一個香港留學生在美國的生活: 飯敘

食完飯揸車返宿舍途中有個小插曲「咦小詠，你唔舒服？你冇嘢嗎？」「我有小小肚痛！休息陣應該冇事！」「吓？唔會係食物中毒？」「唔係！應該係M痛！」「吓？點解唔早講？我一定唔會同你食生冷嘢！不如我依家同你去ER啦！你學校有保險！」響美國冇醫療保險，真係會死人！「唔洗，你同我去買止痛藥就得啦！已經係最後兩日，我以為食少少冇問題！我又好想食！」於是我去宿舍中途先去超級市場買藥買水，響車上先畀佢食藥，再打電話叫小玲落大門接佢返上房，夜麻麻我都係唔跟上樓啦！  

送完小詠我返去Joe度，今日禮拜日晚，條友竟然響屋企！「吊頸都要唞氣啦！你又做乜咁早返呀？好心你就帶小詠返嚟瞓啦！最多我出去瞓留間屋畀你啦！！」「唔係呢個問題，係小詠佢怕生唔習慣，同埋佢真係好攰，又要𢴇好宿舍，等佢settle down 先，將來我一定會帶佢返嚟！」「知道啦！喂！我訂咗枱聽晚食飯，小詠ok嗎？」「應該ok！我聽日全日同佢開戶口買電話，禮拜二佢學校有活動，仲有啲入學手續要辦，大後日開始我會同佢四處去玩，唔會響度瞓啦！」「明啦明啦！二人世界吖嘛！聽晚訂咗響Downtown Embarcadero 間中餐，我訂咗房六點鐘十二人枱，到時見！」 

第二日一早我就打電話俾小玲，睇吓小詠起咗身未。「早晨阿偉，小詠起咗身食完早餐，佢已經冇事，你隨時可以接佢出去啦！」「咁依家我開車，大約三十分鐘就到！唔該晒你照顧呀！」我去到宿舍差唔多十點，我泊咗車上樓，小詠已經換好衫等我，至於小玲…著住同一套Hello Kitty睡衣，極厚膠眼鏡，掃把頭，其實佢可唔可以打扮一下呢？  

今日行第一件事當然係申請Social Security，之後去銀行開戶口，又去DMV攞考車資料，攪完一輪之後食埋晏已經三點幾，仲有電話未買，反正今晚食飯響Downtown，於是我帶小詠去Union Square，近Market Street 有幾間電話舖，小詠揀咗好多女仔買嘅Motorola StarTec。  

時間差唔多，我開車泊去Embarcadero 地下停車場，雖然行路都只係十分分鐘路程，不過入夜三藩市downtown比較差，都係泊近啲好。今晚食嘅係十分地道港式廣東菜，響三藩市算係頭一兩間頂級中菜館，我去到啱啱好六點Joe，David Yoyo，Dave Maggie同Amy已經到咗，好明顯Joe又係熟客，部長見到Joe一口一個Joe少叫唔停，我當然先作介紹：「Hello咁多位，呢個係我女朋友小詠，尋日啱啱到步，小詠，呢兩位係David 同Yoyo，Dave同Maggie，Amy，至於呢個咸咸濕濕嘅係Joe，我平時出三藩市就係住響佢度！」「死仔包你咁樣介紹我！」呢個時候Amy:「小詠，你過嚟呢邊坐啦，我地幾個女仔坐一齊傾下謁！」聽到Amy咁講，我個心離一離，希望Amy唔會亂噏！  



小詠個人其實好開朗，好快已經同幾個女仔打成一片，過咗十分鐘，Sam同Joyce 都到埋，唯獨是Anita冇嚟，David:「齊人啦，Joe，你點菜啦！」Joe:「我早就點咗，我出去叫人上菜！」  

呢一晚菜色十分豐富，鮑參翅肚樣樣齊，水準絕對唔比香港差，食完餐飯，小詠已經同幾個女仔交換咗電話，仲約埋過兩個禮拜一齊出去行街食飯！睇嚟就算我唔響度，小詠都唔會太悶！  

食完飯大約八點半，大家決定行過對面Ferry Building食雪糕，Embarcadero夜晚風景好靚，望海可遠眺海灣大橋，燈火璀璨，加上三藩市基本上冇乜空氣污染，同香港好唔同，所以天氣好嘅時候，係可以睇到滿天繁星，「阿偉，呢度好靚啊！」「你鐘意呢度？咁你後日一定會好驚喜！」「點解？」「我唔話你知！到時你咪知囉！」「好衰㗎！唔話我知！」「哈哈！等你心思思吖嘛！」