全實景系列《香檳大厦 1:55 am 行人止步》重製版 (已完結): 第二十章:【百密一疏】
![](https://i.imgur.com/VgBTAaB.jpg)
2:48 - 香檳大廈5/F 行刑房內
小冰喊到收唔到聲,坐喺一邊崩潰了,史提芬同樣震驚得講唔到嘢,眼淚不由自主咁流出嚟。
「點解會咁㗎!」史提芬簡直唔相信自己睇到嘅嘢,明明只係幾個鐘頭前先見過佢,如今佢就出現喺眼前呢個冷藏櫃內,一動也不動。
雖然見面時間唔多,平時只有開團隊會議時大家先傾得多偈,但跟住佢做嘢都幾舒服,又幾照顧班同事,都算係夾得嚟。如今眼前嘅景象實在令人無辦法接受。
冷藏櫃內有一個脫得清光嘅人,被瑟縮喺呢個細小嘅空間,手手腳腳被摺起,打側咁瞓係櫃底,頸上有一個深紅色嘅繩痕,史提芬認得,呢個人就係黃經理。
黃經理死了。
一個自己識得嘅人,佢嘅屍體正正擺正喺自己眼前,史提芬個腦一片空白。
佢只係一個學生,死亡、謀殺、屍體呢啲概念就只有平時喺港聞版上先會見到,佢無諗過原來死亡係如此接近。剛剛下午史提芬先喺辦公室同黃經理傾完偈先出發上香檳,都未夠12個鐘,黃經理就死了。
史提芬感覺到所有嘢都好唔實在,佢唔想相信呢件係真嘅,但旁邊小冰嘅哭聲不斷地將佢拉返去現實。
佢一步一搖咁行過去小冰身邊,默默地攬住佢,小冰的確係受驚過度,情緒失控,呢一刻最需要安慰。小冰同黃經理兩個都係全職同事,兩人相處嘅時間比史提芬佢地啲兼職同事更多,感情也更深厚。史提芬知道小冰有好多回憶宜家都會一下子湧出來。
哭如淚人嘅小冰六神無主,只係喊過不停,腦海中不停地浮現著今晚經理同佢講嘅最後一句說話 -
「食宵夜嗎?」黃經理笑住問佢。
呢一個係小冰對黃經理最後一個活生生嘅印象,佢知道以後都唔可以再聽到佢把聲,聽到佢講嘅冷笑話,佢腦海入面嘅畫面被劇烈動搖了。
「小冰……小冰……」史提芬輕輕搖一搖小冰,喺佢耳邊壓低聲線說:「小冰,我地……要諗辦法走……出去報警……」史提芬喉嚨乾涸,聲音沙啞。
見到黃經理屍體嘅同時,史提芬不得不諗宜家佢地嘅處境:「既然黃經理喺呢度死咗,下一個死嘅會否輪到佢地?」一諗到呢度,史提芬全身血液彷彿凝住,呼吸也窒息了。
所以佢忍住悲痛,攬住小冰,喺佢耳邊急切咁講:「如果我地再唔諗辦法,權叔一定唔會放過我地㗎……」佢吞一吞口水再說:「……尤其是我地已經知道……呢啲死人同佢有關……」
小冰聽完史提芬呢句,整個身子立時震動了一下,恐怖感油然而生。經歷過權叔嘅威脅、五條吊死嘅屍體,而且黃經理都已經死了,佢地又被困喺度,被殺係遲早嘅事。
「咁點算?」小冰眼中仍然滴住淚水,思想已經混亂,無辦法再理性思考,佢覺得好虛弱。
史提芬又再望住自己部電話,仍然係處於無訊號狀態,而且電量唔多,得返30%。佢閂咗手機屏幕嘅光,盡可能保留電量。
史提芬拖住小冰隻手,行過去黃經理屍體嗰邊,將玻璃門拉上,關閉了一組冷藏櫃嘅燈,宜家淨返另一組空置冷藏櫃嘅燈仲亮著。佢將手放喺剩低嘅玻璃門上,徐徐關上。
一片漆黑。
小冰隻手揸到史提芬手臂好實,而史提芬則全神貫注望實周圍環境,一秒……兩秒……三秒……四秒……五秒……
一盞極小嘅紅燈係不遠處嘅天花板閃了一閃。
