一個香港留學生在美國的生活: 暑假

好快已係學期尾，五月第三個禮拜係Final Week，暑假對於留學生嚟講，不外乎兩件事，一係返香港，一係Summer School，讀多幾個Credit可以快啲畢業！Summer School又比平時Regular Semester平一大半，課程就比較容易，一個學期要讀嘅嘢濃縮晒響六個禮拜入邊，所以十分之受留學生歡迎！  

今年係我嚟咗美國讀大學嘅第一個暑假，我決定讀六個禮拜Summer School，餘下嘅六個禮拜就去玩。暑假上堂比較輕鬆容易又簡單，但係可以選擇嘅科目其實唔多，我最後揀咗兩科General Education同Aaron一齊上，一堂Anthropology，另一堂係Psychology，兩堂都係Beginner Class，考試係選擇題，年年一樣，背哂past paper就一定A，跟本冇難度，最適合暑假讀。至於小詠要到九月開學先可以正式向呢間大學註冊揀科。  

呢個學期其實仲有好多事情發生咗，Dave同Maggie決定暑假轉校搬去Austin Texas住，不過應該七月尾先搬，Joe話佢地走之前去佢屋企Farewell Party喎！而David同Yoyo就差啲分手，因為Anita嘅介入做第三者，話說Anita響ICQ主動Send啲言語曖昧嘅message畀David，仆街David又覆佢，就係咁你來我往，最後畀Yoyo發現大吵大鬧，要Joe做和事佬先㩒得住，好彩最後Anita自動消失先至冇事，至於Anita去咗邊就冇人知啦！Nancy就去咗UCLA讀Medical School，即係後來改名叫做David Geffen School of Medicine嗰間。Nancy嘅離開令到Joe有啲失落，不過佢嘅失落只係短暫，好快佢身邊又出現唔同嘅新女，再加上Joyce，生活依然精彩，不過呢啲都唔關我事啦！  

阿君Alan Kim同阿健同樣都會留返喺度讀Summer School，小敏就返咗去上海，直至八月尾開學前幾日先至會返嚟。而一直都係單身嘅阿健係今個暑假嘅開始亦都有零嘅突破！聽Alan講阿健最近同一個叫秋子嘅日本女仔行得好埋，秋子同阿健係Spring Semester一齊讀Marketing，聽講仲係靚女一名，雖然我仲未見過，但係最近睇到阿健春風滿面，我估都應該好事近！  

至於我自己，除咗返學讀書考試之外，有繼續響大學兼職教琴，所以我仍然一個禮拜會見到Joey起碼一次，只不過教學嘅地方就由佢屋企改咗做學校，以我所知佢同Aaron仲有私底下見面，耐唔中仲會打返場友誼波，而當Joey見到我基本上係當冇事發生過！咁都好，免得大家都尷尬！另外，響我大學四年生活入邊另一位女角，亦響呢個暑假上場，佢就係我另一個鋼琴學生Addie。  



Addie亦係香港人，早兩年同父母移民美國，落戶響呢個大學城，所以順理成章響呢度上大學。Addie響香港都係讀名女校，響銅鑼灣嗰間，格仔裙熊貓鞋，樣子清純可愛，佢本身響香港有學開琴，嚟到美國停咗兩年，依家又想學返，於是報讀咗Summer School Music class，結果分派到我手上。至於同Addie嘅故事，將會喺以後先交代。  

當然，最重要都係小詠！期最後一個禮拜考完晒試之後就忙於執屋，準備迎接小詠正式搬入嚟同我一齊住！