一個香港留學生在美國的生活: 廿一歲(1)
廿一歲生日對年輕人嚟講係大日子，特別響美國，代表你可以正式買酒飲，可以去Bar落Club，重可以去Las Vegas入賭場，相比十八歲可以投票更加重要！
正日生日廿九號係禮拜四，仲要返學上堂，所以Joe同Aaron就安排咗禮拜六出三藩市一齊慶祝。
九月最後一個禮拜四天氣仲係好熱，中午仍然超過100F，七點左右我已經起身，我嘅堂大部分係早堂，習慣早起，小詠就相反，差不多全部係下晝同夜晚，七點幾當然未起身啦！我一個人起身沖涼擦牙，之後去廚房整早餐，我平常會準備好早餐先返學，等小詠同阿浩起身就有得食。今日整整下早餐，八點左右就收到阿爸阿媽嘅電話，過咗嚟美國已經兩年，早已習慣咗冇得同屋企人一齊過生日，不過收到電話都係會有啲感觸「阿仔，大個啦！廿一歲仔，真正係大人，要懂得照顧自己，唔好再要阿爸阿媽擔心啦！」其實我幾多歲響父母眼中永遠都係細個，雖然來來來去去都係三幅被，點都要回應下「放心啦阿媽，我識照顧自己啦！」講下講下差不多八點半，我就同阿媽講「九點要返學啦！下次再講啦！我聖誕都會返嚟！」「記得著多件衫呀！入秋天冷呀！」「知道啦！拜拜！」匆匆忙忙咁收線，因為阿浩起咗身出嚟。
「姐夫生日快樂！」阿浩把口就係咁！非常識講嘢！「多謝！早餐整好啦！我夠鐘返學，Lunch你去唔去Student Union呀？我約咗Aaron！」「唔去啦！今晚先食啦！」「今晚你家姐訂咗枱同我食喎！哈哈！」「又係喎！咁你Enjoy 啦！」「咁我走啦！」行到門口，著鞋先發覺多咗對女人鞋！睇嚟阿浩尋晚帶女返嚟過夜！阿浩見我見到對鞋，就同我講：「家姐起身前我會送佢走！」「唔洗咁緊張！我同你家姐唔介意！你咁大個仔，自己小心啲啦！」「係嘅！姐夫！」自從佢有架車之後，有陣時跟本冇返屋企瞓，咁帶女返嚟都好平常！反正我都同佢家姐同居，阿浩我又點理得咁多！
今日第一二堂都係同Aaron一齊上，一見面佢即刻比個熊抱我「兄弟，生日快樂！」「屌你！可唔可以大庭廣眾唔好咁基？」條友咁大動作引嚟四週圍嘅人嘅目光！「點呀？生日有乜慶祝？禮拜六Joe少已經安排好節目，今日中午餐晏就我請啦！」「去Student Union食就你請？你條死Cheap精？」「咁你夜晚有小詠吖嘛！」「佢差不多八點先放學，不過佢話會試下早走！喂！上堂啦！等陣先傾！」
上完第一堂，小詠就剛好打電話比我「阿偉生日快樂！」「多謝啊！爛瞓豬！」「你又唔叫我起身！我擘大眼已經唔見咗你！」「我見你尋晚夜瞓咪唔叫你囉！食咗早餐未呀？」「我仲響床！」「你睇清楚你細佬走咗先出去啦！佢尋晚帶咗個女仔返嚟瞓呀！」「我知道，我尋晚見到！你早瞓唔知姐！」「靚唔靚㗎？」「好似係ABC！你咁八，自己問佢啦！」「好啦，唔講啦！夠鐘上下一堂，我今晚接你放學先傾啦！」
中午同Aaron響Student Union食完晏，之後我仲有一堂，Aaron自己去咗圖書館做research，等到我落堂之後再一齊去做Gym游水，每次去做Gym之前都倒行會去café 食個Tea，當然少不了見到Joey，我同Joey之間好似已經忘記咗當晚嘅尷尬，大家好似冇事發生咁，而Aaron就繼續同Joey打情罵俏，繼續佢哋兩個之間SP關係！
游完水焗Sauna嘅時候，Aaron就問「真係唔明，你身邊咁多女，你就係可以冇反應！」「你估我係Joe咩！咁雜食！」「呢啲叫食得唔好嘥！」「好心你啦！Lisa唔係Christmas過嚟探你咩？你小心你同Joey爆大鑊呀！」「你放心，Joey去Canada探屋企人，我同Lisa又會去South Cal 玩，唔會碰到面！」「你自己𢴇生啦！」「咁你點呀？Christmas同小詠去邊玩？」「佢留低讀Winter Session，我一個人返香港。」「哦！你唔怕佢一個響度？」「怕乜？」「唔…你睇實啲，我響學校見到小詠同班印尼仔一齊，好似同班添！」「佢冇同我提喎！同學同班姐，冇嘢嘅！」「提下你姐！自己小心啦！」
做完運動Aaron直接返佢阿姨度，我都返屋企換衫準備接小詠放學食飯。同平時一樣，呢個鐘數屋企係冇人嘅，小詠同浩返咗學，平時我會準備晚飯，不過今日就會出去食。入到睡房，見到小詠放咗份包到好靚嘅禮物響床頭，仲有張生日咭！打開份禮物，原來係件Polo Shirt 同一副太陽眼鏡，兩樣禮物都係Porches Design，間舖要去三藩市先搵到，我估應該係一早暑假已經買咗，收起等到今日先送比我，於是我決定今晚就著住去食飯。
休息咗一陣，七點左右出門口返學校，小詠今日準時一落堂就跑出嚟，平時都係阿浩等埋佢家姐一齊返，好少係我接！「咦！你著咗件新衫帶咗新眼鏡喎！鐘唔鐘意呀！」「更係鐘意啦！多謝！」小詠今日明顯有特別打扮，純白色碎花T Shirt加條粉藍色短裙，扎咗條馬尾，十分清純可愛！於是我開車駛出停車場，直接去餐廳，今晚小詠響舊城區訂咗間意大利餐廳。正當我開車離開嘅時候，我眼角睇到大樓門口企咗幾個人遠遠望著我架車，雖然距離遠，不過直覺話我知，係班印尼仔！