一個香港留學生在美國的生活: 蜑家雞

今年三月最後一個禮拜日改回夏令時間，再隔一個禮拜就係Spring Break。小詠生日Party之後一切回復正常。除咗weekend出三藩市外，其他時間都留響呢個悶到抽筋嘅大學城。大學生活雖然平淡但充實，平日返學教琴健身，夜晚食飯好多時都會去Alan 度食，而平時返學上堂之外，大部分時間我都會去圖書館溫習，我同阿君Alan佢地長期有一間細房響圖書館，冇堂上嘅時候都會去呢間房一齊做功課，Aaron都會一齊，不過呢個禮拜就好少見人！後來先知條友日日去咗Vivian間餐館食飯，又成日車出車入，好明顯追緊人！  

失蹤咗一個幾禮拜後，終於出現！呢一日啱啱響Student Union食完晏，Alan阿健上堂，我下晝就去圖書館做功課睇書，當我一個人響間房入面努力緊嘅時候，Aaron突然出現：「嘩！終於蒲頭！我仲以為你跟條女私奔咗？」Aaron一臉無奈，一坐底就嘆氣：「唔好提啦！條女好難攪啊！」「有幾難搞啊？我見你日日車出車入，又成日去佢餐館食飯，應該追到手啦？」「追鬼追馬咩！呢條係聖女，除咗拖手仔之外，連咀都唔俾我咀，更加唔好話扑嘢啦！」「吓？條女咁保守？」「係呀！佢係好虔誠嘅基督徒，依家仲個個禮拜要我陪佢返教會，你話我死唔死？」「咁你咪陪人哋返下教會囉，你啲咁罪業深重嘅人，返教會啱㗎喇！」「咁你不如殺咗我好多過啦！條女琴晚仲同我講，佢嘅初夜要留返比佢老公，佢係唔接受婚前性行為！咁我呢幾個禮拜嘅努力，全部白費！真係蜑家雞見水，得個睇字！」「咁其實你一開頭已經立心不良，淨係想昆人上床，你唔好唔記得你仲有個女朋友喺香港，如果你唔係真係想追人，你就早早放手，唔好浪費人哋嘅時間啦！」「我諗我會放棄啦，不過唔知點同人開口，好似好衰仔咁，唔同你上床就飛人！」「咁你咪慢慢嚟，去少啲餐館食，見少啲人，等段關係慢慢丟淡佢囉！」「唯有係咁啦！咁你又點呀？Joey成日問我關於你既嘢喎！」「唔好玩啦，小詠今個暑假就會搬入嚟，你想我死咩？」「如果你唔玩，咁我出手㗎啦！Joey都唔錯呀，食得唔好嘥！」講吓講吓，阿君上完堂入咗嚟，我同Aaron就冇再繼續討論落去，結果條友真係冇再搵Vivian，轉移目標去咗溝Joey！  

三月最後一個禮拜係小詠Spring Break，不過我就要考試，小詠本來諗住入嚟一個禮拜陪我，不過臨時佢媽媽叫佢飛落去LA探佢表姑媽，結果都係嚟唔到陪我，不過冇所謂啦，我可以專心考試讀書，而再過多一個禮拜就到我嘅Spring break，不過我要飛溫哥華探我細佬阿傑，佢下年會入大學，我阿爸阿媽要我幫佢手搵屋搬，阿爸阿媽嘅意思係買間細嘅condo比細佬住，當係投資，叫我去睇睇攞啲資料比佢哋兩個老人家參考吓。  

至於Joey，我維持着每個禮拜一下晝教琴，其實我係感覺到Joey 對我有意思，我同佢之間嘅關係就只係隔住一層紙，只不過係我一直冇咁嘅意思篤穿佢。