一個香港留學生在美國的生活: 真相(2)

阿君響我度住咗一個禮拜左右，就要返返去東岸返學，佢個來回飛機都係停三藩市，其實響我地住呢個城市都有機場，主要係內陸航班，佢飛Boston係可以響呢度上機，不過佢話飛三藩市班機比較多價錢又平啲，所以寧願飛三藩市喎！咁唯有我開車車佢出機場啦！  

禮拜六一早送完機之後，我就約咗阿Joe飲茶，我已經好耐冇同呢個老友單獨食餐飯，其實正確來講，係Joe約我嘅，我哋約好咗響Richmond District一間好有名嘅港式茶樓見面，呢間茶樓勁多人，禮拜六唔夠十二點已經人山人海，好彩Joe識人又一早到咗攞咗枱，如果唔係，起碼要等個幾鐘先有位坐！  

「飲乜嘢茶啊？」Joe問我「壽眉啦！」 佢跟住同部長落單，再叫咗三四籠點心，其實兩個人飲茶真係冇乜嘢好食，叫得多又食唔晒，叫得少又冇乜選擇，我估佢搵我黎飲茶，都係悶得滯想搵我吹水多！  

「點啊，咁得閒搵我飲茶，唔使陪你啲女朋友咩？」「邊得嚟咁多女朋友呀！我今個學期就畢業啦！我諗住放幾個月假，過埋聖誕就跟住就要幫阿爸手打理物業，你睇吓畢業有冇興趣到同我拍住檔一齊搵食啦！」「我仲有成年先畢業，睇吓點先啦！我仲係學生身份，到時仲要搞居留，好多嘢都係未知之數！」「居留就易話為啦！有錢嘅，你投資移民又得，搵條女搞結婚又得，最怕就係你冇錢，要搵公司sponsor你張綠卡，咁就慘過做奴隸囉！」「到時先算啦！而家最緊要係畢到業，學校功課多到抽筋，今個學期得個四堂都做到我死下死下！」「唔好淨係掛住功課，有冇陪下小詠咁呀？好耐冇見你帶伯出嚟三藩市玩啦喎！」「weekend忙吖嘛！佢讀Marketing又鬼死咁多project！」「你自己睇路啦！男女關係睇少眼好易出事！」「無啦啦做咩講啲咁嘅嘢嘅？你係咪知道知我唔知嘅嘢？」「即係咁，我呢，就響出邊聽到啲流言蜚語，不過講到明係流言，聽咗就算，我覺得係啲人口賤，響出邊亂咁發噏風！」「你究竟係出面聽到啲咩野？」「其實係阿漢話我聽嘅，不過我都搵我身邊朋友查證過，阿漢啲料係真嘅！」「屌你！講嚟講去都未講到正題！」「冷靜啲，其實搵你出嚟，就係想話你知我收到啲咩風，叫你小心啲姐！」「我等緊你講。」 「你仲記唔記得小詠啱啱嚟讀書，有條友叫Chris？」我諗咗陣，「好似係有錢仔，同小詠同過班。」「唔，條友最近成日吹，話佢響S大有條女，好好屌。吹到似層層，仲話上年暑假送上門比佢屌。阿漢同條友係同學，最初唔為意，後來諗諗下，發覺越講越似小詠，話晒以前佢抽過小詠水…」「吓？抽過水？」「Oh Shit！衰多口！唔記得你唔知道添！」「究竟發生過乜嘢事？」「其實我唔在場，我只係聽聞有件咁嘅事，你等阿漢話你知啦！」（如果唔記得，可以睇返113章，唱K）  

嗰一刻，我完全沉默左落嚟，我唔想相信Joe講嘅嘢，但係又唔到我唔相信，舊年嘅暑假，啱啱好係我返咗香港，再聯想到我搬屋嘅時候搵到用過嘅包裝袋，一切都係咁吻合！  



「阿漢同小玲響聖誕嘅時候入過去探小詠，佢睇落一切都正常，只不過過咗兩個禮拜，阿漢就發現小詠出咗三藩市但係又冇搵小玲，阿漢話佢係開緊車嘅時候響Marina附近遠遠見到佢，好似同兩個男嘅一齊，不過太遠又開緊車，所以唔係百份百肯定，上個禮拜我同佢食飯佢同我講嘅，小玲完全唔知情。我見事態嚴重，再搵人查證，條Chris真係咁樣同人吹！」  

我完全無言，坐咗響度，腦海中一片空白，完全比唔到反應，Joe開始有啲擔心「喂！流言，唔一定係真，唉！兄弟，唔係個個好似你咁，唔偷食！依家男女關係咁開放，Blah Blah Blah…」我其實已經聽唔到佢噏乜春，我只係想盡快返屋企，攪清楚發生乜事！