一個香港留學生在美國的生活: 王將

同Amy食完High Tea之後我就開車返去小詠宿舍，我打咗個電話畀小玲，佢話小詠仲瞓緊，我睇吓個鐘，已經五點，如果再瞓，今晚實眼光光到天光，咁好難較返時差，「不如叫佢起身先，我同佢出去食啲嘢，返嘢再瞓過？」「咁我試吓叫醒佢啦！你要唔要先上嚟？我開門畀你？」「唔好啦，我泊咗車響正門，我響車入面等啦！」話晒都係女生宿舍，我一個男人上去始終唔係咁方便，費事嚇親小玲。  

我等咗差不多一個小時小詠先落嚟，佢個樣仲好攰，不過冇法，第一日一定要頂住，希望佢今晚可以一覺瞓天光！「我知你辛苦啦！不過你要撐住，今晚先再瞓，咁樣你先可以較到時差！」「我明嘅，其實我都想起身見你同你食飯！係呢，我地有乜計劃？去邊度食？咁你今晚瞓邊呀？」「我呢兩晚會響Joe屋企瞓，其實你可以一齊，不過我怕你唔方便去另一個男仔屋企住，不過我都約咗Joe同其他朋友聽晚食飯，順便介紹你畀佢地識！之後兩個禮拜我打算同你四圍去玩，我book好晒地方啦！除非你有其他plan啦！」「我冇plan呀！我乜都聽你架啦！」「好！咁我地去食飯先！你想食乜？」「我乜都食！好肚餓呀！你話事啦！」「咁我地食日本嘢啦！」 

於是我開車出發，冬天三藩市好早天黑，六點未到已經烏燈黑火，三藩市夜景其實好靚，記得上次Joe帶我去過Twin Peaks，有機會我都要帶小詠去睇下。沿住101公路向南，其實已經出咗三藩市，大約半小時左右，返到去機場附近，「咦？呢度咪機場？今朝咪嚟過？」小詠好奇咁問！「係呀！咁黑你都認到！叻女喎！」「嘩！咁大架飛機響頭上飛過！點可能認錯呀！」「我帶你去呢間日本餐係台灣人開，我食過兩次，好有水準㗎！」  

響停車場泊好車，我拖住小詠入去餐廳，我開車時已訂好二人吧枱，上兩次同Joe嚟食已經認識咗老闆，入到去經理帶我地坐響吧枱最右邊嗰個位，唔好以為係角落頭位呀！其實係坐正老闆前面，頭上仲吊咗隻雞泡魚標本！老闆一見到我就好熱情咁同我地打招呼，呢間日本餐廳響三藩市算好有名，唔訂位真係有排等！全晚壽司都係老闆發板，水準絕對一流！今晚主角係吞拿魚，老闆話前日啱啱入咗條四百磅大吞拿，劏好處理完要熟成，今日開始可以買！佢留咗最靚最肥嗰舊大拖羅問我要唔要，我更係話好啦！結果全晚食咗三舊水，響1997年算係好貴！真係肉都赤！不過真係好食，往後幾年當我出三藩市都會同小詠嚟呢度食，每次都會坐同樣呢兩個吧枱位。  

P.S.  呢章係特別寫嚟記念王將老闆兼好友，我一般唔會將餐廳名字寫出嚟，不過王將比較特別，我對呢間餐廳好有感情，老闆大約響2009、2010左右，我都唔太記得，決定退休，餐廳賣咗，正當佢要享受退休生活，點知三個月唔夠就急病離開了！以後餐廳又再轉過幾手，不過都係垃圾級別，依家每次開車經過都會回憶起當年嘅點滴，無限傷感唏噓！