一個香港留學生在美國的生活: 遺產

今次返香港嘅主要目的，就係處理婆婆留低嘅遺產同埋爺爺留俾我嘅兩個物業。由細到大我同細佬都唔需要為錢擔心，屋企供應物質太豐富，我呢一代成長於八九十年代嘅香港人係幸福嘅，社會富裕，經濟起飛，真係要乜有乜，雖然唔係大富大貴，但衣食無憂，屋企有車有樓有菲傭，所以我從來冇諗過要搵錢養家，更加冇諗住分家產。  

跟住嗰幾日，我同阿爸阿媽都係去律師樓啊銀行啊，做一啲轉名開戶同埋買賣嘅手續，婆婆走咗之後，留低咗一層樓，現金同一啲買咗幾廿年嘅股票，層樓就指名留俾阿媽，現金股票就分成一半，一半由我阿媽同其他親戚分，另一半就分比我同阿傑。其實我仲有啲姨媽舅父，不過一早移晒民，過去咁多年少有聯絡，婆婆一直係阿爸阿媽照顧，！  

婆婆留低畀我同阿傑嘅遺產唔算多，不過亦足夠我一段長時間生活無憂。廿一歲嘅我，由細到大都係唔憂柴唔憂米，對於突然多咗咁多錢，真係有啲不知所措。  

「仔，你已經大個仔，財政獨立，你要學識點樣理財，過兩日，我哋再張爺爺留畀你嗰兩個物業轉埋畀你啦！」「其實冇咁嘅需要喎！不如留返畀你同阿媽打理啦！我又唔係冇錢洗！」「遲早都係你嘅，不如早啲畀你，過幾年等你細佬大學畢業，阿爸阿媽都會退休，跟著會搬去英國，香港嘅嘢會賣晒㗎啦！」「阿爸你應該仲有十年先退休喎！」「時代唔同，香港響度變緊，不如早啲退休，享受下生活！」「咁不如你地幫我賣咗層樓，keep住啲錢，我有需要先滙畀我啦！」「如果你唔打算返香港，賣咗佢都好嘅！不過唔係一時三刻可以賣就賣，如果係咁，不如你返美國先，賣咗我轉啲錢畀你啦！你存起佢又好，投資又好，記得謹慎理財，未雨綢繆，唔好亂咁洗錢，你由細到大都好有分寸，阿爸阿媽其實好放心！」  

最後都係決定先轉名過戶，再委托律師進行買賣。律師都係阿爸嘅同學，到辨理轉名手續嘅時候先知道，原來唔係兩層收租物業，係兩楝樓！兩楝響西營盤四五層高嘅大廈，一楝係商住兩用，另一楝係寫字樓，都係五六十年嘅舊樓，兩棟樓估值過億，我真係嚇咗一跳！其實所有爺爺留底嘅物業仲響嫲嫲名下，嫲嫲從來唔理呢啲嘢，老來從子，過幾年就跟咗阿爸阿媽一齊去咗英國安享晚年。 



賣樓套現係正確嘅，最後兩楝物業響2002中賣出，全數滙到美國，正好逃過03年沙士一疫，而我響畢業之後，用呢啲資金同Joe一齊投資房地產生意，亦成功申請入籍，總算係生活無憂，不過呢啲係題外話啦！  

餘下幾個禮拜，我地一家去咗旅行，2000年嘅新年我地去咗日本渡過！阿傑冇返香港，佢直接由溫哥華飛東京同我地滙合，呢兩個禮拜我地都響日本過，除咗倫敦，東京應該係我地一家去得最多嘅城市，基本上我地係真正渡假而唔係旅遊，每次去我地都係住響阿爸一個朋友響東京嘅屋，間屋就響新宿車站附近，平時冇人住，於是就成為我地響東京嘅落腳點。  

阿爸響東京有朋友，仲有政府嘅同事，每日都有應酬，而阿媽有時會陪阿爸，有時就自己一個人去Shopping，我同阿傑好多時都係一齊去睇下最新電子產品，夜晚就去掃街搵食，日子過得相當寫意！