一個香港留學生在美國的生活: 聖誕（1）

廿四號一朝早，我先去做Gym同游水，返到屋企響雪櫃攞舊肉出嚟，放響室內三四個鐘就可以煮，見時間仲早，於是開電腦做下公司嘢先，順便整理埋新買個物業嘅資料。到咗中午嘅時候，Heather 打電話嚟「食咗晏未呀？洗唔洗幫手？」「我都未開始煮，我仲做緊Office啲嘢。」「Christmas Eve都咁忙？」「要攪埋尋日買屋啲手尾。你放心喎，今晚餐飯唔會走咗你嘅。」「見你咁忙，我買Lunch去你度啦！你想食乜？」「唔洗客氣喎，我屋企仲有嘢食。」「唔好咁婆媽，我去買兩份Sandwiches去你度啦！」  

到咗一點左右，Heather真係買咗兩份Sandwiches上我度，「多謝喎！特登買上嚟，我本來打算食個公仔麵做午餐就算。」「順便姐！點呀，仲未做完Office嘢？」「做完啦，等陣開工煮今晚嗰餐。」「有冇嘢要幫手呀？」「冇啦，你可以六點左右到，六點到六點半開飯。」「你唔歡迎我響度咩？我買埋晏畀你仲要趕我走？」「哈！唔係，我怕你悶姐，你自便啦！隨便參觀。」Heather 雖然唔係第一次嚟我屋企，不過今次算係正式做客，「你介唔介意我參觀下你間房呀？」「隨便，我入廚房啦，要飲嘢雪櫃有。」之後我哋就冇理Heather，快手快腳食完個Sandwich，跟著自己一個人響廚房入面忙。  

響我煮飯嘅同時Heather響大廳見到我部琴「喂，部琴係裝飾定係你真係識彈琴㗎？」「都算識嘅，你想彈就彈啦！我唔閑陪你。」「你煮你嘅飯，我玩你個琴。」冇耐，大廳就響起琴聲，Heather肯定係學過好多年鋼琴，可能太耐冇彈，雖然開頭有啲生硬，不過好快已經彈得非常流𣈱，Heather攞咗我琴櫃入面幾本琴書出嚟彈，有好幾首Mozart Sonata 彈得好好，我估佢鋼琴程度唔會比我差。  

一個湯一個沙律加舊三條骨六磅重嘅Prime Rib，準備功夫都要差唔多兩個鐘，舊牛肉又要焗四五個鐘，時間控制都幾重要。以前我都煮過同樣菜式好幾次，都算係駕輕就熟，舊牛入咗焗爐之後開始煮湯同洗菜，到四點左右湯同沙律都已經準備好晒，過多兩個鐘舊牛肉就可以食。  

我出到客廳，Heather仲坐響琴前面，佢彈緊首Beethoven Moonlight，佢見我行出嚟，就停低笑住講「好耐冇彈啦，我起碼有十幾年冇掂過琴，點彈都彈唔好！」「唔係吖，彈得好好喎！」「不如你彈嚟聽下？呢首Beethoven我已經唔記得點彈。」「哈哈，我平時都冇乜時間練琴，玩玩下就得。」「唔好推三推四，快啲彈。」「呢首Moonlight真係唔熟，不如Pathetique好唔好？」「咁快啲啦！」我打開本琴譜搵到首歌，「彈3rd Movement好唔好？」「求其啦！」於是我坐低開始彈奏  



https://youtu.be/L1-kZWjZP-g  

「嘩！彈得好我好多，仲話玩玩下！」「你屋企都冇琴，平時冇得彈咁更係差啲啦！」「咁我係咪應該考下買返個琴？」「你鐘意隨時歡迎你嚟練琴。」「咁我唔客氣啦！係呢，點解你櫃入面仲有Violin譜嘅？」「咁我平時都會玩下小提琴嘅。」「你兩樣都識？喂，教下我啦！我未玩過小提琴。」「你鋼琴底子好，小提琴好快上手。」「唉，算啦，邊有時間學吖！喂，有冇Duet可以玩下？」「有，櫃入面咪有囉！」「等我揀首試下先！」