一個香港留學生在美國的生活: 阿浩

我今次返到香港，係阿爸一個人來接機，我細佬阿傑早兩日已經由溫哥華返咗香港，阿爸話返到屋企放低行李同阿媽細佬食完早餐沖完涼就要去嫲嫲嗰度，中午就陪嫲嫲飲茶。  

攞咗車之後就直接返屋企，我第一次由赤鱲角機場返屋企，沿途經過青馬大橋，記得我年半前離開香港嘅時候條橋啱啱起好，我都未有機會行過，沿途風景真係好靚，可能係朝頭早，馬路上嘅車唔多，我同小詠屋企都係響港島西，自從九七年西隧通車之後，由九龍返香港就快咗好多，返到屋企差唔多10點，阿媽細佬已經喺屋企等緊，工人姐姐又已經煮好早餐，平時又惡又嚴肅嘅媽媽一見到我返嚟即刻又攬又錫，咁又係，好耐冇試過一家人齊齊整整咁喺度可以一齊食早餐。  

食完早餐沖完涼，雖然有啲眼瞓，但係由於喺飛機上邊已經瞓咗八九個鐘，我估我應該可以頂到夜晚先至瞓，咁就可以快啲教返個時差。返到入自己房，房間嘅擺設同我走之前一模一樣完全冇變，阿媽話每日工人姐姐都會幫我打掃清潔，呢個工人姐姐好錫我㗎，我出世冇耐就已經響我屋企幫手，可以話由細湊到我大。響我張書枱上面阿爸已經放咗個香港可以用嘅電話同一張電話卡，我抄低左個電話號碼，跟住第一時間就send個email俾小詠，咁我就唔使打去佢屋企先至搵到佢啦！希望係我同佢出發去旅行之前可以見到面，因為阿爸阿媽已經訂咗12月23號飛機飛英國，我哋要到一月中先至會返番香港，跟住過幾日又要飛返美國開學啦！  

插咗張電話卡，打咗個電話俾阿輝同幾個舊同學，約好咗今晚出嚟飲嘢，之後就同阿爸阿媽細佬一齊去嫲嫲屋企。自從幾年前爺爺過身之後，嫲嫲一直都只係同工人一齊住，好在嘅係嫲嫲同我哋屋企係住響同一個屋苑，我哋去探嫲嫲只不過係行過個屋苑平台， 3分鐘都唔使就去到。陪左嫲嫲一陣就一齊去飲茶。阿爸喺馬會會員，次次飲親茶都梗係去返馬會，而去到馬會，就一定會撞到一大堆auntie uncle，寒暄應酬然之後，終於可以甩身！阿爸阿媽送返嫲嫲返屋企，我同細佬就分別約咗朋友見面，阿媽就提醒我哋兩個夜晚記得去婆婆屋企食飯！係喎，差啲唔記得仲要見婆婆，我屋企同嫲嫲都係住港島西，婆婆呢，就同細姨媽住響港島東，婆婆身體唔係咁好，所以好少會出街食飯，今晚就響婆婆屋企，等工人姐姐煮囉！  

小詠收到我email之後已經即刻打電話俾我，佢屋企都幫佢開咗張電話卡，我哋交換左電話，約好咗下晝響佢屋企附近間麥當勞見面。去到麥當勞差唔多三點，香港同美國真係好唔同，就算你下晝呢啲咁嘅時間都係人山人海，我好辛苦先搵到張枱坐低，跟住小詠就打電話嚟「我到咗啦你喺邊呀？」「我坐低咗啦，你行入嚟左手邊應該見到我。」跟住我就見到小詠繞住一個高大靚仔嘅男仔入嚟！我碌大隻眼望住佢，小詠就笑住同我講「阿偉，呢個係我細佬阿浩！細佬，呢個係我男朋友！」原來係佢細佬，嚇得我！睇真啲，佢細佬真係高大靚仔，起碼高我半個頭，青靚白淨，仲有啲同林志穎撞樣！  



我同佢細佬互相介紹完之後就坐低食嘢，傾咗一陣先知，原來佢細佬都打算過嚟美國讀書，所以好有機會會同我哋住埋一齊！小詠同佢細佬關係好好，十分之親密，一包薯條一杯汽水兩份飲，如果唔知，真係以為佢哋兩個係男女朋友，我坐喺佢哋對面都睇到眼火爆！究竟我係佢男朋友即係佢細佬係佢男朋友呢？不過睇佢細佬個樣響外邊應該唔少女，條友仔仲口甜舌滑，左一句姐夫有一句姐夫，世界仔一名！