一個香港留學生在美國的生活: 真相(1)

我地一家留響東京直到一月中，工作狂嘅阿媽都少有咁向學校請假，而我同細佬都冇返香港，而係直接返溫哥華同三藩市。  

2000年Spring Semester開學日係一月卅一，我響開學前一個禮拜已經返到，大學第三年我只打算讀四堂12個units，不過全部都係Core Course。其中有兩堂同Aaron一齊上，全部四堂都係早堂，最早係七點半嘅Portfolio Management，逢禮拜二四，搬咗屋之後返學遠咗好多，唔塞車都要三十分鐘，我估我一早六點半就要出門口先唔會遲到，而其他幾堂都係早上九到十二點咁上下時間，所以食完晏仲有成個下晝可以溫書做功課同兼職教琴。順帶一提，今年十月我仲打算報考小提琴八級，算係了結自己一個心願。  

小詠同樣選修四堂Marketing Core classes，不過佢再加上一堂Geology 嘅General Education，同以往一樣，最早一堂都係中午一點，最夜都係八點半放，由於我miss咗幾個Summer 同Winter sessions，我相比小詠少咗成廿個units，換句話說，小詠起碼比我早一個學期畢業！雖然距離畢業仲有一年半，不過睇嚟今個暑假要讀多兩堂，追返上啲進度！ 

「點解我總係覺得你見我多過見小詠嘅？你唔係愛上咗我？」「屌你咩！你今日食咗屎呀？食飯啦，咁多嘢講！」開學第一個禮拜，上完堂Banking之後同Aaron響Student Union食Lunch。「你知唔知道小詠今年又有兩堂marketing同個印尼仔同班？」我沉默咗幾秒「你唔講，我又點會知呢？」「你唔擔心咩？」「咁我可以點呢？同佢炒鑊勁嘅？定係唔俾佢讀，叫佢轉Major ？」「咁又唔係咁講，不過我睇小詠都應該知分寸嘅，佢讀書咁勤力就好好似呢個Winter Session，得佢一個人響度讀書，我淨係知道小玲同阿漢入過嚟一次，小詠又出過去一次，係咁大把，其他時間都留喺度讀書！」「淨係講我，你同Lisa又點呀？」「我哋去咗南加州玩咗兩個禮拜，佢已經儲夠錢，打算今年九月就會轉校過嚟美國讀埋最後一年，佢會報三藩市同LA嘅大學，睇吓邊度收咗邊度讀囉！起碼近啲我同佢見面都方便啲啦！畢業後就試吓可唔可以搵到工留低！」「嘩咁你同Joey點算？」「我同佢係普通朋友，得閒打下友誼波，佢又唔係唔知我有女友，有乜所謂！話時話，Joey真係幾好屌，好心你唔好咁死板啦！難得人哋對你有意思，食得唔好嘥！」「我先冇你咁濫呀！食完就行啦，我要去圖書館搵資料呀！」 

事實上，呢個學期大家都各有各忙，我真係見Aaron多過見小詠，平時放學返到屋企，都只係得我一個，阿浩大部份時間都唔黐家，身邊嘅女朋友不停咁轉，而我好多時都係一個人喺屋企自己食飯，到咗夜晚九點幾十點小詠先返到屋企，唯一會見面嗰個零兩個鐘，都係傾吓閒計，基本上冇乜肉體上嘅交流！試過有幾次我想同佢做愛，佢都會用諸多藉口推三推四，到咗禮拜五六日，我哋終於有機會扑嘢，但比我嘅感覺，就好似交功課咁，完全冇咗當初拍拖嘅時候嗰種激情。  



日子一日一日咁過去，到咗Spring Break嘅時候，阿君返咗嚟幾日，佢同我講佢同小敏已經分咗手，而佢下年五月就會畢業，佢希望我可以過去參加佢嘅畢業禮，我當年二話不說就答應咗佢啦！而我呢，最快都要2001年聖誕先可以畢業。  

阿君返嚟嗰幾日我同小詠陪住佢四圍玩，小詠啱啱過咗佢21歲生日，本來打算阿君嚟到嘅時候，約埋小玲阿漢齊去Las Vegas玩返幾日，可惜嘅係我哋放假嘅日子同小玲佢哋係唔一樣嘅，所以去唔成，最後同小玲約好咗八月份一齊去Napa參觀酒廠，呢個係一個我一直都好想去嘅地方，但係又因為唔夠年齡而去唔成！只不過阿君就同唔到我地一齊玩啦！