一個香港留學生在美國的生活: Haley

最後一個學期放Spring Break前一個禮拜收到Joe嘅電話「Joyce尋晚生咗啦，係女，7lb2，已經出咗院返咗屋企，依家坐緊月，其他人就唔得㗎啦，不過如果你想都可以過嚟探我嘅！」「恭喜哂！你仲住響你阿爸阿媽屋企？」「新屋仲裝修緊，要到六月先可以搬入去住。」「你最後決定搬去邊區？」「Palo Alto，校區好，樓價又穩，如果你要買屋，呢區真係唔錯。」「唔買住啦，啱啱先喺三藩市買咗個Condo，而家仲裝修緊。」「三藩市間Condo可以用嚟收租，要買自住更係買獨立屋好啲啦！」「如果真係買屋，我諗我要睇耐啲諗清楚先買，不如你幫我留意吓有冇啲筍盤，有就通知我。」「咁你諗住幾時出嚟見吓面呀？」「呢個禮拜考緊試喎，下個禮拜又已經Spring break，我會去Mexico喎！」「你同邊個去呀？又溝咗新女？」「得我同Aaron兩個人去喳！Lisa屋企有事，要返香港兩個禮拜，我反正又冇嘢做，咪陪佢去玩囉！」「兩個男人有乜好玩呀！」「我地去Cabo一個resort，瞓覺游水食嘢！去四日三夜就返，一係我早一日出三藩市探你先？」「咁你邊日飛？」「我禮拜二早機飛LA再轉機到Cabo。禮拜五中午機返。」「咁你禮拜一出嚟住響我度一晚，第二日一早直接去機場。」「咁都得，就禮拜一見！」  

Aaron本來Spring Break Book 咗個Short Trip同Lisa ，我同埋Amy－齊去墨西哥玩，係嘅，Amy背住佢男朋友偷偷同我去旅行，點知Lisa突然間屋企有長輩入院，情況好似唔多好，要Lisa盡快訂機票返香港，而Amy男朋友又突然提早返嚟三藩市，結果剩低我地兩個麻甩佬去旅行！我提議過Cancel個Trip，點知Aaron訂咗最Cheap個隻package係冇得refund，reschedule又要響一年內出發，咁就唯有兩條友去啦！蝕兩張機票，好過蝕成個Package連酒店！  

禮拜一中午食完飯先開車出三藩市，阿Joe父母屋企響South Bay Los Alto，距離三藩市差不多四十公里，平時開車大約個半小時，今次去Joe屋企，加上塞車要揸多成兩個鐘先到。正確嚟講， Joe父母間屋所在嘅地區係叫Los Alto Hills，係一個非常之細又非常之富貴嘅小鎭，呢間屋佔地面積超過三畝，我以前嚟都係響門口附近徘徊，冇正式參觀過。今次係我第一次響呢間屋作客仲要住一晚。我對呢間大屋嘅記憶只係門口入花園嘅大鐵閘同超大噴水池，入到去先發現呢間屋有幾豪，成間屋差不多有九千尺，八間房加唔知幾多個廁所，室內有Gym有Home Theatre，室外有游泳池有網球場，仲有個放咗八部車嘅Garage，美國真係一個極度貧富懸殊嘅地方。  

Backyard除咗個泳池同網球場外，仲有一間獨立嘅Guest House，今晚我就住響呢間千二尺嘅「客房」。放低行李就同Joe去同佢阿爸阿媽打招呼，客套一輪，之後就去探Joyce兩母女。計起嚟我已經一年有多冇見過Joyce，生完B嘅Joyce肥咗兩個碼，我差啲認唔到佢，「你夠唔夠膽抱BB呀？」Joyce抱住個女坐響張梳化度，「我咁大個人第一次抱BB咋！」我好小心從Joyce手上接過B女，「佢叫乜嘢名呀？」「Haley，中文名係莃賢。」估唔到我抱上手Haley冇喊，兩個禮拜大嘅BB仲係要瞓好多，我抱住一陣佢已經瞓咗覺，做唔大滾友Joe廿三歲就做老豆，好彩佢屋企有米，如果唔係我估佢都幾慘，正所謂貧賤夫妻百事哀！  

食晚飯嘅時候只有Joe阿爸阿媽同我地一齊出去食，Joyce啱啱生完仲坐緊月，Joe仲特登請咗個陪月阿姨照顧，專人煮食，真係少個崩都唔得！