一個香港留學生在美國的生活: 婚訊

Heather間Condo原來真係禮拜六日都開工，我響門口睇下，入面啲工人全部係中國人，除咗中國人之外，老番跟本唔會同你Weekend趕工，其中一個裝修工人見到我企響門口，於是問「先生你搵人？」「我係呢間屋主Heather嘅朋友，想嚟睇下做成點，我就住響樓下一層之麻。」「哦，原來係Heather小姐朋友，咁隨便參觀啦！」  

Heather間Condo比較我住間大三倍有多，仲要上下兩層，不過我睇應該已經係後期工程，隨咗未有傢俬，浴室廚房地板天花板全部都差不多完工，跟本唔係個保安墨仔講到咁誇張！「師傅，照你睇，仲有幾耐完工呀？」「哦，快啦，過多兩禮拜就做完，傢俬下禮拜到，放心啦，我地做嘢好盡責，應𠄘得你，一定趕得切婚禮前入伙。」原來Heather同佢個大滾友未婚夫要正式結婚，「係呢，我好耐冇見到佢先生，唔知佢幾時會嚟睇下間屋？咁我可以上嚟同佢打過招呼。」「裝修咁耐我淨係開頭見過佢先生，我都唔知佢幾時會出現。」我笑咗笑，跟著行去露台，唔知係咪特別有緣份，我響一出露台就聽到個裝修佬講「Heather小姐，真係啱，住響你樓下位朋友嚟咗搵你，佢啱啱行咗出露台。」  

「好耐冇見，阿偉。」「Hello Heather！」「點呀，你間屋整完未？」「整完啦，啱啱尋日先收樓，攪掂咪依家準備返入去囉，咁又見到你度仲有人開工，咪過嚟睇下囉！」「我呢度都整得七七八八，過多兩個禮拜搬埋傢俬就可以入伙。」「哈哈，我已經入咗伙，尋晚第一晚響度瞓。」「恭喜哂喎，揾日去探你新居。」「你想睇依家都可以，細細地冇你呢度咁靚。」「室雅何需大，住得舒服開心最重要。等等我同啲裝修工人講幾句交代一下先，之後先去探你新居。」  

Heather響度忙嘅時候，我就響佢個大露台欣賞北灣風景，今日天氣同尋日一樣咁好，萬里無雲，成條Golden gate Bridge盡收眼底，海上有好多風帆同遊艇。雖然大家都係望向西北方，我間Condo嘅露台同Heather嘅露台最大分別唔單只係面積，Heather嘅露台係270度景顴，我嘅只有大約120度，感覺上當然唔一樣。等咗大約十分鐘，Heather做交代完要做嘅嘢，我地一齊返落去我單位度参觀。  

「我呢個係兩房單位，隨便。」我打開大門，請Heather入去，「裝修完有埋傢俬，感覺真係唔同啲！」「你好快都整好啦！」「咦，你嘅師傅手工好好喎！邊間裝修公司？你有揾Designer？傢俬同裝修都好靚，尤其個廚房。」「哈哈，我比較重視個廚房。」「睇嚟你鐘意煮嘢食，幾時我有機會試下呀？」「住得咁近，幾時都得啦！到時請埋Steward一齊啦！」「佢成日都唔得閑，我都唔知佢幾時響度。」雖然Heather盡量扮到若無其事，不過當佢提到Steward嘅時候，好明顯佢眼神中帶著憂傷。「本來我一個人打算返大學城，不如食埋飯先，你今晚有冇約呀？」Heather諗咗幾秒，「冇約，咁就一齊食啦！」「你揀地方，我請客。」「唔好啦，我請啦，當賀你新屋入伙。」「附近有乜好食？」「你有冇去過Boulevard？」「有去過，好爆下喎，你訂到枱？」「等我打電話試試。」估唔到Heather會提議去Boulevard，我上次就係同小詠去嘅！（大家可以睇返第60章係同一間餐廳），「仲有位，六點半，要即刻去啦！」「嘩，得半個鐘趕去，咁等我開車啦！」