紅燈代表住有儀器在運作中,喺咁黑嘅環境都運作緊,只有夜視功能嘅鏡頭先做得到。而鏡頭後係咪有人監視住佢地呢,呢個無人知。
「權叔宜家可能透過個閉路電視監視住我地。」史提芬停了一停,再講:「希望佢宜家真係睇住我地吧。」
「吓,點解咁講呀?」小冰打了個突,唔係好明白點解史提芬會咁講。
史提芬沉默起來,無再解釋更多。佢再次撳著自己部電話,一張Ironman嘅解鎖圖案閃咗出來,然後快快手按了密碼解鎖,喺電話嘅圖片庫入面,不停咁向下掃。
小冰用手抹走自己啲眼淚,想睇清楚究竟史提芬做乜嘢。
「搵返啦……」史提芬手指停咗係一幅相到,佢按一下進入,圖片放大了。小冰見到張相入面桃紅色嘅背景,一串串嘅燈泡,驟眼睇就好似係喺姐姐仔啲房入面影。
「有乜特別呀?」小冰好奇怪史提芬搵張咁嘅相出嚟做乜,張相似乎唔太可能幫到佢地解決目前嘅困境。
史提芬用兩隻手指放大張相,拉去一角睇,呢一刻小冰立即恍然大悟,但跟住又搖搖頭,不明所以。
放大嘅部份係一張通告,上面有一個Logo寫住「紫藤」,「紫藤」係一間關注性工作者嘅組織,由一群關心婦女權益嘅人士組織而成,主要服務一啲本地以及內地來港,俗稱「七日鮮」嘅女性性工作者。
通告上係一張緊急求助熱線嘅列表,上面列出晒附近地區嘅警署電話,最後一欄仲有一個手提電話號碼。
「好彩真係有,係呢個啦﹗」史提芬自忖。
「呢個係乜嘢電話呀?」小冰問。
「尖沙咀警署嘅報案電話。」史提芬一邊答,個口不停咁背嗰組電話號碼。
「但呢度都收唔到電話,你搵到都無用啦……」小冰不禁懷疑史提芬係咪真係了解宜家嘅情況。
其實厚厚嘅牆身又唔一定會封鎖得住網絡嘅訊號,但之前史提芬試過搵網絡又連接唔到,小冰估計權叔喺呢個單位入面加裝咗一啲可以影響電話訊號發放及接收嘅嘢,導致打唔到任何電話或者訊息出去。
「史提芬,你有無聽過有啲物料可以隔絕電子訊號?」小冰不等史提芬回應就繼續講:「權叔可能就係知道我地點都打唔到電話出去,所以先唔理我地,如果唔係無理由佢喺度見住我地用電話都無任何反應㗎?佢應該第一時間入嚟㗎……其實我地宜家係咪做乜都無用啦……」講到呢度,小冰啲眼淚又竄了出來。
史提芬停咗手上面嘅動作,透過微弱嘅電話屏幕光線,堅定咁望住小冰,說:「小冰,乜都唔做我地死得仲快呀﹗」
小冰無言以對,只有眼淚不斷滲出來,佢諗起屋企人、好朋友、好同事,仲有黃經理嘅下場,就更加控制唔到自己慌亂嘅思緒。
史提芬又專注返落手提電話度,只見佢將剛剛搵到嘅電話號碼,輸入去短訊息欄中,然後係下面飛快地打了一連串嘅字。
「究竟你想做乜嘢?」小冰按奈不住地問。
「做戲。」史提芬嘅答案直接卻令人摸不著頭腦。小冰撐大對眼望住史提芬,等待佢解釋落去,但史提芬又再次專注於打字,無理會到小冰。
「各位大佬有怪莫怪,我唔係有心影你地㗎,我地都只係想走出去咋…」史提口噏噏咗一輪,就用部電話對住最近嘅吊死男屍影咗幾張相。
閃光燈閃過,男屍已經蒼白嘅面孔映入小冰眼瞼,攝著了佢,既令人毛骨悚然又詭異嘅相片出現係史提芬手機內,但史提芬半點都沒有分神。
史提芬滿腦子都諗住自己計劃到底行唔行得通。
「呢場戲要點做先可以呃到權叔入嚟?」史提芬內心不斷爭扎,佢望住手機電源,心裡暗暗著急:「死火﹗得返18%……」
