一個香港留學生在美國的生活: 入屋

老實講，我已經唔係三四年前個青頭仔，可以任由小詩擺佈，無啦啦叫我上佢屋企食嘢，孤男寡女，加上以前同佢唔清唔楚嘅關係，直覺話我聽呢個會係一個陷阱！  

「不如我哋出去食啦！咁耐冇見，我請你食飯啦！有冇好介紹呀？」我打算四両撥千斤，輕輕帶過，轉換話題，出去食完就算啦！「點啊？做乜嘢咁驚上我屋企呀！你要請我食嘢，可以買外賣上我屋企食啫！你唔係怕死係咪啊！你驚我又將你綁住？」「哈哈！咁耐嘅嘢你仲記得！唔好玩啦！快啲講去邊度食我開車啦！」小詩用好奇怪嘅眼神望住我，跟住講「幾年冇見，真係大個仔左，成熟咗，仲Man咗！咁好啦，我哋出去食啦！唔難為你啦！」 

我終於可以鬆一口氣，唔知點解同小詩一齊，總係有一種難以言喻嘅壓力，我總係覺得好似俾佢睇穿晒，佢知道我心入邊諗緊乜嘢咁。雖然我同佢冇拍拖又唔係男女朋友，但係就關係曖昧。  

我哋簽約嘅地產公司響小詩屋企附近，所以佢今朝早冇揸車，於是我同佢一架車去返Richmond附近食晏。我哋揀咗間日本拉麵，響溫哥華，就算係日本拉麵個老闆都係香港人，入到去由廚房到出邊帶位嘅都係講廣東話！食飯嘅時候我哋終於都可以比較深入咁傾吓大家嘅近況，我有將我同小詠之間嘅嘢講俾佢聽，而佢亦都有話俾我聽佢而家又拍緊拖，佢男朋友係佢大學嘅一個助教，同佢以前唔同嘅係呢個助教仲係單身，算係一段正常嘅男女朋友關係。 

「點解響你間屋入邊見唔到你男朋友啲相嘅？」我有啲好奇咁問，「咁點解我一定要有男朋友嘅相喺屋企呢？」小詩反問返我！「我係有啲好奇你男朋友係乜嘢樣姐！哈哈！」「你咁八卦，你俾我睇吓你小詠張相，我就俾你睇吓我男朋友張相！」於是我響銀包攞咗我同小詠一齊拍嘅一張近照俾佢睇，「估唔到你啲咁嘅傻仔都可以揾到個咁靚嘅女仔喎！」「咩傻仔呀！我好差咩？快啲俾我睇吓你男朋友張相，肯定唔夠我靚仔！」「Sorry喎！我身上冇佢張相，要睇你一陣間上我屋企睇啦！」轉過圈，佢又要我上佢屋企，咁我去定唔去好呢？  



同佢食完餐飯，對佢近況了解多咗。自從佢搬咗出嚟自己住，已經拍過兩次拖，而最近呢一個助教男朋友係台灣人，拍咗拖大概半年，佢同呢個男仔算係半同居吧！一個禮拜總有兩三日呢個男仔會響佢屋企過夜。講吓講吓已經去到佢屋企樓下，本來打算放低佢我就走人，點知佢又開口叫我上樓：「泊架車上嚟啦！你唔係話要睇我男朋友啲相嘅咩？」「唔好啦，下次先睇啦！」「你咁怕上嚟做乜嘢呢？你仲有幾日就走啦，下次係幾時啊？男人老狗，唔好咁扭扭零零，泊好架車上嚟啦！」就係咁，佢落咗車響大廈門口等我。咁我唯有泊好架車跟佢上樓！  

入到門口我又見到上次嗰對男裝拖鞋「你着呢對拖鞋啦！係我男朋友嘅！」我唯有硬着頭皮換上對拖鞋，跟住去咗客廳度坐。小詩就去咗廚房攞嘢飲，跟住響櫃桶攞咗本相簿出嚟，俾我睇佢男朋友啲相。呢個男仔十分書生型，帶住個眼鏡，充滿書卷氣，一睇個樣就知係啲讀書好勁嘅人。相簿入邊嘅相都係佢哋兩個響大學校園入邊影嘅，仲有幾張係響呢間屋入邊嘅生活照。  

我睇緊相嘅時候小詩係坐喺我隔離啊，我一路睇一路問住佢身上嘅氣味，呢股熟悉嘅氣味，令我不禁諗起四年前同佢一齊嘅暑假。其實我心入邊好清楚，佢叫得我上嚟，肯定唔係睇相咁簡單！但係我又同自己講，我已經唔係四年前嘅我，我有小詠，我係唔應該亂搞男女關係！