一個香港留學生在美國的生活: Exploratorium

禮拜二小詠約咗學校counselor見面，由於佢過晒deadline先報名，需要選科登記同補辨入學手續，學校雖然放緊聖誕假，不過General Office都仲辨工。小詠全日都響學校跑嚟跑去，佢話有小玲陪，叫我休息一日，所以我大條道理瞓到黃朝百晏先起身，同Joe食完晏跟住做Gym，夜晚再去接小詠晚飯。  

禮拜三係十二月三十一日除夕，一早我就𢴇好行李出門去小詠宿舍，Joe當然係未起身！我尋晚已經同佢講咗我會同小詠出去玩幾日，下禮拜先會返，到時小詠可能都會響度瞓，Joe當然話冇問題啦！  

大約十一點到去到宿舍，泊好車上樓，小詠仲梳洗緊，我就同佢講：「你𢴇定一個禮拜衫褲啦！我帶你出去玩幾日！」「吓！點解依家先講！我邊𢴇得切呀！」「驚喜吖嘛！求其𢴇幾件啦！唔夠到時買囉！返嚟攞都仲得！又唔係坐飛機去好遠！」其實我只係安排附近幾個比較近嘅景點去玩！我只想有啲二人世界時間。  

小詠𢴇咗一個手提行李，我幫佢攞落樓，小玲好羨慕咁望住小詠離開，我估佢人生應該幾苦悶，我絕對相信Your Face Your Fate，如果佢唔𢴇下個樣改變下衣著，恐怕都幾難有仔溝佢！  

「我地依家去邊呀？」「我地食晏先，我同你返去Ferry Building食吖？嗰度有好多好食又有特色嘅餐廳！」「好呀！你話事啦！」我泊咗㗎車響Ferry Building斜對面嘅公共停車場，行返過馬路就係一間好出名食海鮮嘅餐廳，主打生蠔龍蝦蟹類，由於禮拜三中午，唔洗訂位都有枱，我地上咗二樓坐響窗邊望海嘅二人枱，氣氛都唔錯！小詠睇嚟好興奮，今日天氣好，窗外萬里無雲，海上有無數風帆，海鷗，十分寫意。我地叫咗生蠔Clam Chowder同Lobster Roll，食完之後我就帶小詠去咗隔離嘅Exploratorium！我都係第一次去，中文好似翻譯做探索博物館之類，入面有好多同科學實驗有關嘅展覽，非常有趣，我同小詠玩咗成個下晝，響入面睇咗兩套紀錄片，仲做咗個解剖牛眼實驗添！  



大約六點左右，我地離開Exploratorium，今晚除夕夜我訂咗一間Michelin 1 Star 法國餐廳，八點鐘枱，從酒店步行三分鐘就到，我冇同小詠講，直接去酒店Check-in，我訂咗間Boutique Hotel，係一楝十九世紀嘅古舊建築改建而成，翻新後十分豪華現代化，就響Embarcadero同Market交界，我訂嘅係頂樓180度海景套房，價錢就唔講啦！不過絕對係物超所值！小詠家境中上，佢響香港間屋都係薄扶林2000尺豪宅，不過佢入到酒店房都不停咁「嘩嘩嘩！」180度落地玻璃，無敵大海景，「今晚十二點有新年煙花匯演，如果唔係早兩個月有人退訂，我都訂唔到呀！」「多謝你啊！阿偉！我好鍾意呀！」「最緊要你開心！」小詠企響窗前望住Ferry Building同San Francisco Bay，我從後抱住佢，聞住小詠嘅髮香，小詠全身放軟靠響我身上，我深深咁𡃶咗佢一下，「我哋差唔多要去食飯，我訂咗枱，食完返嚟再睇過啦！」「我有啲唔捨得，唔想走！」「我book咗三晚，你可以慢慢享受！行啦！遲到冇得食吖！」