一個香港留學生在美國的生活: 再遇京子

今日係開學第二日，早上一堂 Calculus，下晝一堂ESL。Calculus 一早同阿君約好一齊食早餐再結伴上堂，阿君為人十分友善，我同阿君好夾，談天說地，無所不談，好快已經有相見恨晚嘅感覺！上完Calculus，基本上冇乜特別，呢堂課教嘅嘢我中六已經學哂，攞A絕對冇問題。阿君就話不如一齊食晏，我堂ESL係兩點半，反正一個人，於是我同阿君又去 Canteen食，食物基本上冇乜變化，我估以後我應該學下煮飯，日日出街食真係唔惦！ 

食晏嘅時候，我同阿君講到住屋問題，阿君原來自己一個人住個兩房Apartment，佢係年頭一月入學，已經揾咗個roommate一齊住咗大半年，點知佢roommate屋企有事要返馬來西亞，八月尾退學走咗，依家佢一個人住，不過佢冇再揾roommate，佢話三唔識七唔想求其揾人住，跟著佢又問我住邊，咁我咪開始吐苦水，講到上個禮拜半夜我去痾尿，突然見到阿婆塊面貼咗塊面膜響客廳四圍行，嚇到我尿都唔敢痾！阿君聽到呢度大笑不止，佢話揾日要去我屋企見識下！「其實你有沒有想過搬出來住？寄人籬下始終不是那麼好！」阿君問我「我啱啱先住落，阿婆又係我Uncle嘅阿媽，住咗唔夠一個月就搬走好似唔係幾好！話哂免租免伙食，起碼住一個學期先啦！」「如果你唔介意，可以搬來和我同住，反正只有我一個人！」「好呀，年尾再商量商量！謝謝你！」今次我用不太標準嘅普通話回答。  

食完晏同阿君分別，我就差不多夠鐘上第一堂ESL，English Department 響大學另一邊，不過距離Student Union 都好近，行路十分鐘就到。ESL係每個留學生必需生讀嘅班，阿君已經讀咗，讀完要考個written proficiency exam，有好多課程要pass咗呢個test先可以讀，我去到班房，絕大部分學生都係Asian，我照樣揾咗個靠後嘅位置，我一坐低，發學身邊坐位竟然係京子！  

「Hello 阿偉，估唔到又見面，你好嗎？」我估唔到京子一眼就認出我，我呆咗幾秒先認到佢！今日嘅京子帶咗副眼鏡，著住t shirt 短褲波鞋，皮膚好白，係白裏透紅嗰種「Hello 京子，又見面啦！估唔到咁啱大家同班！」「我已經第三次讀呢班，我英文唔太好，考咗兩次都fail！」咁日本人啲英文係差啲嘅！「唔緊要，你今次一定pass！」「多謝你！今次再唔Pass就慘啦！好多班唔可以讀，今個學期我只有ESL呢一堂！」「咁你平時咪好得閑？」「返工囉！我上完堂就要返餐廳，不如你今晚過嚟食呀，師傅日本人，食物唔錯㗎！」「咁好呀！我今晚去試試」  

呢堂嘅老師唔係 Professor，係一個讀緊 Master 嘅助教，伊朗人，英文口音好重，不過佢係主修英文，教得清楚明白，其實就係寫文技巧，對於香港人嚟講唔係太難，話晒我會考同A-Level 英文都攞B，過關應該OK！