一個香港留學生在美國的生活: Cabo（3）

坐低之後大家互相介紹，呢兩個女仔高嗰個叫Millie，矮啲嗰大眼妹叫Doris，兩個都係19歲響Irvine讀Freshman，來自香港嘅留學生，「原來我地除咗坐同一班Shuttle之外，連來回飛機都係同一班機！」「嘩！係咪咁有緣呀！」大眼妹好興奮咁大叫！Aaron「咁咪係囉，連食飯都碰到！」大眼妹「哈哈！Sorry囉！阻住你地撐枱腳！」「吓？我同佢？」「乜佢唔係你男朋友咩？通常啲高大靚仔又有型嘅，都係基㗎啦？唔洗怕羞喎，我同Millie唔會歧視你地㗎！」聽到呢度，我塊面已經黑哂，Aaron就話「黐撚線！阿偉同我正常過你同Millie！我有女朋友㗎！佢臨時屋企有事飛咗返香港，阿偉就畀佢條女放飛機，我地book晒四個人package㗎！如果唔係我都唔洗兩個男人去旅行啦！」「吓？真係唔係基嘅？」「咁你兩個女仔去旅行唔通又係Les？」「黐線啦！我有男朋友㗎！Millie情傷，我係陪我好姊妹散心！」Millie呢個時候就話「食嘢先啦！咁多嘢講！」睇嚟佢唔多想講有關佢嘅嘢！  

我感覺上Aaron同Doris都係會唔經大腦亂噏一通嘅人，於是我轉移話題「你地食完飯有乜嘢攪呀？」「我同Millie book咗做Spa，聽日後日就未有計劃，好多Day Trip都已經Full哂，呢個Trip我地好Last Minute先Book，所以乜都玩唔到！」Aaron即刻就話：「我地聽日Book咗騎駱駝同玩ATV，你地有無興趣？」「仲邊鼠有位呀！」「我地早就買咗四人飛，啱啱好連埋你地四個！後日仲買租咗隻細帆船出海，仲有導遊帶路！」「好呀！Millie，不如一齊啦！」Millie諗咗陣「咁我地夾返份錢啦！」「唔洗啦！我地本來都冇得Cancel退錢㗎啦，依家有你地Join仲唔洗浪費！好過蝕畀佢！」就係咁，呢個trip我地多咗兩個女伴，成個旅程變得精彩好多！  

食完飯仲未夠七點，我地一齊行返去Water Park，沿途有個賣雪糕嘅小賣店，我地一人一杯Dole Whip，Aaron：「Beach Party八點先開始，你地個Spa appointment係幾點呀？」「八點半，你哋打算去個Beach Party？」「係呀，淨係禮拜二同禮拜五六夜晚先有，我哋禮拜五中午走，只有今晚有得玩！」「我都想去睇吓喎！咁等我做完Spa再過去啦！」我哋四個互相交換咗電話，再約好聽日一齊食早餐再去騎駱駝。講講下我哋行返到去我哋張沙灘椅度，「仲有時間我諗住游多陣水先！」Aaron放低電話轉頭就跳咗落去，我就問「咁你哋要唔要落水？」「費事啦！唔想成身濕晒去做Spa，我地坐響度幫你睇住啲嘢啦！」「呢度好安全，冇人偷嘢！」我跟住落埋水，一直游去泳池向海嘅盡頭，嗰度可以望住水天一色嘅太平洋，太陽已經開始落山，泳池對開個海灘有好多工作人員忙碌搭棚Setup個舞台同燈，傍邊仲有個wet bar買各色各樣嘅cocktails。當我返上岸嘅時候，Millie同Doris已經走咗，我同Aaron收拾好啲毛巾，直接去參加Beach Party。