一個香港留學生在美國的生活: 工作篇序章

終於寫完大學生活，原本打算寫一萬幾千字講下小詠嘅故事，結果一寫兩年，成三十三萬字。至於工作篇，會講到由2001畢業搬咗去三藩市到2009年結婚呢段時間。故事開始前我想先交代一下畢業後發生嘅事同背景。  

先講下我自己，第一份工係入Joe阿爸間公司做Trainee，Joe屋企有唔同生意，佢阿爸係做Tech出身，十幾年前同幾個Partner開發Software，幾年後公司被收購上市，搵咗第一桶金，之後就開始投資灣區房地產，我搬咗出三藩市第一份工就係響佢阿爸三藩市Office返工。我由學生F1 Visa變咗一年Practical Training，之後再申請H1B工作簽證再轉Green Card，本來應該非常之順利，點知並上911，所有申請凍結要從新背景審查。我仲記得911 嗰日一早返到Office，所有人響電視機前睇住架飛機撞向世貿，之後成個三藩巿都係警察，仲有軍車巡邏。跟著嗰兩年攪到我連出境美國都唔敢，因為身份未攪掂，隨時入唔返美國境，直到2005我先攪掂張綠咭！  

Aaron同我差唔多時間搬出三藩市，佢入咗間Tech公司做Finance，所以搬咗去South Bay住，Lisa畢業後由LA搬返上嚟，2002年Aaron同Lisa結婚後買屋settle down，佢哋兩個完全係童話式愛情故事，初戀到結婚足足十年，仲要一畢業就結婚，簡直不能相信，由始至終Lisa都當佢係乖乖仔，當然，現實中Aaron響外邊食女就一直冇停過！  

我同Aaron畢業嘅時候Joey仲未畢業，不過就打算Senior Year轉去其他大學，所以佢讀完2001年Fall Semester就走咗，之後我哋就再冇聯絡，聽講佢畢咗業後就回流返咗香港。至於Addie，佢同Kevin兩個一直讀到畢業，留低響大學城住，過咗兩年就結婚生咗兩個小朋友，冇耐Kevin自己開咗間舖做攝影，專門影婚紗相，Addie結婚後冇做嘢，全職家庭主婦，一家四口過住平淡幸福家庭生活。  

最後要講下Joe，結婚後嘅佢其實一直都有問題，只係冇同人講，佢係奉女成婚，佢同Joyce根本未Ready，結果個女仲未夠一歲Joyce就突然之間留低封信就離家出走，搬咗去LA，後來先發現原來佢同佢個Ex，即係Sam，仲有聯絡，響LA又響返埋一齊，總之就係一塌糊塗，突然老婆走佬，響屋企阿爸阿媽又日哦夜哦，最後就一個人帶住個女搬咗出嚟住，好彩佢有米，請得起保母，又可以唔洗朝九晚五打工，不過就真係成個人變哂，除咗湊女，就全副精神放響我同佢Partner間公司度。  



其他人物就唔會長篇大論咁介紹，我相信好多人會問Amy同 Heather，仲有突然又出現返嘅Anita，佢哋嘅故事會響日後慢慢交代。  

新篇章就由2002年尾開始。