一個香港留學生在美國的生活: 多角關係

禮拜四，Spring Break 前最後要返學嘅一日考完試，約咗Aaron去做Gym，之後再去Café食晚飯。自從我上次響圖書館同Aaron講完耶穌之後，佢就冇再去Vivian間餐館食飯，當然亦冇再搵人，久而久之， Vivian就從佢嘅生活仲消失。  

「今晚食完飯，我打算約Joey去睇戲，你有冇興趣？」Aaron一路舉鐵一路問我，我諗咗陣，我就同佢講：「我唔去啦，我返屋企執下行李，禮拜五下晝機飛溫哥華，你同佢二人世界啦！」「其實我覺得Joey對你係有興趣多啲，不過我約佢佢又唔會唔理我，好混亂呀！」「老老實實，我真係對佢冇興趣，起碼現階段對佢冇興趣，就算佢鍾意我又點？我呢啲有婦之夫最好唔好玩火，如果唔係，點死都唔知！」「我就唔理咁多啦，反正我條女響香港，我呢啲冇腳嘅雀仔，要好好把握機會，如果唔係點對得住自己！」「總之你自己小心，唔好玩出火！」「我睇Joey 都係出嚟玩㗎啦，你睇佢幾主動搵你，又睇吓佢上次同我哋去Gym著件Bra Top咁性感，你就知佢都係食肉獸嚟㗎啦！」「總之我就唔同你玩，快啲做完食飯我要返屋企！」「得啦得啦！知你係乖仔啦！」  

做完Gym食飯，已經差唔多七點，Joey放八點，點菜嘅時候Aaron就順便約Joey去睇戲，雖然我已經講到明我係唔會去嘅，不過Joey都好似冇所謂，睇嚟Joey都係好想有男仔約。食完飯之後，我等Aaron去咗洗手間，我同Joey講：「我聽日會飛溫哥華一個禮拜，跟住嗰個禮拜一我冇時間教你琴，你自己練習啦！」點知Joey冇答我個問題，反而問返我：「我聽Aaron講，你女朋友暑假會搬入嚟同你一齊住，係唔係真㗎 ？」「當然係真㗎啦！我等咗佢好耐㗎喇！」「哦！咁你仲會唔會繼續教我琴㗎 ？」「當然會啦！兩樣嘢冇衝突㗎喎！」呢個時候Aaron出返嚟，睇吓時間已經八點，買咗單之後， Aaron就同Joey一齊去睇戲，而我就返屋企執行李。  

返到屋企得返我一個人，阿君同小敏今日晏晝已經開車去咗Oregon玩，下禮拜先返。我一路執行李一路諗，仲有成四個月小詠先搬入入嚟，我的四個月係咪可以玩盡呢？ 正當我胡思亂想嘅時候，電話響，小詠打嚟：「有冇卦住我呀？有冇唔聽話撩其他女仔呀？」每次小詠打嚟開場白都差唔多，唔通呢個先係我真面目會四圍瘟女？同小詠傾咗半個鐘，佢話我知小玲正式同阿漢拍拖啦！真係估唔到咁毒嘅女都有人要！不過小玲人品真係唔錯，我同小詠都戥佢高興，希望呢個阿漢會一心一意對佢好啦！  

𢴇完行李已十一點，沖完涼正準備瞓覺，電話又再響起…