一個香港留學生在美國的生活: 緣份

「Amy？」「咦？阿偉？咁啱嘅？你出咗三藩市？」「係呀！又會咁啱響度見到你！」「估唔到你一個男人嚟Neiman Shopping喎！」「哈哈！我都鐘意行街Shopping嫁！」「係呢，點解你一個人？Joe呢？」「我啱啱接咗我女朋友機，安頓咗佢響宿舍，佢休息緊，我諗住行下街夜啲先去接佢食飯囉！咁你呢？又係一個人Shopping？」「女人好多時都係一個人Shopping㗎啦！有乜特別呀！係喎，我記得你女朋友廿八號到！幾時帶佢出嚟見下面呀？」「過幾日啦！我同Joe講咗大家出嚟食晚飯！到時通知你！」「好呀！喂，你反正得閑，幫我手揀下邊隻香水好？」我同Amy企咗響Chanel counter前面，佢之前已經試咗四五隻味，「阿偉你鐘意邊隻味呀？我手同耳背噴咗唔同味，你幫我聞下？」Amy申隻手去我鼻前面，我聞一聞，之後佢又申個頭過嚟，面同耳幾乎貼住我塊面，我差啲忍唔住就𡃶落去！個Sales就話：「你男朋友好可愛好靚仔喎！等佢幫你揀啦！」點知Amy冇否認，仲話：「我就係等佢揀，香水就係畀身邊人聞吖嘛！」嘩！咁樣Flirt我，我唯有當聽唔到！我真係唔知點解佢知道我有女朋友仲咁進取！為免繼續尷尬，我就話：「呢支啦！No.19，其他味道比較老成，唔多啱你！」Amy諗都唔諗：「咁就呢支，包起佢啦！」個Sales好高興咁去開單，我就同Amy講：「不如等我呢個臨時男朋友買畀你啦！」其實我係試吓佢反應，好彩佢話：「講笑咋！點會要你畀錢！我又邊有咁幸福有個咁好嘅男朋友呀！」佢笑住咁對住我講！我真係呆哂唔識答佢！呢個時候個Sales返嚟，竟然問都冇問就隊咗張單畀我，畀錢唔係問題，問題係我唔想畀個錯誤信息Amy，好彩最後Amy冇要我畀，佢攞咗張單自己簽。 

比完錢，我好自然咁幫佢攞住支香水，「好啦，我就買完啦，咁你呢？」「我其實想買件小禮物畀小詠，不如你幫下眼啦！」「咁你心目中有啲咩野想買畀佢啊？」「我打算買個可以吊喺背囊後邊嘅公仔鎖匙扣，好似啤啤熊仔之類，你有冇介紹呀？」「你女朋友咁可愛，我都估到你會買啲咁嘅小飾物畀佢！你跟我行啦！去後面買銀包手袋睇睇！」於是我同Amy好似拍拖咁去Shopping！老實講，Amy真係好索，定力少啲都會出事！我哋去咗LV真係搵到隻熊仔鎖匙扣，我諗都冇諗就決定買咗佢，畀完錢，Amy：「仲咁早，不如去食下嘢？」「一係上樓上high tea，如果唔係，後面有條Ally有間deli都幾好食㗎！你㨂食乜，我請！」Neiman Marcus四樓有間餐廳，都幾有名，響正個彩色玻璃天幕下面，氣氛唔錯架！「咁不如上四樓食下午茶啦！我唔客氣啦！」  

我同Amy上到餐廳，要咗個窗邊二人枱，再叫咗high tea set for 2，完全係情侶拍拖一樣！不過我地之間嘅對話全部都係有關shopping，我地有講唔完嘅話題，同Amy一齊感覺舒服自然，我相信佢都有同樣感覺，可惜我地注定冇可能再走多一步，我再感覺唔到佢對我有特別表示，不過如果你問我，我絕對有心動過，我只可以講right person wrong timing。將來會點，到時再講啦！