一個香港留學生在美國的生活: 回家

第二日小詠返嚟好似冇事發生咁，我當然亦唔會知道自己女朋友俾人抽水仲差啲你隻狗公姦埋！不過咗一段比較長嘅日子之後，我發覺小詠仲有同Chris保持聯絡，從種種跡象我相信嗰晚響酒吧入面小詠係知道發生緊咩事嘅，佢內心點諗我真係唔清楚，我絕對相信呢件事改變咗佢對男女關係嘅睇法，亦都喚醒咗佢內心嘅魔鬼，不過呢啲已經係好耐之後嘅事啦！  

餘下嘅日子就係考試同埋交projects，返香港嘅機票早就已經訂好，我哋坐嘅係12月19號凌晨UAL直航香港嘅班機，所以我哋禮拜五晚就要出到三藩市，按照計劃，我同小詠禮拜五晏晝執好行李就會直接開車先去小玲屋企，泊低架車喺佢屋企嘅車房，跟住一齊去王將食飯。 

今次我哋嚟咗美國之後第一次返香港，心情十分興奮，計吓日子，我離開咗香港已經有十六個月，我從未試過離開父母同屋企咁耐，心入邊當然掛住。細佬阿傑搬咗出嚟自己住，有順利考入大學，所以今年佢都會返香港，終於可以一家四口齊齊整整我聖誕。  

雖然同小詠同機返香港，但係喺香港可以一齊玩嘅時間實在唔多，因為阿爸阿媽已經計劃好我哋一家四口會去英國玩兩個星期，而小詠同佢屋企人又會去日本旅行，所以返香港差唔多四個禮拜，我同小詠可以見面嘅日子一隻手都數得晒！  

阿漢小玲送咗我哋去機場，我同小詠Check-in之後就直接去候機室等上機。今次我同小詠都係坐經濟客位，響候機室入邊大部份都係香港人，一睇個樣就知道佢哋係返香港嘅留學生。返香港嘅機程大約14個半鐘頭，上次過嚟美國嘅時候有京子陪我傾偈，今次返去香港有小詠！  



半夜12:00左右開始登機，上到飛機冇耐我哋就瞓咗覺，可能係半夜嘅機嘅關係，瞓醒嘅時候班機已經飛咗差不多九個鐘頭，如果你瞓到覺，其實呢一程機唔係咁難過，瞓醒之後我同小詠睇咗兩套電影，食埋個早餐，就已經返到香港！  

當飛機降落香港國際機場，已經係12月20號早上，仲記得我離開香港嘅時候仲係用緊啟德機場，返嚟就已經變咗做赤鱲角機場！呢個機場比我嘅感覺好大好光猛，設備裝修好新好先進，我同小詠過咗海關攞埋行李就一齊出閘，出到去嘅時候我哋四圍望，我第一時間就見到阿爸同我揮手！而小詠就好似未搵到佢屋企人，於是我就帶小詠佢同我阿爸打招呼：「爸爸，呢個係我同學小詠！」「Uncle你好！」阿爸好客氣咁social咗兩句，小詠就見到佢屋企人出現，佢匆匆忙忙咁同我say Goodbye就跑向佢媽媽嗰度，我第一次遠距離見到佢父母，我冇打算特別過去打招呼，反正我知道呢個假期我一定會有機會見到佢屋企人。呢個時候阿爸就同我講「行啦仔！響美國日見夜見重見唔夠？ 衰仔你有幾好眼光！個女朋友幾靚喎！識咗幾耐啊？」我同我阿爸似兩兄弟多個似兩父子，如果係阿媽絕對唔會咁樣同我講！「識咗一年有多啦！」「嗱！唔好話扮提醒你啊，做事有分寸，做足安全措施，唔好搞出人命先來同我講，阿爸都救你唔到㗎 ！」聽到阿爸咁講，我唯有傻笑回應！