一個香港留學生在美國的生活: Anita

Steward同我相距有十幾架車，佢拖住身邊條女有講有笑咁行去出口，佢跟本唔認得我，又可能跟本冇留意我啦，話晒只係見過一次，仲要成年之前，不過佢身邊條女非常眼熟，又唔係Heather，咁係邊個呢？「仔，你朋友？仲乜望住人哋？」「哦，唔係朋友，不過好似響唔知邊度見過，可能係朋友嘅朋友！」我跟著同阿爸阿媽一齊都行去出口，Steward同個女仔響我哋前面，冇耐發現原來佢哋都係去我要去嗰間西班牙餐廳。Steward同個女仔攞咗張二人枱坐低，佢哋張枱響餐廳近大門，而我一家就坐響餐廳最入面一個比較大嘅Dining Room。  

呢間餐廳已經有三四十年歷史，係一間非常傳統嘅西班牙菜，地方唔大，裝修比較老舊，老闆娘係一個帶濃重西班牙口音嘅中年女仕，我同阿爸負責點菜，「仔，你幫阿爸揀酒啦！」「我唔識揀西班牙酒喎，不如叫返加州酒啦！」「食西班牙菜叫加州酒？唔係呀！」阿媽就話「你兩個飲少啲得唔得！」阿媽一開口，我同阿爸唔敢再出聲，我求其響紅酒類搵支中價位嘅點咗就算，阿爸乘機叉開話題「仔呀，你真係打算申請H1B唔再讀書？點解唔讀埋個Master？」「唔啦，讀咗十幾廿年書，想試下做嘢，Master幾時都可以讀。」阿媽：「你兩兄弟讀到書我哋一定供你，阿𠎀已經準備好畢業後會報PhD，不過你兩個性格唔一樣，如果你真係決定咗做事，阿爸阿媽一定支持你。」「多謝阿媽！」  

侍應送上食物，我哋一家四口一邊食一邊講日後計劃，除咗阿𠎀呢個學霸明確表示會讀到攞PhD，阿爸阿媽都打算做到明年會提早退休移民去英國，「喂，阿仔，阿媽問你今年聖誕節會唔會一齊去London呀！」「哦，好呀，睇吓Schedule先啦！」我有啲心不在焉，心入面一直諗緊Steward身邊條女係邊度見過，Steward同Heather下兩個月就結婚，好明顯Steward係背住Heather偷咗食，其實三藩市話大唔大話細唔細，好容易會碰到熟人。呢個時候，個女仔行過我哋個Dining Room去洗手間，突然間我知道個女仔係邊個！  

「你哋慢慢食，我去一去洗手間。」我見個女仔入咗去一陣，我跟住行去廁所方向。男女廁係並排響隔離，外邊有個共用洗手台，我行到去剛剛好個女仔行出嚟，佢望一望我，跟住問「Do I know you？」我聽到佢把聲，我更加肯定，「你係Anita？」「係呀，你係？」「我係阿偉，阿Joe個朋友，有幾年冇見，你幾好嗎？」「哦，幾好，我記得你啦，你仲住響大學城？」「過兩個月畢業會搬出嚟三藩市。」「我都係啱啱畢業，唔講咁多啦，男朋友等緊，我出返去先，有機會再見。」  

我連電話都冇，又點同你再見呀！望住Anita離去嘅背景，估唔到佢會同Steward一齊，Anita知唔知Steward就嚟結婚呢？