一個香港留學生在美國的生活: 初遇

攞咗個生日蛋糕，行返去餐廳，去到嘅時候仲未夠六點，我放低個蛋糕，Waitress就帶咗我去間Private Dining Room，入面有張二十人長枱，我係第一個到，我攞埋我帶嚟兩支酒，叫Waitress 開咗透氣，跟著我一個人坐咗響度睇餐牌，價錢一啲都唔平，一碟越南春卷要$12（2003年一般越南粉都係六七蚊碗，春卷四蚊左右），一隻牛油蟹$40，完全係天價，擺明係厄鬼佬越南餐！ 正當我全神貫注睇Menu嘅時候，Waitress帶咗個女仔入嚟，個女仔見到我，有啲尷尬咁問「請問呢度係咪David嘅Birthday Party？」「係呀！」「我叫小美，係Maggie大學同學。」「我叫阿偉！」互相介紹完，小美就坐咗響我對面個位，成間房得我地兩個，見有啲冷場，咁我就嘗試打開話題「第一次見你，你認唔認識Joe？我係Joe中學同學，係Joe介紹David同Maggie畀我認識。」「我唔識Joe，不過聽過佢個名，我其實同Maggie熟啲。」「你響Bay Area讀書？我響S大學畢業，依家響三藩市返工。」我同小美就開始傾偈，小美唔係好似Anita Amy Heather嗰種第一眼見已經覺得靚嘅女仔，佢係屬於小家碧玉鄰家女孩型，相處落畀人舒服嘅感覺。傾咗一陣，又有另外一對我唔認識嘅朋友入咗嚟，男嘅叫阿成，佢拖住嘅女朋友叫小諾，都係香港人，係David公司同事，啱啱搬咗嚟Bay Area做嘢，兩個都係響Toronto 畢業，用TN Visa申請響 美國留低，依家住響Sunnyvale，互相介紹之後，阿成「我同小諾響呢度冇乜朋友，你唔介意不如交換電話，有時間約下出嚟食下飯吖！」就係咁，我地互相交換咗聯絡電話同email，同一時間，David Maggie同其他朋友陸續出現，成間房坐落足足有廿二人，當中又認識多兩三個新朋友，Lisa早就同Maggie一齊到咗，不過就未見Aaron，最後到咗上appetizer嘅時候Aaron先出現，坐響我隔離，「有冇再遲啲呀？」「遲到好過冇到啦！」「Gigi呢？送走咗未？唔好留低手尾響我度！」「送咗返屋企啦，不過冇時間𢴇屋，不過你有工人打掃，冇問題啦！」「屌！一個禮拜先一次，邊冇咁快嚟，咪又係我幫你𢴇！你快啲去陪Lisa啦，因住今晚要瞓車房！」  

Aaron去咗同David Maggie 打招呼，跟著同Lisa坐返過嚟我傍邊，之後我介紹咗坐響我對面新認識嘅阿成小諾同小美畀Aaron同Lisa，到最後食完生日蛋糕，Aaron同Lisa買咗飛睇戲要先走，Joe要趕住返佢老豆阿媽度接返個女，Party散場我咪唯有一支公行去攞車，行出餐廳準備等綠燈過馬路，見到小美都企響度等緊，「又見到你，你夜麻麻一個人去攞車，不如我陪你？」「我架車好近，下個街口就到。」「我都係同一方向，咁一齊行啦。」小美開架紅色嘅Mini Copper，我送佢上車之後就行去街角自己架車度。我再同小美見面已經係兩年之後，而阿成同小諾就見得多好多，過咗兩個禮拜阿成主動搵我約食飯打牌，所以往後嘅日子，除左Joe同Aaron，我見得最多就係佢地兩個。  

寫到呢度，我要解釋一下，我同小美之間嘅故事我只會輕輕帶過，我同小美響2003年認識，2006開始拍拖，之後同居兩年，2009年結婚生仔到依家，從一開始我只係打算將我家庭以外嘅故事寫出嚟，所以自己老婆反而變成配角中嘅配角，再加上我同小美嘅生活非常平淡簡單，冇乜故性可言，唔寫好過寫。