一個香港留學生在美國的生活: 畢業

轉眼到咗五月尾，阿爸阿媽早兩日到咗三藩市，本來打算叫佢哋先住響新Condo，不過阿爸堅持要自己租車揸入嚟住響我度。畢業禮係五月廿六禮拜六，佢哋禮拜四晚就開車入咗嚟，依家間屋得返我一個住，阿爸阿媽就瞓我書房。細佬因為重要返學，所以要到禮拜六一早飛，Joe會幫忙接機跟著一齊嚟我畢業禮。講真，我其實對呢啲行禮如儀嘅Ceremony冇興趣，只不過係滿足阿爸阿媽，話哂養大個仔，終於畢業了，完成一個階段。  

休息咗一日，禮拜五晚同阿爸阿媽去食扒，呢度算係有啲水準就係牛扒，我同佢哋去返平時我同Joe去開間扒房，呢幾年住響加州，我嘅藏酒有差唔多一百支，全都係加州酒，我響屋企帶咗支96年Bryant Family，算係我最好嗰幾支Cab其中之一，「阿爸，你響香港好少飲加州酒，你試吓呢支，睇吓鐘唔鐘意？」，阿媽：「你兩個唔好飲咁多，個仔等陣仲要揸｜車！」我阿媽永遠都係嚴肅說教嗰個，返而我同阿爸似朋友多啲，「放心啦，嗰仔咁大個，有分寸嘅。」今次係阿爸阿媽響我嚟咗美國之後第一次探我，以前幾年每逢放假有機會唔係我返香港就係約埋一齊去其他地方旅行，佢哋兩老對我響呢度生日嘅點點滴滴都十分有興｜趣，尤其係阿爸，佢同我一樣最有興趣係吃喝玩樂，用我阿媽嘅說話，我同阿爸都係二世祖。  

第二日，Joe一早去機接咗我細佬阿𠎀，中午前趕到入嚟，好快咁食咗晏，下晝兩點畢業禮正式開始，畢業禮響大學球場舉行，整個場地差不多有成萬人，過程不外乎就係校長呀教授同學生代表輪住上台演講，跟著發證書。由於畢業人數有成二三千人，好難會同自己認識嘅朋友坐埋一齊，我只係遠遠咁見到Aaron，而小詠就更加連影都見唔到。畢業禮完咗之後約咗Aaron一齊影相，「你唔揾小詠影下相？」「唔揾啦，有緣自然見到。不過我就見到Kerry同另外你溝過幾條女，洗唔洗幫手介紹畀Lisa認識吓呀，哈哈！」「你係咪玩嘢呀？」不過不見不見還須見，要嚟嘅總會出現，影相影到一半，Kerry就出現，仲要同Aaron合影留念，Lisa唔知係真儍定扮懵，又或者真心相信Aaron，竟然一啲懷疑都冇，仲同Kerry合影。離開大球前我再次四圍望，再冇見到小詠同佢屋企人嘅身影，呢一日過後，我就再冇見過小詠。  

夜晚我哋一家人出返去三藩市食晚飯，Joe就話要返屋企揍女。五月份三藩市天氣好好，我帶阿爸阿媽去咗Marina食Spanish Tapas，響附近一個停車場泊好車，阿爸：「三藩市都幾多冇錢人喎，一街都係靚車。」「睇吓你響邊區啦，有好多Homeless你睇唔到姐。」「嗱，對面咪泊咗㗎 Maserati Ghibli囉，睇落好似仲係香港人添。」我望一望，竟然係 Heather老公Steward！