一個香港留學生在美國的生活: 聖誕（3）

有靚女陪伴左右當然開跑車！由屋企去Sunset區食個糖水都幾遠，一東一西，行Local都要廿分鐘。同香港唔同，平安夜三藩市街上水靜河飛，除咗幾個露宿者之外，久唔久會見到部警車巡邏。Heather打開車窗，外面冷風吹散佢一頭長髮，從佢眼神中可以感受到佢其實好唔開心，成晚我地都冇提過佢老公，不過明眼人都知道佢老公響出面有無數女人，Heather只係名義上嘅老婆，如果唔係都唔會響聖誕呢啲日子孤男寡女走嚟我度食扒啦！  

呢間糖水舖係出咗名越夜越多人，去到當然要等位，好在食糖水嘅人多數唔坐得耐，我地等咗十分鐘就有枱，我同Heather各自叫咗自己碗糖水，再加多碟芒果pancake，食到一半，Heather「喂，你碗合桃糊好似幾好味喎！同你交換好唔好？」「吓？食咗一半啦喎！」「你怕我有病？我都唔怕，你怕乜嘢？」跟著就唔理我反應，將佢碗食淨一半嘅雪蛤畀咗我，跟手攞咗我碗合桃露食，我望住隻仲有少少脣膏印嘅匙羮，唔知用定唔用好，「喂，係咪怕污漕？係咪出聲囉！」「唔係，我只係未食過雪蛤姐！」我唯有臨時臨急搵個借口胡混過去！咁最後我都係若無其事咁樣食哂碗雪蛤。  

到埋單嘅時候Heather堅持要佢請「你都煮咗成餐晚飯，冇理由糖水都要你畀。」「好啦，唔同你爭。」「咁走啦，不過我要開你部Boxster返屋企。」「吓，你得唔得㗎，唔好炒咗我㗎車喎！」「姐姐有車牌嗰陣你都未戒奶，攞條車匙嚟啦，小氣鬼！」Heather冇直接沿舊路返屋企，佢選擇兜一個大圈，沿海邊嘅Great Highway再經Marina Embarcadero返去，由於路上冇車，佢開到好似賽車咁，返到去停車場嗰陣我個心仲驚到砰砰跳！「你洗唔洗開到咁快呀，好彩冇差佬！」停好車，我同Heather 坐𨋢返上樓，Heather「爽！好耐冇咁激過！」「嚇死我啦！」「今晚玩得好開心！」「最後緊要你開心，呢幾日聖誕假，咁你有乜節目？」「點呀，想約我？我打算屋企休息，邊度都唔去。」𨋢啱啱停到我嗰層，「Good Night啦，多謝你招待，你早啲沖涼瞓覺啦！」望住Heather，突然間有啲失落嘅感覺，行出𨋢我同Heather講「你都早啲瞓啦，Merry Christmas！」「哈哈，仲未十二點，未Christmas呀，過咗先講啦！」𨋢門好快關上，我唯有一個人行返入屋。  

廚房洗碗機仲洗緊啲碗，除咗洗碗聲，成間屋又回到平時咁平靜，我返返入房沖涼換衫擦牙洗面，攪完之後瞓上床已經差唔多十二點，腦海入邊Heather嘅身影一直揮之不去，響張床度瞓唔着碌嚟碌去，再睇吓個鐘，發覺已經12點，我突然間有個衝動想要即刻見到Heather，於是我起身着住睡衣拖鞋就跑咗上去㩒鐘，等咗陣，Heather先開門「咦，做乜仲未瞓？」「過咗十二點啦，我想同你講Merry Christmas！」