一個香港留學生在美國的生活: 健身(1)

食完晏Alan佢哋各自返屋企，Joe就陪我去買日用品，依家有自己地方，可以住得舒服啲。夜晚我同Joe兩個人出咗去食飯，去咗南部一間港式Café，店主係香港人，除咗港式奶茶之外，仲有焗豬扒飯，味道唔錯。  

Joe「呢區唔錯喎，好過學校附近，長遠你應該搬嚟南區。」我食住豬扒話「過多年先啦！啱啱先同阿君住，租約仲有十三個月。」「咁你有冇入24hr Fitness呀！呢個strip Mall 已經有間，入咗會間間都去得！我可以帶你參觀下！」「都好喎，咁食完飯去啦！」  

Joe係會員，我用Guest身份入去參觀，仲有個職員帶路。其實呢啲健身中心響美國十分普遍，好多人會嚟做運動，入面都係一啲跑步機健身器材，地方好大，呢嗰location仲有一個標準游泳池同Sauna，不過距離我住嗰度比較遠，要成廿分鐘車，而我住嗰度附近間24hr Fitness就細咗啲，冇泳池。不過我都決定做會員，做下運動都好吖！更何況我真係有啲瘦，178cm得嗰130lb，正常應該有145-155lb。  

依家我有自己地方，Joe 可以留低過夜，禮拜日先走，我就同佢孖舖，「喂，你thanksgiving 有冇嘢做呀？冇就出嚟三藩市啦！」「好呀！嗰禮拜好似放足五日，連weekend有九日咁多，我抽三四日出嚟揾你啦！」「咁就約實啦！趁你個小詠仲未過嚟，同你玩盡佢！」「你又想點呀？」「到時你咪知道囉！」  

禮拜日一早Joe就走咗，佢話中午有school project，咁我一個人就打算去Gym玩下，𢴇咗運動衫同泳褲，打算去南面比較大啲嗰間，我先去尋晚食飯間Café食晏，叫咗杯奶茶加件餐蛋治，響嗰度嘅waitress認得我「乜有嚟食咁捧場呀！」「係呀！我嚟咗美國冇耐，好掛住香港啲食物，咪多啲嚟食囉！」「我地呢度又真係好多香港人嚟食嘅！」「我叫阿偉，點稱呼你呢？你係呢度老闆？」「哈哈！我打工咋！我係學生，我叫Joey，今日老闆唔響度！你呢？你都係學生？」「我係State U一年級學生！」「哦，我啱啱先入咗City College，打算兩年後先Transfer State U。」我估Joey應該十七八歲左右，高高瘦瘦，扎住馬尾帶住眼鏡，唔算靚不過亦唔醜，不過對腳十分瘦長！