一個香港留學生在美國的生活: Cabo（1）

禮拜二一早我離開Joe屋企直接去三藩市國際機場，停好架車響Long Term parking再去櫃檯Check-in，三藩市去Cabo係冇直航嘅，要先飛LA再轉機，全程大約五個幾鐘。Check-in完食早餐，食到一半终於見到Aaron「有冇遲啲呀？仲有唔夠一個鐘就上機。」「我咪到咗囉！唔洗咁急喎！」「Miss咗connecting flight 就大鑊啦！」「咁你仲食？行啦！」我匆匆忙忙飲埋杯咖啡，拉住個手提行李直衝去登機閘口。  

我同Aaron並冇坐埋一齊，最初買咗四個人嘅Package，所以係兩個兩個咁坐，我地買嘅係頭等，三藩市飛LA同Cabo 係短程內陸機，坐位唔多，頭等其實只係前面比較大啲十六個位，四行左右各兩張凳，我同Aaron分別坐左手邊第一同第二行，隔離就係空位，由頭到尾都冇人坐落嚟，難得清淨，我全程機由頭瞓到落機。  

Cabo全名係Cabo San Lucas，響Baja California Peninsula最南端，係墨西哥非常有名嘅渡假勝地，亦係Spring Break時候最多大學生會去嘅地方。我地到達Cabo International Airport係下晝兩點，天氣非常好，天朗氣清，氣溫大約卅度左右，不過海風陣陣，十分舒服！我同Aaron攞咗行李就直接去巴士站，我地一早買咗Shuttle Bus車票直接去我地住嘅Resort。  

響巴士站已經發現四週圍都係年輕人又或者係大學生，絕大部分應該係嚟自美國，亦有歐洲人，三五成群，有好多女仔著住Bra Top短褲，甚至已經著住Bikini，其中我仲見到亞洲面孔，睇打扮應該係香港人。我同Aaron兩個人企埋一齊，有人投以異樣眼光，希望唔會畀人誤會我同Aaron係一對啦！  

上到巴士，我同Aaron坐響車頭最後排，我一坐低就發覺有幾個女仔時不時回頭望著我同Aaron，平心而論，Aaron係高大陽光靚仔，非常搶眼，自問我同佢相比係差咗啲！班女仔好明顯係望緊Aaron，我仲隱約聽到有人用廣東話講「個男仔似唔似郭富城呀？不過佢高大過郭富城好多，我估佢有六尺！」「唔好咁大聲啦！人地似係香港人，識聽㗎！」「怕乜喎！你睇，佢隔離個男仔都好cute喎！你估佢兩個係咪基㗎呢？」「你理得人吖！響美國呢啲嘢好平常姐，大驚小怪！」我聽到呢度差啲噴出嚟！Aaron就帶住耳機聽緊歌，好快架巴士開離機場，我就再冇聽嗰兩個女仔講嘢。  



巴士沿住海邊高速公路行，窗外係一望無際嘅太平洋，車程太約三十分鐘便到達Resort。呢類渡假區嘅Resort 一般都差唔多，一個價錢包食包住包用所有設施同海灘，我同Aaron Check-in之後拖住行李準備返房，點知一轉身，又見到嗰兩個香港女仔迎面走過嚟！Aaron一邊行一邊睇Resort Guide，完全冇留意兩條女，而我終於可以正面睇清楚，竟然質素唔差喎，左邊比較高嗰個應該有五尺七八，身體材高佻修長，五官清秀，一件短袖露臍T-Shirt加短褲，雖然比唔上Amy小詠，不過絕對靚過Joey同Addie。佢身邊嗰個比佢矮少少，目測都起碼五尺五六，女仔嚟講算好高，不過呢條女對眼超大，仲要係水汪汪嗰隻，皮膚白裹透紅，一件白色Bra Top加件背心，睇到我細佬有啲反應！當我地擦身經過嗰一刻，呢條女竟然望住我同Aaron畀咗個陰濕笑容，我估佢真係以為我同Aaron係情侶關係！