一個香港留學生在美國的生活: 轉變

回程嘅時候，我地兩個同樣企響上層船頭，遙望三藩市北岸，大家都靜靜咁欣賞風景。剛剛我孭住Amy落山嘅一段路，係我地之間最親密嘅接觸，如果話你聽我冇感覺就肯定呃你！雖然我唔知點解Amy會咁做，係佢感情出問題，還是佢知道我同小詠關係破裂？不過呢啲都唔再重要，重要嘅係我心態嘅轉變，小詠響我心目中已經唔係以前嘅小詠，小詠嘅背叛，令到我對我哋之間嘅關係完全死心，我知道我同小詠我唔會回復到以前咁嘅關係，呢兩日響Joe屋企一直考慮直接分手定係嘗試修補呢段關係，我一直都揸唔定主意，自從出事之後我同小詠冇講個電話，不過就算面對面仲有咩好講？我覺得我自己係逃避唔想面對，又可能我內心係唔想分手但係理智話俾我聽呢段關係已經玩完，無論點都好，呢刻我同Amy一齊，我覺得開心快樂，身心放鬆，咁已經好足夠。  

既然已經放開左，同Amy一齊就冇咁多顧忌！開心咗呢幾日先，過兩日返屋企先再處理同小詠嘅關係。上到岸我哋第一時間跑去攞車，因為大部份嘅舖頭都閂六點！漁人碼頭去Union Square只係五分鐘，其實行路都到，不過我地最後都係開車，到咗Union Square 我地仲有一個幾鐘先到六點，仲有時候慢慢Shop！Amy同小詠其中一個分別係Shopping，小詠Shopping比較隨便，唔會特別追求名牌，Amy就唔一樣，對Fashion同Brand Name都非常有研究，我其實都係少數非常鐘意Shopping嘅男人，同Amy去Shopping對我嚟講係一件十分愉快嘅事情，Union Square又係三藩市名店集中地，我同Amy逛完一間又一間，行到六點大部分店都閂門，我地兩個買到一袋二袋滿載而歸！  

「買咗咁多嘢，仲出唔出去食飯？我可以車你返屋企先喎！」我問Amy，「食飯先啦！行咗成日，好餓呀！去邊度食好呀？」「我地著住運動衫都去唔到靚餐廳、你唔介意求期揾間茶餐食胞算啦！」「好呀！咁快啲行啦！餓死啦！」  

附近最近茶餐響唐人街，開車三分鐘，行路十分鐘，非常之近。我地泊咗㗎車響唐人街一個地下停車場，沿住Washington Street行，隨便揾咗間茶記就入去食，唐人街餐館大多數都污糟邋遢，呢間老字號更加恐怖，厠所仲要行條又窄又斜嘅木樓梯落地牢，食物水準又只係一般，我地好快食完就走身走人。出到餐廳門口，天已經黑齊，入夜唐人街十分陰冷，我地要沿著斜路行返落去停車場，路邊開始見到有露宿者同𢴇紙皮嘅老人，Amy好自然咁捉住我隻手，行咗兩步到過馬路，我索性拖住佢，Amy冇反應，於是我一直拖住佢去到停車場畀錢先放開佢。  

上車之後大家又好似若無其事咁傾謁，六月三藩市夜晚天氣唔算太凍，今日天空冇雲，打開天窗望上去仲可以見到點點繁星，同Amy一齊感覺就係舒服自在，冇壓力，時間亦過得快，轉眼已經到咗佢住個Apartmemt，打開車尾箱先發覺十袋中有八袋都係Amy嘅戰利品！「咁多點攞呀？」「我幫你啦！又唔係第一次做你咕喱！」回想返第一次上Amy屋企，竟然有仲心動感覺！