一個香港留學生在美國的生活: 偶遇

返到宿舍小詠先去沖涼，我就留響房幫佢𢴇行李，小玲就好似好唔慣有男仔響佢間房，我一路𢴇一路同佢傾謁「唔好意思呀！我好快𢴇完，唔會阻你好耐！」「唔會唔會！你慢慢𢴇啦！依家仲放緊假，冇嘢做！」「係呢，我見個Dorm放假冇乜人，應該返晒屋企，占解你唔返屋企呢？」「我屋企人全部響香港，爸爸媽媽聖誕已經嚟過探我，佢地工作好忙要四圍飛，所以我依家返去屋企都冇人，不如留返響度好過。」「呢幾日我會同小詠四圍去玩，咁你要唔要join我哋呀？」我禮貌上做個樣都應該問下，「哈哈！唔好啦！做電燈胆咩！」「你冇男朋友？可以一齊喎！」如果佢咁毒個樣都有嘅話…「我冇啦！」咁我都估到啦！不過佢人性格好隨和！我估小詠同佢住應該唔錯。  

好快小詠沖完涼出嚟，我見佢真係好攰，小玲又響房度，我決定等小詠好好休息，今晚再接佢食飯。由於小詠仲未有電話，我唯有同小玲交換咗電話，聽日禮拜一再去處理電話銀行信用卡，仲要去學校做入學選科，就好似我啱啱到步Joe同我做嘅一樣！  

我當然希望可以同小詠二人世界啦！不過我又唔想小詠住響Joe屋企，話晒Joe日日帶唔同女返屋企過夜，我驚小詠會嚇親！宿舍又有小玲，唔可以屈蛇！小詠要響宿舍休息瞓覺，我就變咗無所事事，一個人四圍逛又太無聊，呢個時候，收到Joe嘅電話：「接咗小詠未呀？」「早就接咗啦！啱啱食完晏，送咗佢返宿舍休息瞓覺，今晚再同佢食飯。」「不如今晚一齊食？你定係想二人世界？」我諗咗陣：「不如過兩日再約，我聽日開始會同佢四圍玩下，Book好晒地方啦！」「吓？我仲以為你同小詠會住我度？」「遲早都會，不過佢啱啱到步，又未認識你，唔好嚇怕佢啦！」「我有冇咁恐怖呀！」「你尋晚又咁夜返咪冇同你講囉！我今晚食完飯返嚟先再傾啦！」  

收咗線之，睇下隻錶，三點未夠，我一個人開車最後去咗Union Square，打算呢幾個鐘去Shopping，仲可以買份小禮物畀小詠。San Francisco Union Square就好似Pacific Place 同IFC，名店林立，十二月尾假日氣氛十分濃厚，四處都係新年嘅裝飾，又係禮拜日，真係人山人海！其實我以前同Joe都嚟過幾次，所以都算熟路，我決定去Neiman Marcus逛逛，買件小飾物畀小詠做禮物！一入到正門，係香水同化妝品部，往上望係五層樓高嘅七彩玻璃天幕，店舖走嘅係高價貨路線，當我準備走到入面買名牌手袋區睇下有冇啲可愛吊飾可以掛響背囊嘅時候，我見到一個熟悉嘅身影！