一個香港留學生在美國的生活: 小詠生日(4)

同Aaron傾謁嘅係一個大約十七八歲嘅女仔，一頭捲曲長髮，眼大大笑容十分甜美，後來Aaron話我知佢係呢問餐廳老闆個女，依家讀緊十二年班，九月就會入大學，如無意外，應該同我地同學，亦即係會做我哋嘅學妹！  

冇耐阿君同Alan幾個都到咗，Aaron就好似半個老闆咁走過嚟問我地想食啲乜，睇到我忍唔住想笑！Aaron：「都唔記得介紹，呢個係Vivian，呢間餐館係佢阿爸開嘅！啲嘢好好食㗎！大家多啲幫襯啦！」我忍住笑：「得啦！知道你有股份啦！你咁清楚有乜好食，你去點菜啦！」於是Aaron真係直接走去廚房叫菜，Vivian就好有禮貌同我地一一打招呼，又攞咗兩支汽水送畀我地飲。  

「等我正式介紹，呢個係小詠，我女朋友，呢個係阿健，Alan同Kim！」Kim已經好熱情咁坐響小詠隔離同佢傾謁，小詠性格比活潑開朗，好容易就同其他人熟，我一啲都唔怕佢會悶。 

食完晏就各散東西，Aaron主動車Vivian返屋企，Alan 阿健就話要返學Group Project，阿君小敏就去睇戲，而我就同小詠去Shopping！夜晚我訂咗另一間Cattlemens扒房慶祝小詠生日，Cattlemens即係上年Joe同我食生日飯同一間，不過今晚我訂係另一個Location，要揸車向北行大約半個鐘先到。 

Cattlemens附近就已經有一個新起嘅Shopping Mall，其實美國啲Mall個個都差唔，都係一啲連鎖店，再加上響呢啲二三線郷下城市，真係冇乜嘢好買！不過小詠就興致勃勃要幫我買衫，結果成個下晝全都係買我嘅嘢，除咗幾件夏天短袖T恤，仲買咗一對情侶熊公仔，小詠要一人一隻放屋企！就係咁，行下食下過咗一個好Hea嘅下午。  



夜晚生日Party約咗六點，我一早叫咗Aaron早啲去幫手decorate，呢間steakhouse冇private dining room，我只可以要求畀個角落頭加張大枱，我同小詠去到所有人都到齊，Aaron幫我買咗氣球蛋糕同花，雖然一早已經知道有生日party ，不過小詠去到見到咁多人同佢慶祝都十分感動！  

晚餐食嘅都係牛扒，咁大班朋友一齊開餐真係好熱鬧，事後小詠同我講返佢真係好開心可以有咁多朋友一齊玩，嗰晚佢仲收到好多份禮物！埋單嘅時候本來Alan阿君幾個話一定要夾返錢，不過係我安排又係第一次我同小詠做生日，點都應該我請！  

禮拜日一早我就開車送小詠返三藩市，之後每隔三兩個禮拜小詠都會入嚟住一個Weekend，慢慢我住嘅Apartment開始多咗好多佢嘅嘢，直到暑假小詠正式轉校搬入嚟，同我開始三年同居生活。