉！我放咗響車，當係我同你夾份。」「咁仲好，買禮物好煩，咁依家去邊，時間仲早，不如去你屋企打陣機先？好耐冇打啦！」Aaron依家應該響我屋企，我點可以畀Joe上去！「打機咁無聊，又要返上三藩市，不如就響附近行陣，反正仲有兩個鐘食飯！」「咁又係，餐廳響附近，不過我寧願搵間Coffee Shop 坐下好過同你兩個麻甩佬行街！」「咁不如各有各，等陣響餐廳見。」  

今晚食飯間餐廳響University Avenue，係一間Fusion Vietnamese，距離我買呢間新屋好近，行路都係廿分鐘左右，開車就更加快，三分鐘唔洗，我已經泊好車，禮拜六行人比平時多，沿途漫步，兩傍小店林立，大多係餐廳，亦有唔少其他賣衫賣單車嘅小舖，仲有間專上舊電影嘅戲院，平時主打學生生意。  

行咗陣，電話響起，「Hello？」「阿偉？Maggie呀！」「Hi Maggie！」「你響邊呀？要搵你幫手。」「我響Stanford 附近，有咩嘢要我幫？」「我同Lisa仲買緊嘢行唔開，你可唔可以幫我攞蛋糕送去餐廳先，我怕我趕唔切。」「當然可以，地址？」Maggie畀咗個地址我就收線，原來間Cake Shop都係響附近，行都行到。