一個香港留學生在美國的生活: Cabo（2）

整個Resort係靠住山崖起，酒店主大廈樓高十六層，背靠山崖面向大海，巴士停車入酒店大堂其實係六樓，七樓以上係酒店房，五樓以下係不同餐廳，健身房，Spa，Arcade等等，最底層直出係一個Water Park，Water Park包括有數個大泳池同一條好長唧Lazy River，而兩邊係獨立渡假屋Villa，再向前行就係水清沙幼嘅海灘。Aaron同我訂嘅就係兩房千二尺Villa，室外有個超大向海陽台，仲有個Private細池同按摩浴池，本來打算兩對Couple四個人住，點知變成我同佢兩個男人住，咁又唔怪得人地用奇怪眼光望住我地啦！  

放低行李，我同Aaron一人揀一間房，除衫換咗條游水短褲，就行去睇吓有乜好玩！我地住間villa非常近海灘，一出門就係泳池，向海行唔洗半分鐘就係海灘。雖然Spring Break係旺季，酒店Fully Booked，但係因為Resort地方夠大，完全冇人山人海嘅感覺，泳池邊嘅沙灘椅仲有一半係空嘅，我地求其揀咗兩張，放低毛巾，就直接落水。炎熱天氣冰涼池水加上碧海藍天，非常舒適捨意。游咗一陣我就上返水攤響張沙灘椅曬太陽，「喂，唔好瞓啦，不如去睇下有乜好餐廳，趁早訂位，我唔想日日食免費墨西哥嘢呀！」「咁等我著返件背心先啦！」住Villa就是係方便，轉個身入屋攞件衫都唔洗一分鐘，之後我地行返去Main Building，地下第一層已經有三間餐廳，全部都係免費，所謂免費就即係Resort Fee已經包咗，一間Buffet，一間泳池邊食Burger呀pizza呀之類，另一間係traditional Mexican。上到二樓就係比較高級餐廳，仲有兩間Fine Dine，我地Book咗聽日同後日兩餐晚飯，再Book咗後日下晝做Spa。 

「你唔好唔記得聽日十點Book咗Camel Ride，下晝玩ATV，禮拜四出海。」Aaron提醒我，今次全程都係Aaron一手包辦，不過就白白浪費咗兩個位！Confirm晒Booking我地返去泳池，我一個人攤返響張沙灘椅瞓覺，Aaron就一個人四圍游。接近五六點，人開始多，呢度要差唔多九點先天黑，一到夜晚就會有好多特別節目，列如每晚沙灘都有Party，又有個火爐區畀人燒s'mores，仲會有人彈下結他拉下小提琴，池邊嘅酒吧亦會開到半夜兩點，吧枱係響水入面，坐又好企又好你都有半個身浸緊水，好多人就鐘意響池入面飲住酒吹水。  

差不多六點Aaron終於返嚟，「你去邊去咗咁耐呀？溝女？」「哈哈！畀你講中，響wet Bar識咗幾個新朋友，佢地都係住Villa，約我地分今晚一齊玩。」「乜人嚟㗎？」「Santa Barbara 讀書，有男有女，啲女幾正！」「睇下點先啦！肚餓呀！去食嘢先啦！」「咁去Pool Side Café啦！係就行啦，六點後勁多人！」去到Café已經坐到好滿，好彩我地係最後一枱唔洗等位，呢間café好處係非常之Casual，我地得條泳褲都可以入去食飯，我地叫咗一扎生啤一個大Pizza加多一碟Buffalo Wings，兩個人就開餐，點知仲未開始食就見到今日響巴士上面嗰兩個香港女仔企響外邊排隊等位！我望咗佢地一眼，跟住繼續食，過咗一陣，佢哋竟然主動走過嚟，個大眼妹先開聲：「Hello，do you speaks Chinese？」「廣東話！」「哈哈，你好！唔知道你地記唔記得，我地今日晏晝同一架Shuttle入嚟Check-in。」Aaron有啲反應唔切，我就話「記得！你地係香港人？」「係呀！Sorry呀！我地waiting list等枱要等起碼一個鐘先有位，你地介唔介意我地一齊坐呀？」「冇問題，反正我地張係四人枱，一齊食啦！」有兩個著住Bikini嘅靚女陪食飯，何樂不為呢？