第一樣嘢佢要肯定嘅係權叔真係睇住佢地嘅舉動,否則戲都係白做;其次嘅係如果權叔唔相信佢地接住落嚟嘅戲,而最後電話又無電嘅話,咁就真係Game Over喇。
而且,要令小冰都入戲,最好嘅方法係:「唔畀佢知道跟住落嚟嘅事。」
雖然史提芬覺得成個計劃都係好冒險,甚至根本唔知道會唔會成功,但唔試下又無人會知道得唔得。
短訊息已經預備好,史提芬將電話舉高,喺空中揚一揚,一邊抬頭望住個電話,然後一直向牆邊移開。
「喂……史提芬……」小冰叫住史提芬,因為史提芬佢自己一個走開咗,行埋去牆邊,一直舉起個電話。如果無咗電話屏幕嘅光,小冰應該黑到見唔到史提芬。
「你想搵訊號?」小冰估計史提芬死心不息,希望可以搵到電話訊號,打出去求救。「真係可以搵到?」講真,小冰覺得權叔如果睇到佢地宜家喺度傻傻咁搵訊號應該喺度笑緊。
直覺上,佢覺得權叔唔會唔知佢地無電話,而電話又可以求救,就算之前嘅對峙都唔見得權叔會搜佢地身,權叔應該好清楚唔會有人可以喺呢間房打到電話出去。
「但……真係無可能嗎?」小冰唔敢,亦唔想肯定住。
史提芬由一邊牆角,掃到去另一邊牆角,對眼一直望住電話屏幕嘅右上角,上面有一個天線符號,打了個「X」係度。
當然,史提芬心入面都好想搵到個訊號,但佢好慢好慢咁繞住室內走完一個圈,個天線符號仍然一格都無,不過佢志不在此。
表面上,史提芬個樣好似好失落咁,但其實佢心中係緊張到一個極點。
喺剛剛圍繞一圈嘅時間內,佢留意到天花板角落嘅紅色小燈仍然閃動著。
「OK﹗要自然啲……」史提芬無時無刻都提醒住自己。佢刻意走去一個閉路電視可以對正嘅角度,因為佢可以肯定權叔好大機會正在睇住佢地嘅一舉一動。
喺一入嚟嘅時候,當佢地都驚魂甫定時,史提芬好實在咁睇過一次四周圍環境,佢好肯定剛剛佢地被趕入嚟時,喺未有盞紅色小燈嘅存在,係一直到打開冷藏櫃時,佢先隱約覺得有一盞十分微細嘅紅光在閃動,所以頭先佢做咗個舉動,熄晒所有燈,搵出紅燈嘅確實位置。
咁即係話,有人喺權叔離開咗呢間恐怖嘅行刑房後一段時間,開啟咗呢間房嘅閉路電視。而呢一個人最大嘅機會就係權叔本人,就算唔係佢本人,只要宜家係有人睇住佢地嘅舉動就可以了。
而且,史提芬都發現,個假天花板係用一塊塊嘅吸音海棉鋪上去,但唔係一大塊,而且分開一小個一小個嘅四方格,就返個假天花嘅鋁架,逐塊鎅出嚟黐上去。
「咁嘅天花板似乎可以頂得起,只差在高度問題……」史提芬心中盤算著。
小冰一直都望實史提芬嘅舉動,生怕佢行行下就會突然消失咁,眼眉都唔敢動一下,交叉雙手咁攬住自己手踭,直至佢畀史提芬突如其來嘅叫聲嚇了一跳。
「有呀﹗有呀﹗有呀﹗呢度有Signal呀﹗」史提芬叫得好大聲,好激動,甚至激動到跳起身。
「真係㗎?你快啲打電話啦﹗」小冰嚇親之餘,都急步走過去史提芬嗰邊,想睇下佢聯唔聯絡到出面。
史提芬揸住電話不斷起跳,不斷望實電話,小冰無辦法睇得清楚部電話嘅畫面。史提芬又將電話貼近耳邊,似乎係聽緊電話,小冰無打擾佢,但好緊張咁企喺佢旁邊望住史提芬。
等咗十幾秒左右,史提芬快速地望一望電話說:「唔得﹗太低收唔到,要高啲先得……」之後又再次舉高部電話。
「即係點呀?點先收到呀?」小冰好想有嘢幫到手:「係咪要企高啲先打得到電話?」
