一個香港留學生在美國的生活: 睇樓

小詩住嘅呢一區照做West Point Grey，我哋就好似觀光遊客一樣，一路行小詩就一路沿途介紹，一區嘅房價其實都唔平，不過如果淨係買一個細嘅單位，價錢應該都係四五十萬加幣，響呢度可能叫做貴，不過相比香港樓價，就真係抵到爛啦！ 

West Point Grey其實唔係好大，我哋行咗一陣見有啲攰，就去咗市中心搵嘢食。呢個類似Downtown嘅區位於十街，其實就只有兩三個Block，我哋搵咗間細細間嘅餐廳坐低食晏，阿傑就我哋講「哥，呢區好舒服好靚，又近學校，就不如喺附近睇吓有冇地方啱住好冇？」  「本來就打算睇吓呢一區環境，啱就搵吓有冇空嘅單位可以買，如果你覺得鍾意冇問題，我哋食完飯就行返去，睇吓管理處嗰頭有冇買樓嘅資料？」小詩就話「大廈管理處冇樓賣㗎，我打電話問一問我個地產經紀，睇吓我住嘅地方有冇放盤啦！我哋而家食埋飯，我再約個經紀去我住嘅地方見，佢應該冇咁快可以嚟到，我帶你去前邊個公園行一行先啦！」  

我鍾意溫哥華嘅原因，在因為呢個城市十分之綠，背山面海，四處都可以見到有公園，除咗著名嘅Stanley Park之外，我哋而家去嘅Jericho Park都好有名！我哋行咗一陣就返轉頭行返去小詩嘅屋企。佢住嘅係五六層樓高嘅公寓，樓下大堂有管理員地下有停車場，係十分之新嘅大廈，聽講起左唔夠十年，由於地點十分接近大學，住嘅大部份都係學生同大學嘅員工。  

去到大堂嘅時候已經見到個地產經紀，個經紀都係香港人講廣東話，經紀話呢幢大廈仲有兩個單位放售，價格都係大約五十到五十五萬加幣，一房一廳，阿傑十分之鍾意附近嘅環境，就同小詩住同一棟大廈，咁都方便有個照應，於是我哋就同經紀上去睇樓，我哋睇嘅呢個單位響六樓，大門入口左邊有一個細嘅廁所同衣帽間，右邊係開放式廚房，行入去係客廳同飯廳，望出去可以望到大學嘅建築， 十分開陽，睡房係一個套房，浴室好大好光猛，單位面積大約九百尺連兩個車位，我同阿傑睇完都十分滿意！睇咗唔夠15分鐘我就同個經紀講：「就呢間啦！呢兩日就可以簽埋啲文件過戶！」我估個經紀都諗唔到會咁快就買咗成層樓，「你放心，呢個絕對係一個好嘅投資！你又係黃生介紹嘅，又係黃小姐嘅朋友，其他細節就交俾我辨，準備好啲文件我再約你簽約啦！」個經紀笑到四萬咁口，於是我哋交換左聯絡資料之後，就約好禮拜二一早去地產公司簽埋啲文件同埋手續，咁基本上我今次溫哥華之旅要做嘅嘢都已經做晒啦！  

「睇完樓不如上我屋企坐吓啦！阿爸阿媽已經訂咗位食飯，五點鐘先出門口都未遲。」小詩見睇完樓冇嘢做，就邀請我哋去佢屋企坐。我同阿傑都冇乜所謂，我其實都想去睇吓佢住嘅地方係點㗎 ！小詩住嘅單位響四樓，都係一房一廳，屬於細單位，入到門口除鞋嘅時候，我發現放鞋嘅地方竟然有一對大碼嘅男色拖鞋！呢個時候小詩又響鞋櫃入邊攞到另一對大碼嘅藍色拖鞋出嚟「除鞋呀！記得換咗拖鞋先好入屋呀吓！」小詩笑笑口咁同我哋講。佢屋企裝修好現代化，成間屋嘅主要色調都係黑同白，女仔來講比較特別。我同阿傑四圍望，小詩就話「你哋隨便參觀啦！睡房都可以睇㗎 ！」小詩去廚房準備一啲小食同飲品，我同阿傑就唔客氣咁四圍參觀。唔知點解，我比較想知間屋係唔係小詩一個人住。我除咗留意到門口嗰對拖鞋之外，更屋入邊竟然一張相都冇，床就係一張好大張嘅雙人床，我當然唔會去打開衣櫃睇吓入邊有啲乜嘢衫啦！不過當我入到去廁所嘅時候，就發現真係有兩支牙刷！睇來小詩應該有個男朋友，仲會時不時喺度過夜，當我諗到呢度，我個心竟然有啲妒忌！