一個香港留學生在美國的生活: 開學

今日第一日返學，我七點半出門口，返到學校已經八點幾，第一堂課係9:10a。我報咗accounting 1，ESL，government 1，calculus 1，US History 1。ESL English as Secondary Language係畀留學生讀嘅，聽日先上堂，今日第一堂係Accounting，泊好車，跟住去車尾箱攞背囊。要用嘅書上個禮拜已經買哂，真係好鬼重，呢度讀大學乜嘢都放響車入面，等於放Locker，本 Accounting 仲重過本黃頁，我放咗入背囊，見咁早，決定去Student Union 食啲嘢先。  

大學係有 Meal Plan，我買咗Monthly Plan，一個價錢一個月內可以任食，今日我第一次用張 Meal Card，入到去Canteen，地方好大，係自助餐形式，可能仲早，人流唔多，不過一個中國人臉孔都見唔到！我揾咗張細枱，放低背囊，跟住去攞嘢食。  

食物水準一般，嚟嚟去去都係Pizza，burger，炸雞之類，最後我攞咗麥皮香蕉加隻蛋做早餐，一個人慢慢嘆！  

快到九點，食完早餐，孭住背囊，準備去上堂。我望住手上學校地圖，Business School 就響 Student Union 後面，行路三分鐘就到，呢間大學地方好大好空曠，四週綠草如茵，最高嘅建築物唔高過三層，慢慢地，我開始見到亞洲人臉孔，有幾個我估計應該係香港人，仲有好多學生坐響草地上睇書傾計，冇耐我已經行到課室門口，9:02a，課室入面已經坐咗一半人。呢班係Business Major必修課程，讀嘅人好多，我估呢個Lecture Hall大大話話可以坐四五百人！我入咗去，揾咗個靠上面嘅角落頭位坐，過咗五分鐘，多咗兩人坐我隔離，我一睇就百分百肯定係香港人！點解？係直覺！同文同種同聲同氣嘅感覺係唔會錯嘅！果然，佢兩個用純正港式廣東話「我哋有冇入錯課室？」「應該啱卦，我尋日已經探過路，應該冇錯！」作為一個剛剛到美國嘅毒男，我即刻自我介紹「hello你好，我叫阿偉，香港人，啱啱到美國，今日第一日上堂！你哋都係香港嚟？」「係呀！你好！我地都係新生，我叫Alan，佢係阿健！」阿健：「你好阿偉！呢堂係唔係Prof Smith Accounting 1呀？」「應該係，我都係報咗呢一堂」「聽講呢個Professor好懶，乜嘢都叫assistant做，試卷年年都一樣！」阿健好似做足功課先選班，Alan 就話，易就易，不過咁多人，得10%人可以攞A，一啲都唔輕鬆！」呢個時候Professor 入課室，大家開始上堂。  

第一堂不外乎professor 自我介紹，派exam schedule 同syllabus，美式英文同英式好唔同，我聽得好辛苦先聽明大半！好彩Alan同阿健寫低哂啲 Notes！我遲啲唔明可以問佢地！最後，唔夠三十分鐘就落堂。下一堂係US History，阿健同Alan上唔同嘅課，於是我地交換咗電話同ICQ，約定中午響 Canteen 再見！