一個香港留學生在美國的生活: Cabo（4）

我哋行到去沙灘嘅時候係八點正，個大枱啱啱搭好，枱上邊樂隊正在試音，四周圍人唔算多，可能因為啱啱先夠八點，呢度應該係越夜越熱鬧，太陽又仲未落晒山，我地去咗Bar枱叫咗兩支Corona ，「我今日識嗰幾個朋友等陣會嚟，到時再介紹你識。」「有冇靚女先？冇就唔好嘥我時間！」「肯定唔會令你失望啦！」  

冇耐Aaron就一個人走咗去跳舞，佢四圍都係啲三唔識七嘅人，不過佢生得高大靚仔有型，加上佢六舊腹肌，吸引咗唔少女圍住佢跳。我就覺得啲音樂有啲太大聲，於是我攞住支啤酒，行去海邊坐低欣賞日落，雖然已經係黃昏，但係一啲都唔涼，感覺上仲係卅幾度。好快天已全黑，我平躺響沙上，望住天上繁星，耳邊響起嘅係海浪聲同遠處嘅Disco Music，唔經唔覺我竟然瞓着咗！  

「天都黑哂，你一個人瞓響度，你唔驚㗎咩？」我擘大眼睇吓，完來Millie坐喺我身邊。「嗰邊仲有一百幾十人飲酒跳舞，洗乜驚喎！」Millie笑下冇回應我，做完Spa嘅Millie身上有一股苿莉花嘅清香，佢已經換返套T恤短褲，手指腳趾啱啱搽咗鮮紅色指甲油，同對又滑又白嘅長腿成鮮明對比！大家沉默咗一陣，我就話「不如去揾返Aaron同Doris？依家幾點？我都瞓到唔知時間。」「差唔多十點啦！」「咁行啦！我都要著返件T恤，開始有啲涼。」  

我地返到Beach Bar，人實在太多，音樂又大聲，跟本搵唔到人，打電話又冇人聽，「不如等我返房攞件衫先？好近附近，行路一分鐘都唔洗。」「咁你去攞衫先啦！」「一齊行啦！」沿着小徑行返Villa，四週都冇人，「啲人去哂邊呢？」Millie好奇咁問，「一係去Party，一係去Water Park另一邊，嗰度有個Fire Pit可以食S’mores，仲有人表演音樂，如果再唔係就去咗Theatre睇戲。」「咦！我唔知另一邊有啲咁嘅嘢，不如去睇下？可能Doris同埋Aaron會喺嗰度！」「好呀！喂，到咗我住間Villa，你入唔入嚟啊？」「嘩！好正喎！我同Doris係住間普通房，不過十二樓有無敵海景！」「咁入嚟參觀下啦！我攞件T恤就行得！「咁大間屋得你同Aaron兩個人住！」「本來四個吖嘛！都話畀人放飛機啦！唔好提啦！去Fire Pit啦！」  

我住間Villa響Water Park右邊，個Fire Pit響左邊，我地要穿過九曲十三灣嘅水道同泳池先去到，行到一半已經聽到結他聲，不過天黑又冇清楚指示，我地行咗去好多倔頭路，結果行咗差唔多十五分鐘先去到。一如所料，嗰度已經聚集咗好多人，原來除咗個好大嘅火爐之外，仲有三個唔同大細嘅按摩池，當然唔少得嘅係一個Full Bar！「你想飲啲乜？我幫你Order？」「Pina Colada。」於是我同個Bartender講「Two order Pina Colada，one virgin one regular please。」Millie：「Sorry make both regular！」我望著Millie:「你唔係未夠21咩？可以飲酒？」「乜你唔知Mexico合法飲酒係18歲咩？我好多同學嚟Mexico玩都係為咗飲酒咋！」「咁我真係唔知喎！又學到嘢！」  



酒店除咗包免費酒水，仲有免費S’mores，我攞咗竹籤，crackers，朱古力同綿花糖，坐響個火爐前慢慢燒，個火爐係用真柴火，空氣中瀰漫著淡淡嘅木香，Millie好安靜咁坐響我身邊，雖然我同佢認識咗唔夠廿四小時，感覺就好似拍咗咗好耐嘅男女朋友，「棉花糖差唔多啦，在燒就燶㗎喇！」我攞咗佢手上嗰串棉花糖，再幫佢用塊Cracker同朱古力夾好，「你都幾體貼個喎，你女朋友一定好幸福！」「我仲係單身喎！你有冇好介紹」「又話你同Aaron你女朋友放飛機，所以先得返你哋兩個一齊去旅行？」「Aaron嗰個就正牌女朋友，我嗰個只係女性朋友，一齊去旅行去玩，唔係我正式嘅女朋友！」「咁即係炮友啦！哈哈！」「你可以咁講嘅！」「不如去浸下按摩池吖！」「仲未搵到Aaron同Doris喎！」「Doris對你朋友好似好有興趣，小心Doris溶咗佢！」「咁你放心，最後唔知係邊個溶咗邊個！」