一個香港留學生在美國的生活: 睇樓

我同小詠就決定今年11月租約滿咗之後，就會搬去南面住，呢一區算係中產嘅住宅區，距離大學大約廿分鐘車程，唔算太遠，主要係住宅，學生唔多，不過附近有中國人超級市場，餐廳都唔少，又近我做個間Gym，十分方便！  

禮拜日一早，我哋就約咗一個唐人經紀去睇樓，響美國賣樓都會有Open House，屋主一般都會響禮拜六日執乾淨間屋之後俾人去參觀，1999年美國嘅樓價同香港嘅樓價真係差好遠，只可以用平靚正來形容，而呢個大學城由於地大人少，屋價比起三藩市區仲要平一截，今日我哋睇咗三四間屋，雖然係二手樓，三四千尺左右都唔使四十萬，有部份仲有泳池添！唯一我哋唔鍾意嘅就係大部份嘅屋都起碼有三四十年樓齡，無論點睇都係有一種好殘舊嘅感覺。  

「咁兩位有冇打算買全新嘅樓？」經紀見我地對舊樓好似冇乜興趣，於是就提議我哋可以睇吓新樓。「其實新樓購樓都冇所謂，我哋第一次買樓，最緊要係啱着，不過我睇呢度附近都係舊樓多，見唔到有新樓喎！」我其實都做過少少research，呢頭真係冇乜了新樓盤！「呢區其實算係舊區，如果想睇新樓就要再向南行多兩個Exit，嗰度就真係新嘅開發區，啲樓又新又大又平，我建議兩位可以考慮吓！」  

再南嘅話，返學又會遠咗，不過都係差嗰十分八分鐘，於是我哋就趁仲有時間，聽經紀介紹，去咗一個仲起緊新屋嘅新區睇樓。新區同舊區最大嘅分別就係乾淨，無論街道社區公園甚至商場，都俾你一種全新光鮮嘅感覺！我同小詠響呢一區行咗一個圈，都仲未入屋睇，就已經喜歡咗呢度！整個新社區大概起緊二百間獨立屋，全部都有前後花園，兩層樓高，三房四房五房都有，售價大約係二十到三十幾萬，我哋最後揀咗一間3200尺四房四廁三架車嘅車房，售價二十六萬八！呢間就係我響美國投資嘅第一間物業！  

物業買賣手續其實都唔係太煩，最煩嘅其實係同銀行借錢，又要查信用又要查收入，不過呢間屋我係一次過現金俾晒，個經紀當然高興啦，做少好多嘢有賺到一樣嘅傭金！  



之後嗰兩個月仲要裝修買傢俬先至可以搬入去，我估起碼都要到十一月尾先至可以搬入新屋，不過時間上就啱啱好，依家住緊嗰度俾租俾到十一月三十！  

既然買得新屋，舊屋傢俬大部份都唔會要㗎啦！所以跟住嗰幾個禮拜，我同小詠就忙於購置傢俬雜物，同埋裝修有關嘅所有物料，成個九月都十分之充實，到咗九月尾，大部份要買嘅嘢都已經買晒訂晒，只係等十一月裝修完畢之後送貨，而九月尾亦都迎來左我嘅21歲生日。