一個香港留學生在美國的生活: 新朋友

十二點未到就落堂，下晝仲有一堂 Econ就可以收工！我見時間仲早，我決定返車放低個背囊先再去Canteen同Alan阿健滙合。學生停車場其實好鬼遠，九月份呢個城市天氣十分熱，中午差不多三十四五度，又萬里無雲，我行到架車度已經身水身汗！跟著仲要行返轉頭！  

去到Canteen，Alan同阿健已經到咗，我同佢哋打咗招呼就去咗攞嘢食，返到張枱，竟然多咗個女仔，個樣唔多似香港人喎！我行到去，Alan就話「阿偉，呢個係我女友Kim，Kim係馬來西亞華僑，讀緊Communication。」「你好，我係阿偉，今日第一日返學，好高興認識咁多新朋友呀！」阿健就話「呢間大學兩萬幾人，香港人只有兩百幾，仲有要分到好散，連個同學會都冇，如果有乜要幫手，揾我同Alan啦！」  

我哋就係咁，一齊食咗餐晏，再約定今晚去Alan屋企食飯，之後各自去上堂。  

Alan家人住響三藩市，佢中三全家移民到美國，之後響三藩市讀中學，佢住嘅Apartment好近學校，兩房兩廳，佢同阿健合租，Kim則同Alan同居生活，阿健家人都住在洛杉磯，同樣係讀中學時就移民。  

天氣太熱，我返咗屋企先沖個涼，換返T Shirt 短褲拖鞋先再出門口。我先去附近超級市場買咗個生果盤，開車去太約十五分鐘，入到屋除咗Alan阿健同Kim，仲有另外一個新朋友阿君。阿君都係馬來西亞華僑，同Alan一樣讀Business School，我同阿君互相介紹之後，發現原來我同佢讀同一堂Econ 同Calculus！ 阿君同Kim啲廣東話其實麻麻地，佢地母語係普通話，好在我普通話都唔差，溝通冇問題！  



Alan係大廚，佢響廚房煮飯，阿君同阿健響房入面整電腦，阿健部機好似上唔到網，阿君對電腦有啲研究，所以上嚟睇睇，順便食飯。我就響客廳同Kim傾計，Kim其實好有古代美女feel，身材高挑修長，起碼有172，眉毛很細致眼很大，鼻高脣薄，佢對腳應該有34-35吋！「阿偉你剛剛到美國，有女朋友嗎？要是沒有，我可以介紹唷！」「哈哈！唔洗啦！我女朋友響香港，遲啲會過嚟嘅！」我都係用廣東話答。「那麼她到了要介紹，我們女生有個伴！」「一定啦！到時要麻煩你照顧！」「你真是的！到時候你跟她住在一起，那用別人照顧！」係喎！住響滅絕師太度，唔係長久之計！真係要計劃下，點樣搬出嚟自己住！  

Alan真係好勁，一個人煮五個人飯，四餸一湯仲有糖水！青紅蘿白湯，鎭江骨，美極前大蝦，蔥油雞，腐乳炒通菜再加蕃薯糖水！呢一餐係我響美國食過最好嘅一餐，好溫馨好有住家Feel啊！