二話不說,小冰立即踎係度:「你踩住我企高啦﹗」
「唔係唔係,你幫我去嗰邊推個冷藏櫃過嚟吖﹗」史提芬心中忍住暗笑,卻又一面正經咁指小冰去推櫃。
推個冷藏櫃,成組動作會感到更急切;揸住部電話,弄虛作假得真實;史提芬眼角仍然有偷望向閉路電視嘅位置,紅色點點仍然忽明忽暗咁閃動著。
小冰急速地跑過去空置嘅冷藏櫃嗰邊,座低個人,準備出盡所有力氣拉動個櫃,平滑嘅地面有助佢移動,不消幾秒時間,個櫃已經離開了原位,但再拉唔郁。
「有電線扯住。」呢個係小冰第一個諗法。佢繞去後面順住個櫃身摸出條電線,一直摸到去電掣位,用力一掹。
就係呢個時候,小冰聽到一下沉重嘅聲音,似喺外面傳嚟。佢望一望史提芬,史提芬都停止了跳躍,轉過頭望住小冰。
此時此刻,小冰同史提芬對望咗一眼。然後史提芬大叫:「快啲推過嚟呀﹗」佢自己都走過小冰處,幫手拉動個冷藏櫃。
嗰下沉重嘅聲,唔係嚟自其他嘢,好明顯,係出面5B室嘅木門被打開後再關上。小冰聽得出,史提芬更加係心頭狂跳。
「真係成功咗?」史提芬情緒高漲,將個冷藏櫃拉得更快,一直拉到去佢原先跳躍嘅位置下面。
鎖匙同鐵門嘅撞擊聲傳入去佢地嘅耳中,史提芬暗叫不好:「開緊道鐵門啦!」當佢快速地爬上去個冷藏櫃上面時,鐵門「卡查」一聲被拉開。
搶先一步衝入去嘅人,正是權叔。
「放低部電話!」權叔對住史提芬大喝,並舉起一支黑色物體對正史提芬。
史提芬企喺冷藏櫃上面,手拎住電話在半空中,凝住了。
小冰見到一枝類似係手槍嘅嘢係權叔手上面,尖叫咗出嚟:「佢有槍呀!」
話口未完,一聲槍聲及一圈火花從權叔手上射出,擊中小冰腳旁嘅冷藏櫃,轟的一聲,嚇得小冰叫著踎低,用手按住耳朵。
這一下,連史提芬都嚇到腳軟了,佢無諗過係現實生活中會見到真嘅槍,咁響亮嘅槍聲震攝了佢每個細胞。
「放低隻手,拋部電話過嚟!」權叔又再次吩咐:「定係你想我下一槍就打死條𡃁妹?」
權叔將手槍轉向小冰。
權叔背住門口,外面只有燈泡嘅光,唔太明亮。小冰望住權叔,因為背光,只見到一個黑影。
「好好好!我畀你、我畀你,你唔好開槍。」史提芬慢慢放低揸住電話嘅手,順手用手指關掉屏幕,將電話向前一拋,拋向權叔。
權叔用另一隻手一把就接住,但槍口仍然無離開過小冰。
「落返嚟!同埋條𡃁妹走去後面!」權叔繼續命令史提芬嘅行動,佢自己則再退後一步,企返去間行刑房嘅出口。
「我警告你地唔好再玩嘢呀!下一槍我唔會再射歪!」權叔講得好平靜,就咁聽一啲都唔似係一個上咗年齡嘅阿伯講嘢。
呢一刻,權叔有一種殺手嘅味道。
史提芬全身肌肉都繃緊,汗流浹背,按捺住顫抖嘅心情。除咗係佢地畀人用枝槍指住外,更大部份係因為佢部電話宜家畀權叔攞住,而現在權叔正睇住佢部電話。
權叔按著了「Home」掣,電話嘅屏幕亮起。
屏幕鎖機圖案係一張「Ironman」嘅公仔,權叔唔認識,佢只不過係想睇下部電話狀態。
「果然係唔會有訊號。」當權叔睇到個天線仔顯示出無格數時,頓然放下心頭大石。
「嚇得我……」權叔心入面仲未安定晒落嚟,雖然佢宜家再三確定喺呢個單位內係真係無可能收到任何訊號,但頭先喺閉路電視入面見到佢地嘅舉動,真係令權叔懷疑十年前喺呢度安裝嘅屏閉裝置係咪已經失效。
