一個香港留學生在美國的生活: Alcatraz

呢一餐飯，食得非常愉快，我同Amy好似多年冇見嘅朋友，談天說地，講下學校，講下理想，又講下畢業後想做嘅嘢，唯一冇講，就係大家嘅另一半！  

「你聽日有乜嘢做？幾時返入去？」Amy搖住手中杯紅酒問我，「我會響三藩市玩多幾日，反正Summer School又未開始！Joe呢幾日陪佢阿爸阿媽，好似有個Short Family Trip，佢間屋比我住哂！」「咁不如聽日陪我去玩？我想去Alcatraz，之後去Union Square Shopping，跟住再揾間好餐廳食好嘢，你有冇意見？」「你大小姐都安排好晒，我仲點會有意見？我聽日接你啦！你冇搬到？」「冇呀，住同一個Apartment，你仲記得點嚟？」「記得！送過你返屋企，點會唔記得！」Amy聽到我咁話，笑得好開心，埋咗單之後，佢就開車送我返Joe屋企！  

我同Amy唔係初相識，佢知道我有小詠，我又知道佢有男朋友，大家故意唔提各自嘅另一半同感情生活，其實已經係一個提示，留一個空間比大家。當然我肯定Amy唔知道我同小詠之間出現問題，但同時我都唔肯定佢同男朋友嘅關係，一切隨緣吧！我冇再多諗，呢晚我好好瞓，一覺瞓到天光。  

第二日朝早11點左右，我開車去到Amy屋企樓下，我同Amy今日都係著輕便運動服同波鞋，上車之後我哋直接去三藩市漁人碼頭，拍好車已經差唔多中午12點，我哋就響附近一間食海鮮嘅意大利餐廳好快咁食咗個晏，之後就趕1:00班船去Alcatraz。  

大約三四十年前Alcatraz仲係一座守衛森嚴嘅監獄，後來美國政府在操作監獄關閉，仲改建成為一個旅遊區。有好多文學同埋電影都係用呢一個監獄做背景，其中比較出名嘅就係響1996年由Nicholas Cage同Sean Connery主演嘅電影The Rock，我同Amy就是係講到呢套戲先提意去Alcatraz玩！  



由於今日唔係假期，除咗遊客之外，碼頭唔算多人。我哋坐嘅係雙層渡輪，船程大約15-20分鐘。雖然係六月份，三藩市天氣都唔係太熱，加上微微嘅海風，企響船上邊好舒服。我哋兩個上咗去船嘅上層，Amy企響船頭望住個海，海風吹起佢一頭長髮，佢個背影好吸引，嗰一刻我真係有啲衝動想上前攬住佢！我行咗去佢隔離「怕唔怕大風凍啊？凍就落返下層。」「唔凍吖！我就係想吹下海風睇吓個大海，你睇吓前邊，Alcatraz真係一舊大石嚟㗎喎！」「係呀！舊石上面連水都冇，所以起咗個監獄，如果唔運水食物上去，根本冇人可以生存！」我同Amy講解我所知嘅資料，講兩講，好快隻船已經埋岸，上岸嘅時候，我申手扶咗Amy一下，Amy十指纖細軟若無骨，忍唔住想一直拖落去，可惜一上到岸佢好自然咁抽翻隻手走！  

碼頭傍就係Information Center，有Park Ranger講解島上嘅歷史，亦有Self Guided Tour，我同Amy一人一個Audio Headset，沿山路行上監獄上樓，一邊聽一邊參觀，整個Tour大約一個多小時，到四點左右結束，啱啱好可以坐四點十五分班船返三藩市漁人碼頭！「行快啲啦！要趕船呀！你又話想Shopping完先食飯！下班船要到五點，出到去乜都閂晒啦！」Amy坐喺路邊石壆，「好攰吖！又熱又曬！俾我唞吓先啦！」「咁樣天黑都返唔到去！呢度死過咁多人，你睇吓你後面，頭先個Audio話好似係以前監獄嘅停屍房！」「喂！你做乜嚇人！」Amy成個嚇到跳起身！「咁你休息夠未呀！仲有十分鐘開船啦！」「我冇力啦！不如你孭我啦？」「你咁重點孭呀？」「你得嘅！」跟著Amy真係走去我後面好似樹熊咁爬響我背脊！嗰一下我真係嚇咗一跳！攬實我之後，Amy放咗個頭響我膊頭上面，響我耳仔邊講「行啦！趕唔切啦！」於是我就孭住Amy慢慢咁行返落碼頭，坐船返三藩市。