一個香港留學生在美國的生活: 心事

世事就係咁橋，去到餐廳發現今晚張枱同上次我第一次同小詠坐張枱係同一張，我同樣坐喺同一位置，只係對面換咗個人。我同Heather坐低，Waiter攞咗Dinner menu 同 Wine list，Heather「我唔諗食乜啦，叫Pre Fixe唔洗煩，酒就你睇啦，今晚我請客，唔好叫幾千蚊一支呀，冇錢埋單㗎！」「唔洗擔心，我淨係識叫加州酒，貴極有限。」跟著我同Waiter叫咗兩個Pre Fixe，再開支96年Phelps Insignia，「Good choice！我見你飯廳有個咁大酒櫃，我估你都應該鐘意飲。」「你觀察力幾好喎！」「女人係比較敏感啲。」  

我同Heather之後間嘅談話內容不外乎係裝修同工作，Heather比我大四年，已經做咗幾年嘢「我學得你有機會都係讀返個Master，響Bay Area搵工做嘢點都好啲。其實讀Grad School最主要唔係讀書書學嘢，係建立你嘅Network，尤其去名校好似Stanford咁讀過EMBA。」Heather本身就係響Stamford攞咗個Master，同時又認識咗Steward。「我暫時冇計劃讀Grad School，啱啱apply咗一年practical training，打算響朋友屋企間公司做住嘢先，順便申請綠卡。」「咁都啱嘅，攪掂身份，留低咗先，再決定下一步點走，留學生最煩係身份問題。」「你都係international student？」「係呀，我仲揸住H1B。」「你同Steward結婚咪可以直接申請綠卡囉。」「有咁嘅打算，不過我自己份工都可以輕鬆申請到居留。」  

一路傾一路食，一支紅酒好快已經飲完，食Dessert嘅時候Heather又叫咗半支dYquem，「喂，你呢半支仲貴過我叫一支Insignia，唔好又入埋我數。」「放心啦，我先冇咁少氣。」「女人嘅心理好難講。」「乜你身邊啲女朋友係咁嘅咩？」「乜我身邊好多女咩？你幾時見過我身邊有女性朋友出現？」「咁又係喎，唔通你係基嘅？」「小姐，我邊忽似係基？」「咁你女朋友呢？冇見你提起過。」「我依家Single。」「唔似喎！」「乜有樣睇嘅咩？你咁後生都唔似就嚟結婚啦！」Heather聽到我咁講，眼神一暗「唉，你覺得太後生結婚？係嘅，依家真係好少人咁早就嫁。」「其實冇話早定遲，最後緊要係搵到自己啱嘅。」「我都唔知道。」「哈哈，我又唔清楚你嘅嘢，係我多口亂講！」 

氣氛有啲尷尬，過咗陣，Heather「下個月係婚禮。」「恭喜哂！」「Steward話唔想咁多人做大龍鳯，所以只有大家屋企人同幾個最好嘅朋參加婚禮，佢響Maui包咗成個Resort，一個可以容納幾百人嘅Resort只有我哋唔夠三十人嘅婚禮，連工作人員都多過我哋。」我冇出聲回應，我知道其實Heather係需要一個聆聽者，「我感覺佢跟本唔想人知道我哋結婚，又或者咁講，佢仲未玩夠，不過佢父母要佢早早結婚生仔。」Heather又繼續講：「佢成日四圍飛，話就話工作需要，佢以為我真係唔知佢響出邊有幾多女！」「哈哈，家家有本難諗的經。」講到激動，Heather竟然眼紅紅，我唔知講乜好，「Sorry呀，無啦啦同你講啲咁嘅嘢！」「唔緊要，講咗出嚟舒啲。」我差啲想同Heather講，其實我以前條女都畀你條仔扑過，如果有機會，我係唔介意畀返訂綠帽Steward戴。  

發洩完後Heather情緒明顯冇咁激動，「多謝你做我樹窿，今餐真係低請你食！」「哈哈，唔好客氣，過多兩個月我會正式搬出三藩市住，大家就係鄰居，話哂遠親不如近鄰吖嘛，互相幫助係應該嘅。」  



最後Heather堅持埋單，呢餐飯連兩支酒食咗成千蚊，跟著我開車送Heather返Condo攞車，之後我再返返去大學城。