一個香港留學生在美國的生活: 再遇

同Aaron收線之後，沖涼換衫，跟住就出門口搵嘢食，話晒Joe屋企除咗公仔麵之外冇其他可以食嘅嘢！揸車去返Oakland唐人街，拍好車之後漫無目的咁喺街上面行，由於已經過咗食晏時間，有好多餐廳都已經閂左門，除咗有一兩間港式茶餐廳開門做下午茶生意，於是我隨便揀咗間唔算太多人嘅入去，搵咗張響角落頭嘅細枱，叫咗個下午茶套餐一個人慢慢食，食咗一半，我竟然見到Joe個同學Sam入咗嚟，由於我坐喺角落頭，佢跟本見我唔到，佢拖住左個女仔坐低，嗰個女仔又唔係Joyce，唔同佢同Joyce分咗手？還是佢已經發現咗Joyce同阿Joe之間嘅關係？由於Sam佢係背住我坐， 所以成餐飯佢都冇發現到我喺度，我留意到佢同呢個女仔應該係男女朋友關係，如果唔係偷食，就肯定同Joyce已經分咗手！睇來我要同Joe求證一下。  

我等到佢走咗之後我先埋單走人，一個人響唐人街行吓行吓，又行返到我第一次喺唐人街食越南粉嗰間餐廳，突然間諗起Amy同Nancy，唔知佢哋響邊呢？Nancy已經好耐冇見，Amy耐唔中有通電話，響Joe嘅朋友聚會都有見過幾次，聽講佢已經拍緊拖添！男友係大學同學，都係香港人，不過唔係Joe班Friend。  

行咗陣，差唔多晚飯時間，街上人流開始多，我想靜啲，於是決定離開，不過又唔想返阿Joe屋企，本來想出三藩市，不過放工時間非常塞車，出到去乜都閂晒門！最後選擇去做Gym，反正附近最近間Gym由Joe屋企行路都係十五分鐘！返到屋企換件衫孭個背囊就可以出發！  

呢一間Gym同我平時去開嗰間係同一個集團，同一張會員卡就可以入去，呢個鐘數大部份人都去咗食飯，所以冇乜人同我爭住用啲設施，我用跑步機跑左一輪，跟住就開始操器械，我帶住耳機一邊練一邊聽歌，當我做到一半嘅時候，突然間有人喺我耳邊叫我個名「阿偉？」我轉頭一望，竟然係Amy！「Amy？咁啱嘅？」「係囉！呢個時候響呢度見到你！Joe呢？你地唔係一雙一對㗎咩？」「唔好講到我地咁基好唔好？你又一個人？」「係呀！我啱啱到，諗住跑完步先去食飯！」「吓？咁減唔到肥㗎！」「乜我好肥咩？」「咁就咁睇又睇唔到你有幾肥！你咁識着衫少少肥睇唔到㗎哈哈！」「你同Joe把口都係一樣咁衰！唔同你講住，跑步先！拜！」Amy絕對係我認識嘅女性朋友中最索嘅一個，無論身材樣貌性格都係一流！望住佢著住套緊身運動服，睇到我細佬扯晒旗！  

當我做完運動之後，正打算行去更衣室沖涼換衫走人，又咁啱得咁橋又響更衣室門口碰到Amy「咦！又咁啱呀！我正準備換衫走人！」「係喎，咁啱嘅？咁你食咗飯未呀？未食不如等埋我換完衫出嚟一齊去食飯啦？」Amy主動約我！「好啊！反正我一個人，不過我冇揸車喎，要返屋企攞車先，會唔會太晏呀？」「我有揸車，今晚我車你啦！」「咁等陣響大門見啦！」  



男人沖涼換衫點都比女人快，我一個人企響正門，等咗十五分鐘Amy先出現。換咗衫嘅Amy又比人另一種唔同嘅感覺，修長雙腿加上扎起嘅一頭長髮，Model一樣身材高挑，，加上混血兒獨有嘅輪廓分明嘅五官，靚到呢，忙到我眼鯨鯨「喂！儍咗呀！咁樣望住人！」「吖！Sorry！諗緊嘢！唔為意你出咗嚟！好啦好啦，去邊度食？八點幾啦，好肚餓呀！」化解呢啲尷尬場面，最好就係改變話題！「近近地San Francisco Downtown啦！有間細細間French Bistro你應該未去過，位置十分隱閉唔熟路一定搵唔到！」於是我哋兩個一齊去攞車， Amy仲係揸緊佢之前嗰架Miata，今晚係Amy揸車，我好自然咁坐響隔離個位，沿著Bay Bridge向三藩飛馳，過咗放工peak hour，交通暢順好多，唔洗十五分鐘已經入到Downtown，泊咗車之後Amy帶我左穿又拐走入咗一條隱藏響兩楝大廈中間嘅一條細街，成條街都係細細間嘅酒吧食肆，非常熱鬧，我同Amy就入咗間法國餐廳食飯。