一個香港留學生在美國的生活: 健身(2)

呢嗰時候有個男仔入咗嚟：「Hi Joey，一位，奶茶少甜，公司通粉！唔該哂！」我望一望，好熟口熟面喎！咁啱個男仔又望過嚟「咦！你係唔係同我同一班Accounting？」我呆咗幾秒，係喎！唔怪得咁熟面口啦！「係呀！Prof Smith嘅 Accounting 1！」佢主動走嚟握手「你好，我叫Aaron，香港人。」「我叫阿偉，啱啱香港嚟美國第一個學期！」「我都係第一個學期喎！你住呢度附近？」「我住近學校，我嚟呢度要揸廿分鐘車。」「嘩！你都好特登嚟食喎！」Aaron望下Joey「我尋晚先第一次嘢食，今日打算去隔離做運動，咁咪順便嚟食個晏囉！係呢，你住呢頭？距離學校好遠喎！」「我屋企嚟呢度兩個Block，我住響我姨媽度。你去24hr Fitness？我都係喎，不如一齊呀？有伴做運動好啲㗎！」於是我同Aaron就坐埋一枱，準備食完晏一齊去做Gym。  

Aaron絶對係型男，身高起碼180，一睇就知做開運動，佢唔係大隻筋肉型，不過絕對係有線條有腹肌，加上佢真係有啲似郭富城，我估佢應該好受女仔歡迎。食晏嘅時間了解咗好多，原來佢都係畢業於香港頂尖男校，我地同年會考，佢會考完就過咗嚟讀中學，我住港島西佢住九龍塘，咁大家就有好多共同語言啦！真係有啲相見恨晚嘅感覺！  

Aaron對做Gym十分有經驗，佢完全知知道所有器械嘅用法，最緊要係佢已經練咗兩三年，我同佢一齊玩咗兩玩，結果Aaron變咗做我私人教練。  

玩咗一個鐘我已經冇晒力，Aaron就叫我去休息陣，佢要做多半個鐘先夠，我坐響旁邊，見佢舉一百五十磅可以舉成十下，真係好羨慕！我舉三十磅都舉到氣咳呀！  

跟住我去咗沖身準備游水，Aaron就要返屋企攞泳褲，好彩佢住得近，十分鐘左右就返到嚟。游水我就畀Aaron好，終於可以揾返少少自信，游咗四五個塘就去咗浸Jacuzzi，Aaron 就話：「阿偉，如果你想增磅，齋做Gym唔夠㗎，你最好飮食方面加多啲Protein，你又可以買啲健身用嘅奶粉，一日三餐，我包你三個月見效！」「咁我一個禮拜要做幾次Gym呀？」「做三到四日啦，分開做效果好啲！」  「好！就咁決定，咁我地約好時間一齊做！我要練大隻！」