一個香港留學生在美國的生活: 聖誕（2）

好多小提琴琴譜都都跟埋鋼琴伴奏部分，Heather試咗幾首，最後揀咗Cannon in D，呢首Piano部分比較簡單，佢彈咗兩次已經練好，咁我咪同佢夾下囉！  

https://youtu.be/ftxC5dNr7QU  

「你拉得好勁喎！」「哈哈，大家咁話！」「喂，好玩喎，仲有冇其他歌可以合奏㗎？」「有，你想唔想試下Four Hands，我有本Brahms嘅Hungarian Dance。」「好呀！我要彈右邊！」發現共同興趣，我同Heather跟著嗰兩個鐘就響音樂聲中渡過，一直到六點，焗爐嘅鬧鐘響起我先記得要攞舊肉出嚟！  

「等我幫你手啦？」「唔洗啦，你響飯廳等，吖，不如你去酒櫃搵支酒，幫我開咗佢透氣先。」我入返去廚房，先攞舊肉出嚟，跟著熱返個湯，最後加Dressing落沙律，餐聖誕飯就準備好。  

「我開支96年Opus好唔好？」Heather響外邊大聲問我，我捧住舊Prime Rib行出飯廳，「Opus放十到十五年最好，依家開有啲浪費，我應該仲有幾支92年Caymus，你攞出嚟開咗佢先 ，另一邊櫃入面有Decanter， 攞埋出嚟倒支酒入去啦。」好快已經放哂食響枱，一個Caesar Salad，一個蘑菇湯，再加舊Prime Rib。「嘩！好似好得咁喎！」「識咗你先講啦，或者好難食呢！」「聞到已好香！」「你自己攞沙律同倒湯，我切舊肉啦，食中間最嫩Medium Rare好唔好？頭同尾熟啲，我可以留低做燒牛肉三文治。」「你話點整就點整啦，你係大廚。」我先將兩邊比較熟嘅牛肉切走，跟住再切兩塊大約寸半厚嘅放上碟，我比較鍾意食厚切嘅Prime Rib，大啖肉大口酒先至正！「真係好食喎！」Heather好滿足咁講，「酒正定肉正先？」「兩樣都咁正，湯好味，沙律都好正！」「哈哈！多謝讚賞！」我搵咗隻聖誕歌嘅CD，一路聽歌一路食，好快一支紅酒已經飲完，我就問Heather「點呀？開多支？」「好呀，你收埋咗幾多好嘢？」「哈哈，你仲飲得，咁不如開友Bryant Family？」「好啊，聽過呢個酒庄，不過就未試過佢地啲酒。」「咁你要試下啦，都幾難買到。」我去酒櫃攞咗支93年嘅Bryant Family，Heather飲咗一啖「好濃好香果味，我鐘意！」「最緊要你鐘意啦！」「嗯，Blackberry，Blue Fruits，有少少煙熏咖啡，嗯，仲有朱古力味。」「你都幾勁喎，飲到咁多味！」「我都係估下估下亂咁噏。響邊度有得買？」「係朋友同個wine maker買跟著分咗一個case畀我，我仲有幾支，你鐘意咪攞去囉！」「下次再食steak先啦！」  



我同Heather都算酒量唔差，兩支落肚都未有醉意，食完塊Prime Rib，Heather問「仲有冇甜品？」「你仲未飽？雪櫃有雪糕。」「唔想食雪糕，不如去食糖水？」「咁等我𢴇埋啲碗碟放入洗碗機先。」𢴇好晒飯廳同廚房，休息咗一陣等啲酒氣過咗，出門口已經差不多九點，「去Sunset好唔好?」循例我都應該問下Heather意見，「Noriega嗰間？好呀！我想食椰汁燉雪蛤。」「咁行啦，我開車。」