由剛才權叔鎖住史提芬同小冰喺呢一間行刑房之後,佢就返回隔離A室單位,嗰邊同埋呢間5B室係一間相連嘅監察房,主要用作控制5B室內嘅懸掛裝置、冷凍裝置,以及物品儲存倉。A室亦有一排閉路電視,影住B室每一個角落。
當權叔返回A室時,就啟動咗B室閉路電視嘅控制,留意住他們嘅情況,由佢地六神無主開始,到發現吊喺牆上嘅屍體,一直到佢地打開冷藏櫃,然後大哭,再去到平靜,權叔全部都睇晒,當然亦包括見到史提芬使用電話嘅情況。
係一個失誤。
當初喺八樓,佢見到小冰正想報警時,就一心想制止住佢,同埋諗辦法處理咗佢地,而佢一直都忽略咗:「個男仔仲有一部電話。」一直到史提芬喺行刑房攞出咗佢部電話出嚟嗰刻,權叔先警覺自己計算錯誤,不過佢仍然無擔心過。
十年前,香檳大廈曾經做過一次樓宇維修,嗰時權叔先啱啱跟住大老闆做嘢,大老闆對權叔打下強心針:「你跟得我做嘢,你就放心去做,其他嘢我自然會安排。」而嗰次嘅維修,大老闆特地搵咗啲人返嚟打造咗五樓呢兩間房,然後佢就開始接手呢度嘅工作。
佢喺呢度嘅工作,簡單嚟講只係兩隻字:「殺人。」
權叔樂於接受呢一種工作,佢孤家寡人,無咩牽罣。表面上佢係香檳大廈嘅一個平庸看更,但其實佢更享受於大老闆畀佢嘅呢個特殊「任務」。
記得當年嗰個負責裝修呢房間嘅師傅同佢講過:「呢間房無論上上下下全部都有金屬片圍繞,再加石屎牆,唔會有任何電話可以打到出去㗎,呢個叫做金屬屏蔽技術。」
呢一句話權叔一直都記得。因為個師傳講完呢句話後,就已經唔喺度。佢係權叔喺香檳殺嘅第一批人之中嘅第一個。
叫阿聰?定係阿德?權叔無乜印象了,反正咁多年來殺嘅人太多,而且名字對佢嚟講無乜意義,無謂花心思去記住。
剛剛望住電話嘅天線無訊號狀態,勾起了權叔以前嘅一段小回憶,佢將注意力放返去面前嗰兩個𡃁仔𡃁妹身上,而且將史提芬部電話放入自己褲袋內。
手槍仍然指住佢地,權叔望住黑暗中嘅小冰同史提芬,心中下了決定。佢再退後一步,退出行刑房,把鐵門再一次重重地關上。
「用氣體搞掂……」權叔心中想著:「反正留佢地喺度都無用。」
權叔鎖上了鐵門,再將把槍放返入後褲袋攝住,獨自行出5B單位。
※※※※※※※※※※※※※※※※※※※※※※※※※※※※※※※※※※※※
「呯」,行刑室嘅鐵門關上,裡面又回復漆黑一片。
史提芬嘅手機被沒收,小冰喺佢身邊急得哭了出嚟:「宜家電話都無埋啦,今次真係死得啦!」
相反,史提芬並無出現小冰呢一種歇斯底里嘅情緒,反而向前衝咗出去。
鐵門關上一刻,佢已經記住了另一個冷藏櫃嘅方向,宜家嘅佢直撲過去嗰個冷藏櫃 - 藏住黃經理屍體嘅嗰個冷藏櫃。
史提芬一手推開塊黑色玻璃蓋,裡面嘅燈立即亮起,黃經理嘅屍體仍然安靜咁捲曲喺裡面,史提芬眼神再一次接觸到事實,佢別過頭去。
史提芬打開冷藏櫃只有一個目的,佢宜家最需要嘅係「光源」。
一陣白光散射出來,雖然唔係特別光,但總算仲見到成個環境。史提芬二話不說,又飛奔到頭先企過上去嘅冷藏櫃上面。
「你想做咩呀?」小冰一直都被史提芬蒙在鼓裡,直到宜家小冰仍然唔知道史提芬到底計劃咗乜嘢。
史提芬無時間慢慢解釋畀小冰聽,佢宜家有嘅時間可能只係得一分鐘,甚至乎三十秒都唔知有無。
佢伸高兩隻手摸住天花板嘅吸音海棉墊,確定見到一塊塊嘅海棉墊中間的確係有間隔,佢用力頂起一塊,估唔到咁容易就頂得起。
