一個香港留學生在美國的生活: 阿傑

同小詩相處其實十分愉快，佢係一個十分開朗健談嘅人，我哋響小詩屋企坐咗大概兩個鐘，成個下晝小詩都係同阿傑講關於大學入學嘅事，主要都係講關於選課同埋一啲大學生活嘅細節，我覺得阿傑真係好幸運，起碼有人可以請教，我就一個人盲舂舂自己摸索。  

阿傑基本上已經決定咗選讀Economics，我呢個細佬為人比較內向文靜但係成績就十分之好，由細到大佢都好清楚自己嘅讀書方向，從來都唔需要阿爸阿媽擔心，同我呢個做大佬嘅吊兒郎當完全唔一樣。五點左右我哋就一齊出門口去食飯，估唔到嘅係今晚我哋去食飯嗰間酒樓，竟然係我第一次同小詩食飯嗰一間，咁又係嘅，間酒樓黃Uncle有份投資，梗係返返去自己開間酒樓食啦！  

晚飯當然十分豐富，鮑參翅肚，真係好耐冇食過咁豪嘅一餐！食完之後小詩送我哋返屋企，之後佢就返返自己Condo啦。我同小詩約好咗下個禮拜會再見面，反正我仲有四五日喺溫哥華，辦完買樓手續其實我已經冇乜嘢做，咁就四圍玩下啦！  

黃Uncle間屋其實好大，仲有好多空房，但係阿傑就堅持夜晚要同我孖舖，咁就俾咗個機會我同呢個細佬可以傾吓計，多啲了解。   

「細佬，你上次同我講話有個女仔你鍾意，究竟你追到人未啊？」我第一樣最想知嘅當然係細佬嘅感情生活。阿傑就同我講「應該算係追到啦，佢又比我拖手又比我錫，不過就未正式公開，佢九月都會同我一齊入大學，仲會同我讀同一樣嘅科目！」「個女仔係點樣㗎有冇相俾我睇吓？」阿傑喺佢銀包攞咗張相出嚟，典型嘅鄰家小女孩，不過就真係生得幾靚！阿傑另一個同我好唔同嘅地方，就係佢係一個十分專一嘅人，大學畢業冇耐，阿傑就同呢個女仔結咗婚，仲生埋小朋友，而家一家人住響多倫多。由初戀到拍拖結婚生仔，無風無浪無驚無險，依家睇返我其實都幾羨慕佢，我嘅感情生活真係一波三折，不過咁多年來我都冇同我呢個細佬分享過我嘅感情生活。  



「阿哥啊，我想問你一個問題。」「問啦？有乜嘢問題解決唔到啊？」「如果將來我搬咗出嚟住，我可唔可以叫埋我女朋友同我一齊同居？」估唔到我細佬仲係一個咁天真嘅小朋友，「阿傑，你都已經咁大個仔，你同個女仔同居，使乜問過我呀？」「我驚阿媽發現會殺咗我！」「你都傻嘅，邊個叫你話俾阿媽知啊！我同你講，我今個暑假我響三藩市個女朋友都會搬來同我一齊住，我響出邊會另外租多一個細單位，假如阿爸阿媽過嚟又或者佢阿爸阿媽過嚟，咪搬去個細單位度住囉！山高皇帝遠，邊個管得到你呀！」「咁又係喎！阿哥啊，可唔可以講多啲關於你女朋友嘅嘢俾我聽啊！」於是我就慢慢將我同小詠嘅故事講俾阿傑聽。講吓講吓先知，原來阿傑真係只有拖過手仔同錫過塊面，仲係青頭仔一名！反而佢好羨慕我同小詩多姿多彩嘅生活！  

成年冇見，同阿傑之間嘅話題真係講唔完，不過經過今晚嘅詳談，我對我呢個細佬又真係了解多咗好多！不過好快就已經到咗第二朝，阿傑食完早餐之後，就匆匆忙忙要返宿舍，我同我呢個細佬再次見面，已經係一年多之後嘅事情，真係有啲唔捨得！  

之後嗰兩日都係無無聊聊咁過，，禮拜二一早約咗小詩去咗個地產經紀度，簽好晒所有文件，收埋樓，咁我今次嘅基本任務就已經完成。小詩就話等阿傑搬入去之前再同佢去買傢俬重做少少裝修，叫我就唔需要再擔心啦！跟住小詩就同我講「肚餓啊！要唔要上我屋企食啲嘢先呀？」