一個香港留學生在美國的生活: 返港

嗰晚之後，我基本上張件事放低咗！過咗幾日，Aaron同我講話佢從其他朋友口中證實到班印尼仔暑假嘅時候返咗印尼，今年聖誕都會再返，所以肯定同佢地無關！你話阿Q精神也好，自欺欺人也好，可能係自己唔想面對，我就真係當件事唔關小詠事，事隔多年，今日再睇返轉頭真係戇居到不得了！  

轉眼間又已經到咗十二月中，考完Final，交晒Project，又到Christmas。今年我都一樣要返香港，除咗要見下屋企人之外，仲要處理遺產問題。婆婆走咗之後留低咗啲錢，仲有我已經夠21歲，阿爸話爺爺留低嗰兩個物業要轉去我名下。我訂咗十七號晚機返香港，小詠同阿浩就會留返響美國，佢哋兩個都會讀winter session，阿浩最近正式溝咗個台灣妹，差不多晚晚響我屋四過夜，winter session開學前仲會同條女去Hawaii玩一個禮拜，「我返咗香港，阿浩又去咗玩，得你一個人喺屋企，你搞唔搞得掂㗎 ？」我有啲擔心咁問小詠「我冇問題喎！暑假我都係一個人過啦！」「咁又係！咁你好好照顧自己，一月尾開學前我就會返㗎啦！」  

今次出機場係Aaron車我出去嘅，佢會響阿Joe度住兩晚，Lisa下禮拜到三藩市，佢會接機跟住去LA San Diego 同Las Vegas。  

「你有時間幫我留意吓小詠，雖然佢細佬喺度，但係日日掛住溝女，我始終唔係太放心！」「你係仲未放低嗰件事姐！冇嘢㗎啦！我諗嗰套肯定係佢細佬嘅！」「我冇諗咁多㗎啦！越諗越心煩！」「其實你搞掂晒屋企嘅嘢就早啲返嚟啦！」「我都想啊，但我都要花啲時間陪下阿爸阿媽㗎嘛！」「如果你真係擔心小詠，就多啲時間陪下佢啦！」「唔係我唔想陪佢，大家時間唔夾呀嘛！」「你自己執生啦！」  

禮拜五夜機返到香已經係香港禮拜日清晨，一出閘第一件事係換返張香港phone card，打電話返屋企報平安，「喂，阿爸？我到咗啦！依家坐車返屋企！」「咁快攪掂？我嚟咗機場接你喎，你出咗閘未啊？」「爸爸你今早過嚟接我機？我自己返屋企咪得囉！」「反正今日星期日又唔使返工，我哋食個早餐先返屋企啦！」其實我已經出到接機大堂，於是我四圍望一望，終於見到阿爸，我推住㗎行李車行咗過去，「仔，幾個月冇見，好似又大隻咗喎！」「我有做運動㗎 ！」「得你一個返？你女朋友呢？」「佢今年唔返香港啦，佢留返喺嗰邊讀winter session！」「哦！我仲以為有得見下佢添！」「有乜好見，咪又係人一個！」「老竇關心下仔唔得咩？行啦，你阿媽等緊呀！」  



上咗車離開機場，沿着青馬大橋，望住四周圍香港嘅景色，返到屋企嘅感覺就係唔一樣，呢幾年香港變化好大，多咗好多新嘅建築，行咗大約二十分鐘車，過埋西隧就已經返到屋企附近，交通真係好方便，同美國相比，去過超市買盒蛋都唔止廿分鐘車！  

去到西營盤附近有幾間茶餐廳，阿爸泊咗車我哋就入咗一間由細食到大嘅茶記，阿媽已經坐咗喺嗰度，阿媽係比較嚴肅嘅，唔會好似阿爸咁同我有講有笑，不過阿媽一見到我就攬到實一實，其實只係四個月冇見，洗唔洗咁肉緊？「食早餐先，食完返屋企沖個涼休息陣，如果唔太攰就先去拜婆婆。」婆婆安葬於中華基督教墳場，由屋企行路都係廿分鐘左右，非常之近「我唔攰，機上瞓到，去埋拜婆婆先返屋企啦！」「咁都好！咁你下晝好好休息，唔好一返嚟又四處去，聽日一連幾日要處理好多嘢，知道嗎？」「明嘅，阿媽！」