史提芬將頂起咗嘅嗰塊墊推到側邊,天花板出現了一個三呎見方嘅窿。「小冰過嚟推我丫!」史提芬呼喚住小冰,然後用力一跳,用雙手支撐住自己重量,整個半身沒入去天花板個窿裡面。
「你推住我隻腳呀,快啲呀!」史提芬再三催促,小冰先至識得行動,佢走去冷藏櫃旁,雙手左右展開咁托住史提芬兩隻腳,用力向上推送,不消幾秒鐘,史提芬已經爬了到假天花嘅頂上面。
小冰望住上面個黑媽媽嘅窿,露出託異嘅表情:「史提芬……你……走咗?」
上面無發出任何聲。
突然,一隻手從天而降,伸咗落嚟:「小冰,快爬上嚟!」
小冰無再考慮咁多,雖然佢唔知上面有乜嘢,會唔會有老鼠之類嘅東西,但佢更加唔願意自己一個留喺呢間充滿死屍,既恐怖、又危險,而仲咁傷心嘅房間之內。
「快啲呀小冰,無時間啦!」史提芬心中默數住數字:「18……19……20……」
已經過咗20秒,大概權叔已經快返回可以監視佢地嘅地方。
小冰攝手攝腳咁跟住史提芬爬上個冷藏櫃上,舉起雙手捉住史提芬隻手,然後向上一跳,史提芬亦配合小冰跳起嘅時間,用另一隻手兜住佢條腰,連拉帶扯咁將小冰送上假天花之上。
假天花距離真正嘅天花只有不到兩呎高,小冰同史提芬佢地只能夠用俯伏嘅姿勢趴喺假天花上面,幸好,假天花嘅支撐架似乎仲托得住佢地兩個嘅重量。
「希望個仆街唔好咁啱見到我地爬咗上嚟……」史提芬默念,然後把假天花板悄悄地蓋上。
無了冷藏櫃嘅光,上層一片漆黑,史提芬同小冰互相握著手,靜靜等待。
※※※※※※※※※※※※※※※※※※※※※※※※※※※※※※※※※※※※
權叔返入A室內,先打開雪櫃攞咗啤酒出嚟,大啖大啖咁飲。
每次殺人前,權叔嘅心情總有種變態嘅興奮,今次同以往好唔同,以前佢會先用麻醉針或迷藥將獵物整暈,然後再慢慢吊死佢地。
雖然佢睇唔到獵物爭扎,失去咗捕獵嘅刺激同樂趣,但為免引起騷動,靜靜地解決係最適合不過。而且,用呢個方法,可以省卻接觸到血液。
權叔係一個見血會出現恐慌嘅人,好難想像一個咁驚血嘅人,居然會受僱做殺人嘅工作。如果「殺人」同「血液」不能共存的話,「方式」就成為了關鍵。
而且,用血腥嘅方式殺人嘅話,要處理血濺係一件好麻煩嘅事,分分鐘會引起不必要嘅懷疑。話晒香檳大廈每日都有幾百人出入,一旦畀人起疑報警,咁就更加唔得閒了。
權叔好耐都無睇過一個人由活生生到冷冰冰嘅過程,佢再飲多啖啤酒,鎮定自己狂喜嘅心情。
佢摸一摸褲袋內,將史提芬嘅電話放上檯面。檯面上有一組大電視喺度,顯視住十六格閉路電視影像。其中一格就係行刑室內嘅情況。
雖然畫面比較細,但權叔發現有啲唔妥,嗰格畫面上唔太覺得有人喺度,同佢之前佢睇嘅好唔一樣。
權叔放大咗嗰格嚟睇,宜家成個畫面都係行刑室。除了冷藏櫃發住光外,並唔見到有人影喺裡面。
權叔驚訝嘅咀幾乎跌到落地下:「唔見咗嘅?」佢再一次遙控好個閉路電視鏡頭,令佢左右每邊轉動,但仍然見唔咗嗰兩個𡃁仔𡃁妹。
權叔個心離咗一離,與此同時,放喺檯面嘅電話,無啦啦發出一聲響聲,權叔一睇,上面彈咗一個低電量警告。
權叔攞起手睇下部電話,電量得返5%,整個屏都顯示得好暗。而喺低電量警告嘅框框自動關掉後,權叔見到另一個訊息框框喺後面。頓時令權叔感到頭皮發麻。
「預定訊息已經傳送
時間03:55」
(待續)