一個香港留學生在美國的生活: 大學篇終章

同屋企人響三藩市玩咗兩日，就趁Summer School仲未開學，我哋一齊陪阿傑飛返Vancouver。阿傑個女朋友Joanne開咗部七人車接我哋機，呢兩年阿傑同Joanne早已住埋一齊，如無意外，等大學畢業後就會結婚。阿爸阿媽早就已經當Joanne係自己人，難得又再可以一家人齊齊整整咁去玩，響Vancouver小休咗兩日，跟著開車沿住一號公路前往洛機山脈去。前後用咗三日，最後目的地係Calgary，沿途經過Kamloop，Jasper，Columbia Icefield同Banff，到咗Calgary住咗一晚我就要坐飛機去New York參加阿君嘅畢業典禮，而阿爸阿媽佢哋四個會留響Calgary多一日，之後就一齊飛去多倫多，原來小詩結婚後同佢老公搬咗去多倫多住，佢老公響大學有份教職，而小詩懷孕差不多有八個月，黃Uncle Auntie去咗陪小詩，而且阿傑有意畢業後轉去多倫多繼續升學，所以今次係順便探路。  

阿君嘅畢業典禮響禮拜日下晝，我係禮拜六晚夜機到，酒店Check in冇耐就收到阿君電話，原來Alan都到咗，我哋三個就響我酒店Lobby個Lobby見面，阿君雖然轉咗校搬離加州，不過我同阿君一直有聯絡，佢耐不耐又會飛返三藩市，至於Alan就真係有兩年冇見。當日Alan同Kim搬咗去Florida 唔夠一年就正式分手，之後Alan一直單身拍下散拖咁，而Kim就響上年畢業後返咗大馬。阿君亦都同小敏分咗手，依家都係單身。  

原本阿君同Alan 唔知小詠嘅事，除咗Joe同Aaron，我基本上冇同其他人講起，今晚可能飲多咗，我竟然由頭到尾將件事講哂出嚟，Alan：「估唔到你同小詠都分咗手。」「唔夾嘅話勉強一齊都唔會開心，依家咪幾好，一個人做乜都得。」成晚我哋都係講下大家生活近況同將來打算，阿君畢業後會返大馬接手家族生意，Alan就會返香港搵工。我哋傾到半夜，之後各自返酒店休息。  

去完阿君畢業典禮之後就同佢屋企人，Alan同幾個阿君響東岸大學同學食晚飯，食完飯到夜晚十一點坐Red Eye Flight返三藩市。落機嘅時候係禮拜一朝早九點，去Long Term Parking攞車，一個人返去三藩市間Condo多住幾晚先返入去，而呢兩日除咗繼續執屋同買多幾件傢俬同電器，我仲去咗同Joe一家食飯見面。到禮拜五晚先入返大學準備下禮拜Summer School開開，讀埋呢個暑假三堂9個Credits我就夠哂學分正式畢業。 

返到入去，間屋得返我自己一個人，放低行李冇耐電話就響，「喂，返到啦？」原來係Aaron，「啱入屋你就打嚟！」「我都估你差不多應該呢個時候返到，點呀，成兩個禮拜冇見，一行完畢業禮就唔見咗人！」「要陪屋企人吖嘛！你咪又一樣！」「我打嚟話你知，小詠上個禮拜同屋企人一齊返咗香港，好似係For good，只有佢細佬八月尾返嚟開學。」「佢有佢生活我有我忙碌，我知佢會走，唔洗話我知喎！」「我知你唔Care，不過佢走前話有啲嘢漏咗響你屋，叫我開門畀佢入嚟，你咁啱又去咗加拿大，電話又冇開，咁我咪陪佢嚟搵嘢囉，佢好似搵影帶定CD，響電視櫃不停咁搵，不過最後乜都冇攞走，咁我點都要同你單聲啦！」「知道啦，佢可能想攞返幾隻佢最鐘意嘅CD啦。」  



我當然知道小詠想摷乜，如果冇估錯，佢想搵返我哋啱啱拍拖嘅時候影落嗰批Video，可惜佢嚟遲咗，嗰批Video我已經同其他雜物一齊Pack咗箱放咗響三藩市Condo，呢批Video一直封存咗十幾年，由三藩市搬到Palo Alto，直到Palo Alto裝修車房先再重見天日。  

剩低嘅兩個半月都係響大學渡過，除咗我同Aaron，其他人唔係去咗旅行就係返咗香港，到咗八月中，完成大學最後一堂課嘅考試，我就正式搬去三藩市生活，開始人生另一篇章。