一個香港留學生在美國的生活: 傍聽

禮拜五一早小詠有堂十點嘅數學，我見冇乜嘢做，於是我跟埋小詠一齊去上堂。呢一堂係calculus I，有成一百二十人響個大Lecture Hall入邊，一般來講如果我想旁聽一定要有professor同意先得，但係咁多人我靜雞雞坐去最後一排應該冇人發現。於是我入到去之後就同小詠分開坐，小詠坐響前面第二行，佢坐低冇耐我就見到有兩個男仔入嚟。雖然距離比較遠，但我睇個樣應該都係香港人，佢哋一入到嚟四圍望，見到小詠就直接坐喺佢隔離， 直覺話我聽呢兩個應該係狗公，坐響小詠隔離其實就係想溝佢！  

由於佢坐喺前邊嗰兩行我坐響最後嗰一行相隔太遠，我根本聽唔到佢哋講乜嘢，我只係知道呢兩隻狗公由頭到尾不斷咁同小詠傾偈，睇嚟小詠同佢哋好熟，肯定唔係第一次坐埋一齊上堂。我越睇就越唔對路，好彩好快個教授已經入嚟上堂，佢哋都停咗落嚟冇再傾偈。堂課一個半鐘，到落堂嘅時候兩隻狗公竟然企響度等埋小詠先一齊走！我響後排行咗落嚟去到小詠附近，小詠先同佢地講：「今日同唔到你地食晏啦，我男朋友出咗嚟陪我，我走啦，下次見啦，拜拜！」嗰兩隻狗公先一面愕然咁望向小穎後邊，我理都冇理佢地，一手拖着小詠就離開講室，我當然感覺到背後嗰四隻怨毐嘅眼神，呢個時候小詠先至感覺到我有啲唔對路，主動同我解釋「喂！使唔使行得咁快呀！嗰兩個普通朋友嚟嘅咋！」「我一睇就知佢唔係好人！擺明想溝你！」「唔好咁啦！我哋咁啱同班又係香港人先至坐埋一齊咋嘛！冇嘢㗎 ！」  

我粒聲唔出拖住小詠行到出大樓外面，「乜你冇同佢哋講你有男朋友嘅咩？」「佢哋又冇話要追我，無啦啦點會同人講我有男朋友㗎 ！唔好咁小氣啦！我錫返啦！」「唔係我小氣，係我緊張你！睇嚟我都要做返啲嘢，宣示一下主權！」「咁你想點呀！頭先都同佢哋講咗你係我男朋友啦！」「反正今日下晝都冇堂，不如我哋去買返對戒指吖？」「好啊！其實我都想買對情侶戒指好耐！」「咁不如我哋食完飯就去買啦！」  

 於是我就同小詠返宿舍攞車，之後落咗去Downtown Union Square附近食咗個三文治做晏，跟著響附近行街睇吓有邊啲首飾又或者珠寶店有賣情侶戒指， 最後我哋去咗Cartier，睇中左佢哋嘅Love Ring，我哋除咗一人買一隻戒指之外，小詠仲睇中左同一系列嘅手額，本來佢堅持話要自己俾錢，最後都係我送咗比佢，「唔好啦咁貴，兩隻戒指加埋個手額要成六七千蚊，太貴啦，隻手額我自己俾錢買啦！」「唔緊要啦，最緊要你鍾意！」「不如咁啦，我都買返隻手額送俾你好唔好？」「咁貴！唔好用晒你啲零用錢啦！」「我仲有好多私己錢，你唔使驚喎！哈哈！」 就係咁，我同小詠一人買咗一隻戒指同一隻手額，洗咗差唔多一萬大元！  

買完戒指之後，我哋就手拖手響附近繼續行街，一路行小詠就一路同我講關於佢呢兩個同班同學嘅事，坐響佢隔離不斷撩佢講嘢嘅係Chris，另外一個男仔叫Andrew，都係香港人，Chris係小玲喺香港已經識嘅朋友，其實佢早就已經感覺到Chris想溝佢，但係又從來冇開聲正式講過話要追佢，所以佢又唔好意思拒絕人，好彩今日我出現，終於比小詠有個機會話俾Chris聽佢係有男朋友嘅，希望從今以後，呢隻狗公會知難而退！