一個香港留學生在美國的生活: 小詠生日(3)

禮拜六朝早大約八點我先瞓醒，擘大對眼見到響自己間房小詠靠住我膊頭瞓得好甜個樣，感覺十分幸福！尋晚係小詠第一次響我房過夜，我發現原來我冇準備任何日常生活用品畀小詠，今日一早要先去買，咁樣小詠先會住得安心舒服！  

起身著返衫褲去廁所擦牙洗面，出去見小詠仲瞓緊，於是我寫張字條話佢知我去附近超級市場買牙擦先，至於毛巾同其他日用品，就等佢起身再一齊去買。出到大廳，原來阿君同小敏都已經起咗身，我同佢哋打完招呼，等佢哋知道小詠響房仲未醒，我就直接出門去買嘢。  

超級市場好近屋企，其實唔開車行路都係十分鐘，不過嚟咗美國人就變得好懶，再近嘅路程都要揸車，買完牙擦返到屋都唔洗十五分鐘，一入門口Aaron就打過嚟：「喂早晨呀！今日計劃係點呀？除咗夜晚訂咗食飯，仲有乜節目呀？中午要唔要一齊食？話晒我同Alan佢哋都未見過小詠！」「我一陣要先去Mall買日用品，中午可以一齊食Lunch，你有乜提議？」「咁不如去我屋企附近食啦，響Freeport有間廣東菜，我最近成日去食！」「有靚女Waitress咩？成日去！你冇去搵Joey咩？」「Joey成日都見㗎啦！如果你ok咁我約Alan同阿健啦！你約阿君啦！」「咁等陣十二點見啦！」  

入到屋入面，阿君小敏同小詠已坐入到屋入面，阿君小敏同小詠已坐響飯枱食緊早餐：「小詠你咁早起身？我幫你買咗牙擦，你擦咗牙先食早餐啦！」「唔洗啦！阿君有多支新牙擦，佢畀咗我用，不如你支新嘅還返畀佢啦！」阿君：「小意思小意思，不用還，也不用客氣！」咁我當然唔會咁婆婆媽媽，「那麼多謝你！你們介紹過嗎？不用我再介紹吧！」「不用了！現在多了小詠可以眼小敏聊天逛街，太好了！」閒聊幾句後，我同阿君講：「中午一齊食飯？我約了Aaron佢哋幾個去Freeport一間廣東菜食午飯，你跟小敏有空嗎？」「當然有，那麼中午跟晚餐都一齊吃！跟小詠慶祝生日！」  

約好食晏之後，我就同小詠換衫出門買日用品，主要買毛巾內衣洗頭水等等，仲有幾套情侶碗筷杯碟，全部係小詠堅持要買。買完仲有少少時間我就帶小詠返大學參觀，小詠選修Marketing，同我同屬Business School，所以將來有部份班可以一齊讀。  



禮拜六大學冇乜人，好快行完之後我地上返車直接去餐館食晏。我雖然第一次去呢間餐館，不過一啲都唔難搵，去到嘅時候啱啱十二點，餐廳人唔多，十分乾淨光猛，入面有好多香港嘅相同擺設，一睇就知老闆係香港人。Aaron早就已經到咗，攞咗張十人大枱，佢一見到小詠就自我介紹：「Hello，你一定係小詠！我係Aaron，阿偉同學！聽咗你個名咁耐，終於見到你真人！唔好客氣，坐啦坐啦！」「小詠，你唔洗理佢，佢見到靚女就會失控亂噏一通！」我同小詠坐低，廢話完之後，Aaron轉身走咗去收銀嗰度傾謁。迷底解開啦！我終於知道點Aaron要成日嚟呢度食飯，原來真係有靚女！