一個香港留學生在美國的生活: 重遇

又返到1998年嘅四月，我啱啱到咗溫哥華黃Uncle屋企，食完飯沖咗個靚涼，正當我行返出浴室嘅時候，見到闊別多年嘅小詩坐咗喺張床上邊望住我！四年冇見，小詩變得更加成熟更有女人味！佢突然間出現，我有啲手足無措！「點呀？咁嘅樣？O晒咀！唔認得我咩？」「詩姐姐，我點會唔認得你啊！咁多年冇見，你仲係咁鍾意失驚無神跑入人哋間房！你可唔可以等我換咗衫先再同你傾呀！」啱啱沖完涼出嚟，我得條毛巾包住下邊， 十分尷尬！「我有我坐喺度，你有你換衫，我又唔係未見過你冇着衫我咁大個仔仲咁怕羞！睇過？咦！高咗又大隻咗，唔係排骨仔啦喎！」今時今日嘅我，已經高過小詩一個頭有多，相比當年嘅排骨仔，真係脫胎換骨！ ！「唔好玩啦！你阿爸阿媽喺度， 放過我啦！」「哈哈！算啦！唔玩你啦！換完衫落嚟啦！我買咗糖水返嚟，係你以前最鍾意食嗰間，換完衫落嚟一齊食啦！」小詩出咗房之後我快手快腳換好衫褲跟住落樓，見到黃Uncle Auntie佢哋同小詩已經食緊糖水，「阿偉，快啲過嚟食糖水啦！小詩知道你嚟咗，特登去買㗎 ！」黃Uncle一路食住糖水一路同我講。  

我哋一路食住糖水一路閑話家常，原來小詩已經大學畢業，而家讀緊碩士課程，自己一個人搬咗出去住，就響大學附近，平時好少會返屋企食飯，黃Uncle：「聽日禮拜六，你細佬阿傑會過嚟住一晚，禮拜日下晝先至返番入宿舍，你同小詩聽日朝頭早去學校接阿傑啦！」小詩就同佢阿爸講：「阿偉唔係要去睇樓咩？阿爸你諗住叫佢買邊度啊？如果阿傑都係讀同我同一間大學，不如就買返我住嗰區啦？」「我都諗住叫阿偉去你嗰頭睇一睇，你住果一棟大廈其實環境唔錯位置又好，如果仲有單位放售，就不如買嗰度啦！」於是我就話「Uncle你話冇問題我就買㗎啦 ，阿爸話交晒俾你，我只係負責簽文件同俾錢！哈哈！」「咁小詩你聽日接咗阿傑之後，就同埋阿偉一齊去你屋企附近睇吓啦！」我對於呢個安排完全無異議，食完糖水之後我響大廳睇咗一陣電視就上樓瞓覺，黃Auntie就捉住小詩問長問短，睇嚟佢哋都有好耐冇見，有好多嘢講。  

我返到上房之後打咗個電話俾阿傑，傾咗一陣小詠就打嚟，「阿偉，你有冇掛住我啊？」「當然有啦！我分分鐘都掛住你！」我講完自己都覺得有啲肉麻！「我禮拜日飛機就返三藩市啦！你係咪啱啱到咗溫哥華？」「係呀我啱啱到！我要幫我細佬阿傑喺度搵地方住，佢今年九月入大學要搬出黎啦！」「咁你咪好忙？我未去過溫哥華，我都想同你一齊去玩呀！」「我哋搵個假期一齊再上嚟玩啦！溫哥華好多好嘢食㗎 ！」我同小詠傾左大概半個鐘我先收線瞓覺，我一直都冇同佢講過我同小詩之間嘅嘢，冇必要同小詠再提起，女人就特別小氣，越描越黑，過咗去就由得佢過去啦！  

四月嘅温哥華夜晚氣溫都幾凍，今晚仲有雨。講完電話之後瞓落床已經差唔多半夜十二點，今晚有啲心緒不寧，我估同見返小詩有關，其實我呢一刻真係有啲衝動想過去佢間房搵佢，但係我又知道咁樣做就實出事，更何況佢阿爸阿媽仲喺度，就係咁胡思亂想之下瞓到天光。  

第二日一早食完早餐我哋就去咗接阿傑，差唔多一年冇見阿傑高咗又靚仔咗，佢嘅生日係六月尾，仲有幾個禮拜佢就十八歲啦！雖然我同我呢個細佬分隔兩地，但我哋每隔一兩日都會通電話，以我所知阿傑最近識咗個女仔，都係香港人，我都唔知佢追到未，不過睇佢個樣春風滿面，應該都好事近啦！  



我哋三個人一架車，直接去咗UBC附近，小詩住嘅Condo步行去大學都只係十分鐘路程，我哋泊低左架車響小詩間Condon嘅地下停車場，之後就喺附近閑逛。呢區絕對係高級住宅區，環境優美又接近大學，如果有合適嘅單位價錢又啱，我就決定聽黃Uncle嘅介紹，響呢度買一個單位俾阿傑住。