一個香港留學生在美國的生活: 搬屋

六月嘅第一個禮拜六，小詠正式搬離宿舍，由於佢只係住咗大約六個月，基本上冇乜大件野要搬，全部都係書簿雜物同埋衣服，不過我架車仔都係裝唔落，最後都係要搵阿Joe即係佢老竇㗎七人車先得！  

搬屋之前嗰晚我已經出咗三藩市，小玲早一個禮拜已經搬咗出去，佢同阿漢響Japan Town附近租咗個細單位一齊住，睇嚟過去果半年小玲畀小詠改變咗好多，如果係以前，真係冇辦法相信佢會痛男朋友同居！  

禮拜六一早Joe就過嚟幫手搬屋，呢個兄弟真係唔話得，夠義氣，由於小詠行李唔多，我哋兩個男人行左兩轉已經搬得七七八八，睇吓個鐘十點都未夠，於是我就問：「仲咁早，不如我楂轉車入去放低啲行李，再揸返架車出嚟還返俾你？」 「唔使咁麻煩啦！我揸車跟住你返去，今晚去你度過一晚，我聽日先至走，咁咪OK囉！」  

加州嘅夏天真係好正，永遠都係藍天白雲，微風陣陣，路上嘅車唔多，返到屋企啱啱好十一點左右，將行李搬上樓之後我哋就一齊出咗去食飯，當然約埋Aaron同Alan佢地一齊。Lunch嘅時候，我地第一次見到阿健條女秋子！ 

大家互相介紹完之後坐低，又係男有男嘅坐一邊，女有女嘅坐另一邊，好快秋子子小詠Kim已經有傾有講，我就細細聲問：「阿健你究竟溝到人未㗎 ？」「未啊，普通朋友咋！你哋唔好亂噏野啊！」 我見尷尷尬尬咁講，「都未見過人哋追女追到你咁㗎 ！條友帶人返嚟屋企食飯，好似見家長咁，客客氣氣，相敬如賓，真係睇到我噴飯！佢到而家連人哋隻手都未拖過啊！」Alan笑住咁講！「唔係啩！手都未拖過，咁肯定又未咀過又未扑過啦？你真係男人之恥呀！」Aaron踩多腳！阿健就話：「人哋正經好女仔嚟㗎，唔好下下諗埋啲衰嘢！」我就話：「你唔好話我聽你唔得呀！使唔使介紹個醫生俾你睇吓？男人唔得真係最痛㗎喎！哈哈哈！」阿健俾我哋講到面紅耳赤！  



食飯嘅時候，我細心觀察秋子，秋之係一個好典型嘅日本女仔，細細粒皮膚白白，一睇就知係日本人嘅樣，身材唔算突出，但係個笑容就好甜美。經驗話我知秋子係一個十分之善於交際嘅人，朋友多有活躍，而阿健就係一個極之內向嘅宅男，個人有悶到抽筋，所以到而家都未拍過拖！鍾意人又唔夠膽同人講，兩個完全性格相反嘅人，我估佢哋要真正喺埋一齊睇嚟都唔係咁易。 

呢餐飯食得好愉快，食完之後幾個女人去咗買嘢，我就返屋企打掃同埋執好啲行李，Joe同Aaron去做Gym，返到去屋企啱啱見到阿君同小敏返嚟，咁我順便同佢交代聲Joe今晚會喺度過夜，阿君就話 ：「不如今晚上我們一起食晚飯歡迎小詠加入我們大家庭，從今天開始我們四個人一齊生活！」我當然冇反對啦！就係咁，我正式開始左同小詠三年同居生活。