一個香港留學生在美國的生活: Junior

99年Fall Semester開學日係八月卅日禮拜一，正式開始我大學第三年，亦即係Junior Year！今年開學同住年最大唔同係身邊嘅朋友唔見晒，除咗Aaron之外，比較熟嘅玩得埋嘅都轉哂校，阿健又人間蒸發，其他嘅所謂同學都只係點頭之交，感覺上失落好多！  

好彩今年功課比往年多好多，我一共報咗六堂課，整個禮拜排到滿哂，加上繼續兼職教琴，生活非常充實！  

六堂課入面有五堂都係Core Classes，其中有三堂同Aaron一齊上，至於小詠，由於大家讀嘅Major唔同，我地根本冇一堂係一齊上，相反，由於佢讀Marketing，同班印尼仔一樣，結果單單呢個學期就有兩堂同班，我最初都被蒙在鼓裏，直到過咗幾個禮拜先發現，我當然唔高興，仲為咗呢件事嘈咗幾次交！而我同小詠嘅關係，亦係由今個學期開始出現問題！  

「去唔去圖書館呀？」啱啱同Aaron上完堂Corporate Finance，雖然係第一個禮拜，但係已經有功課要做，於是我諗住叫埋Aaron一齊去準備，「唔啦！唔洗咁搏喎！不如去做Gym跟住游水，Joey都去，你返嚟咁耐都冇去見過人！」「我仲有教佢琴㗎！」「你仲有教其他人添！你個Addie呢？盲都知條女冧你，玩音樂嘅男仔係著數啲嘅！」「對我嚟講佢哋只係學生，響度食就唔響度痾！好易出事㗎！」「聽住先啦！Anyway，你去你圖書館，我去同Joey做Gym游水！」「扑嘢就扑嘢啦！咁多嘢講！」  

行到去Student Union，我同Aaron就各有各走，睇下隻錶，三點都未夠，於是我一個人去圖書館開工！同以前一樣，我上堂多數係朝早同中午，小詠嘅堂就全部係晏晝夜晚，今個學期最晏一堂要到九點先放，都唔知點解Marketing嘅班都係咁！結果就係我同小詠一齊食飯嘅時候越來越少，佢細佬阿浩又一日到黑都唔響屋企，有時甚至會響外邊過夜，不過佢咁大個人有自己朋友同生活都好正常！  



開學第一個禮拜，阿浩考到車牌了！禮拜六上晝佢已經急不及待要去買車，響美國買車其實係好浪費時間，前前後後行咗四五間車行，最後決定咗要買嘅嗰一款車，跟住要喺車行講價，冇返四五個鐘都搞唔掂！阿浩想買跑車，小詠就想買房車，最後佢地打返香港同爸媽商量過之後，決定買部慳油耐用家庭式房車，阿浩當然唔滿意，經過一輪討價還價，最後買咗部全新兩門Honda Acord，算係滿足到各方需要！  

簽完晒文件俾晒錢，已經差唔多黃昏食飯嘅時間。本來我同小詠打算去睇樓，結果都係冇時間。唯有改到禮拜日先可以去睇。